Adŭ hriăm "Tin học pioh čih hră amâo mâo mă prăk ôh" pŏk leh mơ̆ng mlan 3 năm 2024 lehanăn dưi mtô lehanăn hriăm hlăm grăp mlam mmăt knăm 6 lehanăn knăm 7 grăp hrue kăm ti sang hră gưl 3 Chi Lăng, ƀuôn hgŭm Chi Lăng, ƀuôn prŏng Pleiku. 30 čô phung hriăm mơ̆ng ƀuôn Ia Lang, ƀuôn hgŭm Chi Lăng nao hriăm nanao hlăm grăp hrue pŏk adŭ hriăm. Puih Chyh, 60 thŭn jing mnuih hriăm khua asei hĭn yăl dliê:

"Mŭt nao hriăm čiăng thâo săng klei ba yua kdrăp mrâo mrang, hlăm anăn mâo computer, čiăng kơ thâo yua hlăm klei hdĭp ară anei. Nai mtô ăt hur har jih ai tiê, ktrâo hdră pŏk hdră yua, klei kčoh hră, snăn kâo ƀuh bŏ hŏng klei mơak êdi”.

Hŏng lu anôk bruă, êpul êya bruă, kdrăp mrâo mrang jing brei bi mưng tal êlâo, pătdah amâo mâo dưi kƀah ôh hlăm klei hdĭp, hlăm bruă knuă, ƀiădah hŏng mnuih ƀuôn sang ti ƀuôn Ia Lang, anei jing sa mta klei mrâo mrang. Ăt kyua anăn mơh, klei hriăm anei jing jih ai tiê êdi. Tơl mnuih khua thŭn leh ăt hur har nao hriăm mơh. Adei H'K'riêng, 14 thŭn jing mnuih hriăm mă asei mơak yăl dliê:

"Kâo ƀuh phung nai mtô jih ai tiê êdi, čiăng kơ hmei phung phŭn tal êlâo thâo ƀuh kdrăp anei, dôk bi kngăr lehanăn ka thâo bĭt lu mta, snăn mâo phung nai mtô ktrâo atăt grăp mta klei hriăm dơ̆ng mơ̆ng hriăm kčoh, čih hră mơar, jing Word, truh kơ mdah PowerPiont, lehanăn jih jang klei bi tĭng hlăm Excel. Kâo lač jăk kơ phung nai mtô lu êdi, kyuadah diñu tui ksiêm ktrâo atăt ƀhĭ klĭ snăk, mơ̆ng anăn mơh hmei mâo hriăm djăp ênŭm, lehanăn pral mơh thâo ba yua kdrăp computer. Kâo lač jăk kơ phung nai lu êdi”.

 Klei hriăm anei jing hriăm tal êlâo kơ klei thâo ba yua hlăm hră mơar msĕ si hlăm Word, klei thâo yua Excel, klei thâo mdah PowerPoint, mkŏ dưm phần mềm lehanăn thâo mkra tơdah computer mâo klei amâo mâo jăk. Sang hră gưl 3 Chi Lăng tiŏ nao leh  3 nai truăn kơ bruă mtô tin học mbĭt hŏng 30 boh computer pioh mtô lehanăn hriăm bi jăk. Nai Đồng Ánh Dương, jing pô mtô adŭ anei lač:

"Adŭ hriăm anei mjhĭt m’uă êdi, sang hră mprăp leh truh 30 boh computer, tiŏ nao 3 nai đru bi mtô. Hmei hrŏng ruah phung hriăm êmăt hĭn pioh nao hlăm klei bi lông čiăng mă hră tŭ yap hriăm leh tin học čih hră mơar djăp ênoh čuăn ala tač êngao”.

 Leh sa wưng dôk hriăm, adŭ hriăm anei mâo bi klin gưl hriăm ti akŏ mlan 10. Hŏng boh tŭ dưn jing, jih jang 30 čô hriăm dưi thâo čih hră mơar, lehanăn thâo ba yua hlăm klei mă bruă hlăm internet. H'Tinh, Khua bruă Đảng ƀuôn Ia Lang, jing sa hlăm phung hriăm kdlưn hĭn, năng ai ñu srăng lŏ tui hriăm čiăng mă hră tŭ yap tin học kdlưn hĭn. H'Tinh lač:

"Ƀuôn Ia Lang mâo leh truh 12 čô mnuih hriăm mâo mă leh hră tŭ yap bi leh gưl hriăm, hlăm anăn mâo 5 čô hriăm jing kdlưn hĭn. Anăp anei, sang hră Chi Lăng srăng mjing djăp klei găl čiăng kơ phung hriăm mâo hriăm djăp ênŭm kơ adŭ tin pioh kơ klei čih hră mơar ti hnơ̆ng čuăn prŏng hĭn. Kâo srăng lŏ dơ̆ng mtrŭt mnuih ƀuôn sang bi nao hriăm lu hĭn. Lač jăk kơ knŭk kna mâo leh hdră êlan đru kơ ƀuôn Ia Lang, anôk mnuih ƀuôn sang dôk lu klei dleh dlan, thâo ba yua kdrăp mrâo mrang, djŏ hŏng ênuk ară anei”.

Tui si Hồ Thị Ngọc Huyền, Khua bruă Đảng ƀuôn hgŭm Chi Lăng hlăl ktuh êyuh klei ba yua kdrăp mrô mơ̆ng ala čar dôk ngă. Klei pŏk adŭ hriăm kdrăp mrâo mrang amâo mâo mă prăk ôh, jing leh klei yuôm bhăn êdi, đru mđĭ klei thâo săng hlăm mnuih ƀuôn sang. Mơ̆ng anăn đru mkŏ mjing dhar kreh mrô, yang ƀuôn mrô:

"Hmei tuôm đru leh mnuih ƀuôn sang, boh nik jing mnuih djuê ƀiă, mđĭ kyar dhar kreh mrô. Mơ̆ng anăn, diñu mâo klei thâo săng thâo ba yua internet, ba yua klei mă bruă hlăm online, bruă mdrao mgŭn mrô, hla pŏk yang ƀuôn. Mta kñăm mơ̆ng klei hriăm kdrăp mrâo mrang anei đuĕ nao leh hlăm klei hdĭp yang ƀuôn, anăp truh kơ klei bi mlih mrô tui si hdră êlan mơ̆ng ala čar kñăm mđĭ kyar bruă duh mkra mrô, lehanăn yang ƀuôn mrô, mơ̆ng khua knŭk kna”./.