Čiăng mâo sa ala ƀuôn đĭ kyar, êlâo hĭn grăp gŏ sang brei đĭ kyar kjăp. Khădah snăn ară anei, sa boh klei năng hưn brei răng anăn jing klei ngă jhat hlăm gŏ sang ăt adôk mâo hlăm lu gŏ sang, hlăm anăn mâo gŏ sang mnuih djuê ƀiă.

Klei bi čăm biêng hlăm gŏ sang hlăm kluôm ala, boh nik hlăm krĭng mnuih djuê ƀiă, jing klei mâo ka tuôm hđăp ôh. Boh klei anei dôk ngă lu phung mniê mnuih djuê ƀiă ƀrư̆ hruê ƀrư̆ klah hjăn, toh hroh hlăm yang ƀuôn dôk mâo lu klei bi mlih lehanăn đĭ kyar msĕ si ară anei. Anei ăt jing sa hlăm dŭm mta phŭn ngă kơ lu alŭ wăl krơ̆ng kjăp gru hmô “Anôk êđăp ênang” hŏng mta kñăm pral bi hrŏ klei bi čăm biêng mơ̆ng dŭm gưl hlăm êpul êya yang ƀuôn hluê hdră đru mjêč kơ mnuih mâo klei truh msĕ si: Đuê̆ êjai, dlăng kriê klei suaih pral, đru kčĕ kơ ai tiê klei mĭn, đru kčĕ kơ klei bhiăn, đru nao kơ gưl dlông (tơdah čiăng); Mđĭ klei hgŭm lehanăn klei thâo săng mơ̆ng mnuih ƀuôn sang ti alŭ wăl hlăm hdră gang mkhư̆ klei bi čăm biêng hlăm gŏ sang; Rơ̆ng klei bi hgŭm mơ̆ng dŭm tĭng djŏ tuôm hlăm hdră đru mnuih mâo klei truh, mkŏ mjing êpul mă bruă rơ̆ng klei mtăp mđơr êkei mniê ti anôk bruă nah gŭ.

Ti Lào Cai, mơ̆ng akŏ thŭn 2023 truh kơ ară anei, êpul bruă mniê dŭm gưl čar Lào Cai mkŏ mjing leh mrâo 2 “Anôk đăo knang” ti êpul êya hlăm wăl krah Nông trường Phong Hải, kdriêk Bảo Thắng lehanăn să Thẳm Dương, kdriêk Văn Bàn hŏng 40 čô nao hgŭm. Anei jing 2 gru hmô mâo Êpul bruă mniê gĭt gai hluê ngă wưng thŭn 2021 - 2025.

Hluê hdră kčah mơ̆ng Anôk bruă sang čư̆ êa čar Lào Cai kơ bruă pŏk hdră rơ̆ng klei bi mtăp mđơr êkei mniê lehanăn msir mghaih dŭm boh klei mjêč hŏng phung mniê lehanăn phung hđeh ti alŭ wăl wưng thŭn 2021 - 2025, kluôm čar lŏ bi kjăp, mđĭ hnơ̆ng tŭ jặk amâo dah mkŏ mjing mrâo 48 anôk đăo knang ti êpul êya.

Ti Bình Định, gru hmô “Anôk đăo knang ti êpul êya” đru kơ phung mniê lehanăn phung hđeh arăng čăm biêng hlăm gŏ sang mâo pŏk ngă lehanăn ba wĭt dŭm boh tŭ dưn klă sĭt. Ară anei, gru hmô “Anôk đăo knang êpul êya” đru kơ phung mniê lehanăn phung hđeh arăng čăm biêng hlăm gŏ sang dưi pŏk ngă ti 5 kdriêk: An Lão, Vân Canh, Vĩnh Thạnh, Hoài Ân, Tây Sơn. Gru hmô anei ƀrư̆ hruê đru mđĭ klei thâo săng mơ̆ng êpul êya mnuih ƀuôn sang dôk hlăm hdră gang mkhư̆ klei bi čăm biêng hlăm gŏ sang, boh nik răng mgang phung amai adei mniê, phung awăt hlăm yang ƀuôn. Hoàng Thị Thanh Nhã, K’iăng khua êpul bruă mniê čar Bình Định brei thâo:

“Mta kñăm mơ̆ng gru hmô anei čiăng đru kơ êpul bruă mniê lehanăn phung hđeh mâo klei čăm biêng hlăm gŏ sang srăng mâo anôk đuê̆ êjai. Mâo 1 anôk digơ̆ hưn mthâo klei mâo, klei čiăng đru”.

Ti Lai Châu, Nguyễn Thị Thủy, K’iăng khua knơ̆ng bruă mnuih ngă bruă, kahan êka êkeh lehanăn yang ƀuôn čar Lai Châu brei thâo. Hŏng anăm “Rơ̆ng klei êđăp ênang ala ƀuôn, mđĭ klei dưi lehanăn mjing klei găl kơ phung mniê lehanăn hđeh mniê, kñăm hluê ngă klei mtăp mđơr êkei mniê lehanăn lăm lui klei bi čăm biêng, Anôk bruă snag čư̆ êa čar Lai Châu ba mdah leh hdră kčah hluê ngă Hdră êlan ala čar kñăm rơ̆ng klei bi mtăp mđơr êkei mniê hlăm krĭng mnuih djuê ƀiă lehanăn krĭng čư̆ čhiăng wưng thŭn 2022 – 2030 kñăm bi hrŏ klei bi kah êkei mniê, mjing klei găl čiăng phung mniê, phung êkei mnuih djuê ƀiă nao hgŭm, dưi dưn klei mtăp mđơr hlăm bruă kđi čar, klei hdĭp, bruă dhar kreh, mđĭ kyar bruă duh mkra, đru mguôp hlăm hdră mđĭ kyar kluôm mơ̆ng čar.

Hlăm wưng ti anăp, čar srăng ngă lu hdră hâo hưn, mtô mblang, hlăm anăn mđing kơ dŭm sang hră, anôk bruă duh mkra, êpul êya mnuih ƀuôn sang dôk, boh nik mđing truh kơ krĭng mnuih djuê ƀiă, anôk klei thâo săng mơ̆ng mnuih ƀuôn sang kơ klei mtăp mđơr êkei mniê dôk êdu kƀah. Hmei srăng pŏk ngă tŭ dưn dŭm gru hmô, anăn jing “Alŭ wăl jĕ giăm lehanăn êđăp ênang hŏng phung hđeh mniê”, “Sang hră êđăp ênang, jĕ giăm amâo mâo klei bi čăm biêng”, “Anôk đăo knang, sang dôk êjai hlăm êpul êya”. Boh nik, hmei lŏ dơ̆ng mđĭ kyar gru hmô “Gang mkhư̆ lehanăn bi hrŏ klei truh amâo jăk mơ̆ng klei bi čăm biêng, amâo mtăp mđơr êkei mniê”.