Lŏ dơ̆ng hdră Klei bi kƀĭn tal 6, aguah anei, Bruă kƀĭn ala bi trông ti anôk bi kƀĭn ksiêm dlăng boh klei hlue ngă ngăn prăk thŭn 2023; Ksiêm dlăng krah wưng hlue ngă hdră bi liê knŭk kna man dưn wưng 2021 – 2025; Hdră kčah ngăn prăk ala čar leh anăn čan, tla nư knŭk kna 5 thŭn wưng 2021 – 2025.

Tlam, phung bi ala bruă kƀĭn ala srăng bi trông kơ anôk bi kƀĭn kơ dŭm boh phŭn adôk mâo klei blŭ mdê mdê hlăm hră čih Hdră bhiăn dŭm êpul bruă brei čan (lŏ mkra mlih). Aguah anei (02/11) Bruă kƀĭn ala ksiêm dlăng kơ klei hlue ngă prăk knŭk kna thŭn 2023, hdră mbŏ ngăn prăk knŭk kna gưl dlông thŭn 2024 hưn mdah kơ boh klei hlue ngă ngăn prăk knŭk kna thŭn 2023, hră mĭn tĭng knŭk kna, hdră mbŏ prăk knŭk kna gưl dlông thŭn 2024, Hdră kčah ngăn prăk - knŭk kna 03 thŭn 2024 - 2026, Khua phŭn bruă ngăn prăk Hồ Đức Phớc brei thâo, prăk hrui wĭt knŭk kna hlue ngă 9 mlan thŭn 2023 mâo 75% hdră mĭn tĭng, ênoh iêo mkrum hlăm prăk knŭk kna mâo hlăm brô 15% GDP. Prăk hrui wĭt knŭk kna kluôm ala đĭ 4,6% mkă hŏng hdră mĭn tĭng. Thŭn 2023, prăk bi liê knŭk kna hlăm brô 4% GDP. Truh knhal jih thŭn 2023, dŭm hnơ̆ng kčah prăk knŭk kna, nư knŭk kna, nư ala tač êngao, bruă tla mơ̆ng Knŭk kna hlăm wang bruă kƀĭn ala dưi brei.