Sang hră gưl sa wăl krah Khe Tre  ti kdriêk Nam Đông, ti anăp sang hră mâo ktuê êlan dơ̆ng čar mrô 14C găn, hnơ̆ng êdeh găn êrô grăp hruê mâo lu. Hlăm mmông hđeh sang hră ruê̆ hriăm mâo lu klei huĭ hyưt bi drăm hlăm êlan klông. Klei năng lač, lu phung amĭ ama drông anak amâo đua đuôn mgang kŏ, mdiăng dua, tlâo, čô, boh nik mdiăng pă ba rŭ jhat hŏng hđeh sang hră, hmăi kơ bruă mtô bi hriăm hdră bhiăn, hdră bhiăn klei êđăp ênang hlăm êlan klông kơ hđeh sang hră. Yap mơ̆ng leh pŏk ngă gru hmô “Ƀăng jang sang hră êđăp ênang”, mơ̆ng akŏ thŭn hriăm, sang hră jao kơ phung nai kiă adŭ pŏk ngă klei ƀuăn rơ̆ng êđăp ênang hlăm êlan klông kơ jih jang amĭ ama hđeh sang hră leh anăn 100% phung amĭ ama hđeh mđing truh leh anăn hlue ngă. Sang hră khăng bi hgŭm hŏng Êpul kahan ksiêm hlăm êlan klông - kahan ksiêm kdriêk Nam Đông čiăng hâo hưn mtô mblang kơ klei êđăp ênang hlăm êlan klông kơ phung hđeh. Adei Nguyễn An, hđeh sang hră adŭ 4/5 Sang hră gưl sa wăl krah Khe Tre, kdriêk Nam Đông, čar Thừa Thiên Huế brei thâo:

“Tơdah drei găn êrô hlăm êlan klông amâo dưi ôh êran 3 pruê̆ êdeh, mdiăng 4 čô, mdiăng lu mnuih leh anăn mgăt amâo djŏ êlan.”

 Dưi ƀuh, ară anei ênoh hđeh sang hră mgăt êdeh pui, êdeh wai jơ̆ng tơdah nao sang hră ƀrư̆ lu. Kahan ksiêm kdriêk Nam Đông, čar Thừa Thiên Huế brei thâo, hlăm wưng êgao tơdah ksiêm dlăng ƀuh leh anăn msir mgaih lu phung êdam êra ngiêk ngă soh hdră bhiăn hlăm êlan klông. Čiăng gang mkhư̆ klei anei, êngao kơ klei gĭr ngă bruă mơ̆ng dŭm anôk bruă djŏ tuôm hlăm klei hâo hưn snăn brei mâo klei bi hgŭm kjăp plah wah sang hră, gŏ sang leh anăn ala ƀuôn. Hlăm anăn, klei thâo săng phung hđeh leh anăn bruă klam gŏ sang jing yuôm bhăn snăk. Adei Cao Ngọc Phương Dung, hđeh sang hră adŭ 12B2 sang hră gưl 3 Nam Đông brei thâo:

“Hlue si kâo, găn êrô hlăm êlan klông snăn brei đua đuôn mgang kŏ djŏ hdră kčah. Tơdah êbat amâo dăp pruê̆ ôh hlăm êlan, amâo dưi mdiăng lu đei mnuih kčah ôh, amâo găn pui hrah, êran mklăk êlan leh anăn pral ôh.”

Kñăm rơ̆ng êđăp ênang, bi hrŏ klei huĭ bi drăm hlăm êlan klông ti krĭng čư̆ čhiăng Nam Đông snăn bruă mđĭ klei thâo săng hlue ngă mơ̆ng phung hđeh sang hră jing yuôm bhăn snăk. Bruă kahan ksiêm kdriêk Nam Đông bi hgŭm hŏng bruă sang hră mđĭ bruă hâo hưn, mtô mblang klei bhiăn hlăm êlan klông, dhar kreh găn êrô hlăm êlan klông ti 17 sang hră gưl 2, gưl 3 ti kdrieke hŏng giăm 5 êbâo 700 čô nai mtô, hđeh snag hră. Mbĭt anăn mkŏ mjing bi siñê klei ƀuăn rơ̆ng hlue ngă  Hdră bhiăn hlăm êlan klông plah wah sang hră hŏng gŏ sang leh anăn hđeh sang hră hgŭm mâo 100%. Êngao anăn, dhar bruă ăt mkŏ mjing dŭm êpul răng mgang klei êđăp ênang hlăm êlan klông ti dŭm băng jang hlăm mmông ruê̆ hriăm, rơ̆ng êđăp ênang, bi lar gru hmô “ƀăng jang sang hră êđăp ênang klei găn êrô” ti 30 sang hră.

Trung tá Nguyễn Tiến Dũng, Khua Êpul mkŏ mjing hdră răng mgang klei êđăp ênang čŏng kriê dlăng kdriêk Nam Đông brei thâo, đŭt, ênưih hdơr, ênưih thâo săng, boh nik mâo klei bi blŭ hrăm phung mtô hŏng hđeh sang hră. Grăp gưl hriăm mâo sa hdră bi kah mbha djŏ guôp jing hdră ngă mrâo leh anăn mjing klei jăk siam iêô jak klei mđing mơ̆ng phung hđeh sang hră hlăm dŭm hruê hâo hưn mtô mblang klei thâo tơdah găn êrô hlăm êlan klông, iêô jak phung hđeh sang hră hlue ngă klei bhiăn găn êrô hlăm êlan klông:

“Êpul hâo hưn mtô mblang hdră bhiăn mơ̆ng kahan ksiêm kdriêk truh leh ti dŭm sang hră. Anei jing dŭm sang hră mâo 17 sang hră gưl 2, gưl 3 leh anăn gưl 1 čiăng mtô mblang kơ hdră bhiăn hlăm êlan klông, klei thâo tơdah găn êrô hlăm êlan klông. Kơ klei gang mkhư̆ bruă ngă jhat hlăm sang hră ăt msĕ mơh gang mkhư̆ klei jhat mơ̆ng ma túy kơ phung nai mtô hŏng phung hđeh sang hră, hŏng amĭ ama brei thâo leh anăn hlue ngă bi jăk.”

Hlăm wưng kơ anăp, Êpul kahan ksiêm hlăm êlan klông, kahan ksiêm kdriêk Nam Đông, čar Thừa Thiên Huế lŏ dơ̆ng bi hgŭm hŏng dŭm sang hră ti alŭ wăl mđĭ ktang bruă hâo hưn, mtô mblang kơ klei êđăp ênang hlăm êlan klông kơ hđeh sang hră, mơ̆ng anăn đru kơ phung hđeh thâo săng bruă klam pô tơdah găn êrô hlăm êlan klông, mđĭ klei thâo hlue ngă hdră bhiăn hlăm êlan klông čiăng rơ̆ng klei hdĭp kơ pô leh anăn kơ grăp čô mnuih.