Hlăm boh sang tĭ rưč, adei H’Chu 16 thŭn ti ƀuôn Chan, să knông lăn Ia Pnon kuč pui ksă êsei tŭk djam knŏng hŏng ƀiă djam hŏng kan krô guôn ung wĭt. Kpur pui ŏng klei mngač ƀơ ƀiă amâo djăp bi mđao sang pui tơdah yan hjan dôk truh. Amâo mâo bruă, H’Chu jưh hlăm bruă mă amâo kjăp mơ̆ng ung ñu. Klei hdĭp H’Chu lĕ hlăm klei dleh dlan. Kyua anak dôk điêt ka dưi dôk hjăn anăn dua čô ung mô̆ mda ase anei hdĭp mbĭt hŏng amĭ ama mô̆, mơ̆ng ară anei amĭ ama lŏ rông thiăm dua čô anăn klei ƀun kwang dar jŭm dar.

Hlăk anăn ñu hriăm adŭ 9, leh anăn mâotian kâo kbiă sang hră ƀuh phung găp sang hră kâo ênguôt snăk, čang hmăng phung găp amâo dôk ung mơ̆ng điêt msĕ pô.

Ăt msĕ si H’Chu, adei Rơ Lan H’Hương ti să Ia Krieng, kdriêk Đức Cơ mprăp jing amĭ hlăk 17 thŭn. Hlăk êjai phung găp dôk nao sang hră hlue ngă klei čang hmăng snăn adei Hương knŏng wĭr wĭr hlăm sang dôk guôn hruê kkiêng anak. Dlăng ƀô̆ mta H’Hương grăp čô pap sơăi kyua ñu dôk mda đei čiăng jing amĭ. Gŏ sang brei thâo: Hlăk ñu nao dôk ti sang êkei, gŏ sang ênguôt snăk leh anăn ghă. Ƀiădah ñu ba tian leh tŭ ư mơh ƀiădah ka jhŏng bi kuôl ôh kyua djăp thŭn kơ jhŏng ngă.

Kdriêk Đức Cơ ară anei mâo giăm 19.500 ngŏ êsei hŏng 82 êbâo čô, hlăm anăn mnuih djuê ƀiă mâo giăm 43 %. Hlue si klei ksiêo yap mơ̆ng thŭn 2021 truh ară anei, kluôm kdriêk mâo giăm 200 hlâo ung mô̆ bi dôk mơ̆ng mda leh anăn dôk anak amiêt awa. Mta phŭn ba klei bi dôk ung mô̆ mơ̆ng mda leh anăn bi dôk anak amiêt awa jing kyua kƀah klei mđing dlăng leh anăn kriê dlăng mơ̆ng amĭ ama hŏng anak čô, ngă kơ hđeh sang hră kbiă sang hră thâo khăp hnưm dôk ung hnưm, êngao kơ anăn klei đĭ kyar ala čar, klei ñŭ kma dhar kreh hŏng tač êngao, hdĭp kƀah klei thâo kơ êkei mniê hmăi leh kơ hđeh sang hră anăn ngă ba tian êngao klei čiăng anăn mdei sang hră čiăng bi kuôl jing dôk ung mô̆ mơ̆ng mda. Êngao anăn, bruă hâo hưn, mtô mblang hdră bhiăn ti alŭ wăl lŏ kƀah, klei hdĭp mnuih ƀuôn sang adôk ƀiă mkă hŏng hnơ̆ng kah knar mbĭt ba boh tŭ mơ̆ng hdră msir hâo hưn ka djŏ guôp. Ênoh bi dôk ung mô̆ mơ̆ng mda leh anăn bi dôk anak amiêt awa lu ba klei ƀun knap ăt đĭ mơh, boh nik hŏng dŭm gŏ êsei mnuih djuê ƀiă, kyua kluôm kdriêk Đức Cơ ară anei mâo giăm 3000 gŏ êsei ƀun snăn mâo truh 2.600 gŏ êsei jing mnuih djuê ƀiă. Leh anăn phung dôk ung mô̆ mơ̆ng mda leh anăn bi dôk anak amiêt awa snăn dôk hlăm gŏ êsei mnuih djuê ƀiă.  Siu Luynh, K’iăng Khua Knơ̆ng bruă sang čư̆ êa kdriêk Đức Cơ brei thâo:

Hmei gĭt gai dŭm adŭ bruă msĕ si adŭ bruă djuê ana, adŭ bruă mnuih mă bruă bi hgŭm phung mniê mđĭ mkŏ mjing hâo hưn kơ tur knơ̆ng, dŭm alŭ ƀuôn leh anăn phung hgŭm hlăm êpul êdam êra jing mơ̆ng 16 thŭn jing hâo hưn hŏng phung anak čô djŏ kơ klei bi dôk ung mô̆ mơ̆ng mda, bi mguôp dŭm hdră, dŭm hdră bruă čiăng mđĭ klei thâo săng.

