Hdră bi mguôp phung kdlưn hĭn mâo leh dŭm boh tŭ dưn jăk hlăm lĭng kahan kơ klei hriăm lehanăn hlue ngă knhuah mngač Hồ Chí Minh; kut kat bi kdơ̆ng hŏng klei mĭn hjan kơ pô hlăm ênuk ară anei.

Dŭm klei yăl dliê jăk kơ klei săn asei mlei, kyua mnuih ƀuôn sang, lehanăn kơ bruă răng mgang lăn čar, kyua klei bi mguôp hŏng ala tač êngao jing yuôm bhăn, mâo bi êdah leh hlăm dŭm klei yăl dliê mơ̆ng klei kdŏ mmuiñ, lehanăn hlăm dŭm klei bi blŭ hrăm mơ̆ng hdră mkŏ mjing anei, kñăm kơ mnuih dlăng dưi thâo săng klă mngač hĭn kơ knhuah gru lĭng kahan Awa Hô, mơ̆ng anăn bi lar dŭm hdră bi hmô siam, hdră mă bruă jăk, hŏng klei knhêč, tŭ jing hlăm lĭng kahan.

Sa hlăm dŭm êtuh klei yal dliê jing kdlưn hĭn mơ̆ng lĭng kahan mâo Thượng úy Nguyễn Tuấn Anh, mơ̆ng knơ̆ng bruă răng mgang klei êđăp ênang internet, Viettel, jing leh mnuih hur har hlăm bruă ksiêm duah, mâo leh klei hâo mdah hŏng tar rŏng lăn thâo kơ anôk k’hư hlăm bruă bi hgăm, đru leh kơ dŭm êpul bruă, êpul grŭp prŏng, ñĕ răng kơ klei luič liê huĭdah tuôm hŏng ngăn prăk. Thượng úy Nguyễn Tuấn Anh lač:

 “Bruă kâo mă jing dôk hlăm êpul redteam mâo bruă klam msĕ si sa hacker pioh tui duah dŭm anôk k’hư kơ bruă bi hgăm mơ̆ng nah êngao lehanăn mơ̆ng lam hlăm dŭm knơ̆ng bruă, êpul êya, lehanăn mơ̆ng anăn duah djăp hdră mghaih msir, đru msir hĕ jih anôk amâo mâo jăk anăn. Kâo mbĭt hŏng ƀĭng mă bruă mbĭt êngâo kơ klei khăp kơ bruă knuă, jing mâo nanao klei gĭr mơh, amâo mâo mdei mtam găn djăp mta klei dleh dlan kñăm păn kjăp jih jang bruă dleh dlan hlăm kdrăp mă bruă, đru bi răng kriê mnuih ƀuôn sang, răng mgang lăn čar hlăm internet.”

 Hlăm klei mkŏ mjing anei lŏ mâo wăt mnuih ƀuôn sang djuê ƀiă, jih sa boh sang mâo 5 čô ƀơ̆ng djŏ mmao ruă, êjai hlăm êlan nao ba kơ sang êa drao jing kbưi. Mơ̆ng klei msĕ snăn, mâo nai ea drao kahan hŏng jih klei thâo pô ktuh êyuh dŏng mdrao phung ƀơ̆ng djŏ mmao ruă, lehanăn dưi dŏng mdrao digơ̆ hŏng klei jăk. Digơ̆ ară anei ba leh jih ai tiê klei khăp hdơr knga prŏng prĭn êdi mơ̆ng jih bruă jăk lĭng kahan mâo ngă leh lŏ yăl dliê:

 “Kâo lač jăk kơ phung aê mdrao prŏng êdi, kyua mâo diñu hmei tlaih mơ̆ng klei djiê ƀiă riă rit, truh ară anei jih jang hmei sưai sơăi. Mâo hdră mkŏ mjing hrue anei, gŏ sang hmei čiăng hdơrr knga kơ diñu. Kâo lehanăn găp djuê kâo mtă kơ jih jang mnuih brei thâo kral ti jing mmao ruă lehanăn mmao dưi ƀơ̆ng”.

Hŏng mmông hlăm brô 90 mnĭt, hdră mđung rup ti mmông anăn mtam mâo mkŏ hŏng phung yap jing kdlưn hĭn “Bi msiam knhuah gru kahan Awa Hô” jing klei bi klin jih jang klei yăl dliê kơ dŭm bruă jăk mâo yăl dliê mrâo, ngă mgei lu ai tiê, mbĭt anăn mâo wăt klei kưt muiñ, klei ngă hlăp hlăm jih jang klei yăl dliê mâo mkŏ mjing kñăm đru kơ mnuih dlăng thâo ƀuh klă mngač knhuah gru kahan awa Hồ; đru bi lar dŭm mta bruă jăk siam mrâo, hdră mă bruă knhăk, mâo ba wĭt leh klei tŭ dưn hlăm lĭng kahan.

Khua hlăm phŭn bruă kđi čar, Khua anôk bruă kiă kriê klei hâo hưn gưl dlông Nguyễn Trọng Nghĩa brei thâo, mơ̆ng thŭn 2021, bruă Đảng kahan gưl dlông mâo mtrŭn leh dŭm hdră mtrŭn bi lar knhuah gru lĭng kahan Awa Hô, kut kat bi kdơ̆ng hŏng hdră êlan mĭn mă hjăn kơ pô. Mơ̆ng asăp mtrŭn anei, lĭng kahan mâo leh klei đĭ hriê kơ prŏng kluôm ênŭm, wăt hlăm bruă mjuăt bi hriăm, bruă mprăp ai tiê hlăm klei bi blah, hlăm klei mă bruă knuă. Jih jang bruă knuă mơ̆ng lĭng kahan găn hlăm djăp mta hdơrr bi gĭr hgao jih klei dleh dlan, knư̆ hrue knư̆ bi êdah klei jăk siam mơ̆ng lĭng kahan A wa Hô wăt hlăm bruă răng mgang klei êđăp ênang, bruă mdrơ̆ng hŏng klei yan adiê ngă, klei ruă tưp. lehanăn lĭng kahan brei thâo săn asei mlei răng mgang klei jăk mơak kơ mnuih ƀuôn sang, răng kriê klei suaih pral mnuih ƀuôn sang. Dưi lač, hdră mtrŭn mơ̆ng anôk bruă Đảng kahan kơ klei mđĭ hĭn knhuah gru lĭng kahan Awa Hô kut kat bi kdơ̆ng hŏng klei mĭn mă hjăn kơ pô hlăm boh klei mrâo, jing leh hdră mtrŭn yuôm bhăn, năng mjêč, đru bi rŭ mdơ̆ng bruă lĭng kahan kjăp ktang hlăm bruă kđi čar, hyuă kjăp ai ktang knhuah kluôm mơ̆ng lĭng kahan, klei ktang hlăm bi blah, dưi bi leh jăk bruă kčah jao./.