Hlăm wăl sang bi kƀĭn ƀuôn êpul êya ti ƀiôn Tleh, să Dliê Ya, kdriêk Krông H Nang, čar Dak Lak, dŭm êtuh čô hđeh leh anăn phung mniê dôk dlăng kdŏ anak rai. Lu phung hđeh hur har bi tiŏ êran, mă kngan amâodah kdŏ hŏng êpul kdŏ anak rao. Klei kriêp ñăt grăp hruê bi ƀuôn sang jing kdrăm kơah. Adei Y-Gian M’lô, ƀuôn Tleh brei thâo, anei jing gưl tal êlâo kâo mâo dlăng kdŏ anak rai ti ƀuôn:

“Anei jing gưl tal êlâo kâo ƀuh kdŏ anak raii hlăm knăm mơak mlan pur, kâo mơak snăk. Kâo bi mni lač jăk kơ phung neh ba leh Knăm mơak mlan pŭr kơ hmei.”

Mbĭt hŏng dlăng kdŏ anak rai, phung hđeh lŏ dưi dlăng lu bruă ngă tŭ dưn leh anăn mâo lu hnư mnơ̆ng. Mă hnư mnơ̆ng leh anăn êdeh wai jơ̆ng mrâo, adei H’Sơra Niê brei thâo:

“Hruê anei mâo sa hruê hlăp Knăm mơak mlan pŭr mơak snăk kyua mâo êdeh wai jơ̆ng, dlăng kdŏ anak rai, phung neh khăt brei ƀuk. Anei jing gưl tal êlâo kâo ƀuh klei jăk mơak anei. Kâo bi mni lač jăk kơ di neh lu”

Amâo djŏ knŏng phung hđeh ôh, lu mnuih prŏng ăt bi kƀĭn ti sang kƀĭn ƀuôn hlai mbĭt hlăm ai êwa mơak Knăm mơak mlan pŭr hŏng phung hđeh. Ba 3 čô anak ñu nao mă mnơ̆ng leh anăn mơak mlan pŭr, amai H’An Niê ti ƀuôn Tleh brei thâo:

“Sang kâo mâo 4 čô hđeh, kyua klei hdĭp dleh dlan anăn ka tuôm thâo ôh kơ klei blei mnơ̆ng kơ phung anak amâodah brei phung anak nao hiu hlăp hlăm knăm mơak Mlan pur. Hruê anei mâo êpul mâo ai tiê kmah hriê truh ti ƀuôn čiăng mkŏ mjing Knăm mơak mlan pŭr kơ phung hđeh, kâo mơak leh anăn mgei ai tiê snăk.”

Ƀuôn Tleh mâo 177 gŏ êsei, hŏng giăm 300 čô hđeh. Êbeh 90% hlăm ênoh anăn jing mnuih Êđê. Y Nghê Mlô, Khua ƀuôn Tleh brei thâo, grăp thŭn, gưl Têt, Knăm mơak mlan pŭr bruă sang čư̆ êa alŭ wăl leh anăn lu êpul mâo ai tiê kmah ăt wĭt čhưn, mđup brei mnơ̆ng kơ mnuih ƀuôn sang leh anăn phung hđeh. Thŭn anei hdră mkŏ mjing kdrưh kơăm hĭn anăn mnuih ƀuôn sang, boh nik phung hđeh mơak snăk:

“Klei hdĭp mnuih ƀuôn sang tinei dleh dlan snăk anăn amĭ ama amâo dưi mprăp djăp ênŭm ôh kơ anak. Myun mơh mâo êpul mâo ai tiê kmah hriê mđup brei mnơ̆ng leh anăn mkŏ mjing klei hlăp lêñ kơ phung hđeh. Klei anei jing năng mơak snăk hŏng phung kriê dlăng ƀuôn leh anăn boh nik hŏng phung hđeh.”

Hdră “Knăm mơak mlan pur kơ adei” mâo Êpul mâo ai tiê kmah ti ƀuôn prŏng Ƀuôn Ama Thuôt, čar Dak La mkŏ mjing. Tinei, êngao kơ dŭm bruă ngă knăm mơak Mlan pŭr, êpul khăt ƀuk kơ phung hđeh, mđup brei giăm 300 hnư mnơ̆ng jing ƀung hdang krô, ƀêñ keŏ, ƀêñ mmih, mnơ̆ng yua hriăm hră. Mbĭt anăn, Êpul lŏ mđup brei 6 boh êdeh wai jơ̆ng kơ phung hđeh mâo klei hdĭp dleh dlan, hriăm thâo. Ênoh dŭm hnư mnơ̆ng êbeh 60 êklăk prăk. Nguyễn Thị Nga, Khua Êpul hgŭm brei thâo:

“Grăp thŭn knăm mơak mlan pŭr snăn hmei hlăm Êpul hgŭm bruă hlue si phung mâo ai tiê kmah ba dŭm hnư mnơ̆ng yuôm bhăn truh hŏng dŭm krĭng taih kbưi mâo lu klei luč liê. Hlăm yan knăm mơak mlan pŭr thŭn anei, hmei srăng ngă thiăm ti 3 anôk dơ̆ng ti krĭng dleh dlan taih kbưi, truh hŏng phung hđeh ƀun.”

Mbĭt hŏng knăm mơak mlan pur hnưm ti ƀuôn Tleh, phung hđeh ti dŭm ƀuôn sang krĭng taih kbưi leh anăn phung hđeh amâo myun ti čar, ăt mâo dŭm knăm mơak, kyua Keh đru kơ phung hđeh, Êpul hgŭm đru kơ phung amâo jăk asei mlei leh anăn hđeh êrĭt amĭ ama, bruă êdam êra čar Dak Lak, Anôk bruă phung ba anăp ala čar mkŏ mjing. Dŭm hnư mnơ̆ng dưi mơĭt hlăm klei mơak mơ̆ng phung hđeh, ba sa yan Knăm mơak mlan pŭr bŏ hŏng asăp tlao mơak mñai./.