Hŏng klei gĭr hlue ngă tŭ dưn Hdră bi hrŏ klei bi dôk ung mô̆ mơ̆ng mda leh anăn bi dôk anak amiêt awa hlăm krĭng mnuih djuê ƀiă wưng 2021- 2025, kdriêk Đức Cơ hâo hưn, mtô mblang kơ klei bi dôk ung mô̆ mơ̆ng mda, bi dôk anak amiêt awa leh anăn dŭm hră mơar djŏ tuôm kơ êpul êya dŭm djuê ƀiă ti alŭ wăl. 34 klei hâo hưn ti dŭm să, wăl krah iêô jak êbeh 1600 čô mnuih, mbha 630 pŏl hră, 10 video hâo hưn kơ klei jhat mơ̆ng klei bi dôk ung mô̆ mơ̆ng mda leh anăn bi dôk anak amiêt awa kơ knuă druh alŭ, ƀuôn, êpul mnuih ƀuôn sang leh anăn Knơ̆ng bruă sang čư̆ êa dŭm să, wăl krah; mkŏ mjing giăm 50 adŭ hriăm mjuăt hŏng êbeh 1000 čô hgŭm kơ bruă gang mkhư̆ bi dôk ung mô̆ mơ̆ng mda leh anăn bi dôk anak amiêt awa. Adei Nguyễn Hà Cẩm Vy, hđeh sang hră adŭ 9 sang hră gưl 2 knŭk kna dlăng ba kdriêk Đức Cơ mơ̆ng hruê hgŭm hlăm klei hriăm mjuăt thâo săng klă leh anăn klei thâo săng kơ boh jhat mơ̆ng klei bi dôk ung mô̆ mơng mda leh anăn bi dôk anak amiêt awa.

Hgŭm hlăm dŭm klei hâo hưn kơ klei bi dôk ung mô̆ mơ̆ng mda leh anăn bi dôk  anak amiêt awa snăn kâo ƀuh pô đăm dôk ung hnưm ôh leh anăn brei hriăm hră čiăng mă bruă kơ klei hdĭp pô êdei anei, leh mâo leh bruă mă kjăp kơh pô bi mĭn kơ klei dôk ung leh anăn wĭt ti ƀuôn sang kâo hâo hưn kơ phung găp mđơr thŭn hŏng pô đăm dôk ung mô̆ hnưm ôh leh anăn ƀuh kơ klei amâo jăk êdei anei leh anăn hâo hưn mtô mblang hŏng phung găp brei hriăm hră mơar čiăng mă bruă kơ klei hdĭp pô leh anăn mâo bruă mă kơh dôk ung mô̆.

Kyua pŏk ngă dŭm hdră msir ktang anăn klei bi dôk ung mô̆ mơ̆ng mda leh anăn bi dôk anak amiêt awa hrŏ leh hlăm grăp thŭn. Tơdah msĕ si thŭn 2021 jing 82 čô dôk ung mô̆ mơ̆ng msa, 1 čô dôk anak amiêt awa, snăn truh thŭn 2023 hrŏ adôk 22 čô bi dôk ung mô̆ mơ̆ng mda leh anăn amâo mâo klei dôk anak amiêt awa. Thŭn 2023, kdriêk Đức Cơ lŏ dơ̆ng bi mguôp hdră bi hrŏ klei bi dôk ung mô̆ mơ̆ng mda leh anăn dôk anak amiêt awa hlăm krĭng mnuih djuê ƀiă hŏng boh phŭn mơ̆ng Hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng. Siu Luynh, K’iăng Khua Knơ̆ng bruă sang čư̆ êa kdriêk Đức Cơ brei thâo:

Djŏ tuôm kơ hdră kñăm mđĭ kyar krĭng mnuih djuê ƀiă, hmei jao kơ dŭm anôk bruă djuê ana leh anăn adŭ bi hgŭm plah wah dŭm anôk bruă, boh nik dŭm să, êpul bruă hâo hưn mtô mblang kơ yang ƀuôn, ară anei pŏk ngă leh ti dŭm alŭ wăl msĕ si să Ia Tấc, Ia kra leh anăn dŭm să mkăn. Mơ̆ng bruă pŏk ngă ăt ƀuh klei mđing truh jăk mơ̆ng ƀuôn sang.

Hŏng dŭm hdră msir tŭ dưn, mnuih djuê ƀiă ti kdriêk Đức Cơ, čar Gia Lai grăp knhuang mđĭ klei thâo săng bi mlih bruă ngă, mđĭ klei thâo hmư̆ klei hâo hưn leh anăn iêô mkrum klei hgŭm mơ̆ng êpul êya, mbĭt anăn mđĭ lar klei ktang mơ̆ng dŭm gưl, dŭm dhar bruă yang ƀuôn hlăm bruă lăm lui klei bhiăn kthŭl mluk hlăm klei bi dôk ung mô̆, mkŏ mkra klei hdĭp jăk mơak, trei mđao./.