Pô čih klei mrâo Lê Quốc Minh, Khua hlăm bruă Đảng gưl dlông, Khua gĭt gai Êpul hgŭm phung čih klei mrâo Việt Nam, k’iăng khua êpul bruă hâo hưn gưl dlông, Khua êpul čih mkra hră klei mrâo Nhân Nhân brei thâo: Găn grăp wưng mkŏ mjing klei bi lông bruă klei mrâo ala čar, klei năng mơak hĭn jing êwang kpleh plah wah bruă klei mrâo gưl dlông leh anăn alŭ wăl ƀrư̆ ƀrư̆ bi bi hrŏ. Mâo dŭm klei pah mni A kơ bruă klei mrâo alŭ wăl amâodah dŭm anôk bruă klei mrâo điêt. Hnơ̆ng tŭ jăk dŭm klei čih bi lông mâo klei knar hĭn. Mngač hĭn jing anôk bruă klei mrâo alŭ wăl ară anei dih bi liê kơ klei mrâo điện tử hŏng hdră jăk kluôm hĭn. Dŭm sang mđung asăp, mđung rup alŭ wăl ăt dưi čih mkra dŭm klei čih hnơ̆ng tŭ jăk. Bi kơ bruă mđup brei klei pah mni klei bi lông Bruă klei mrâo ala čar tal 18, pô čih klei mrâo Lê Quốc Minh brei thâo:

 “Thŭn anei, knăm mđup brei klei pah mni Bruă klei mâo ala čar dưi mkŏ mjing hŏng hdră mdê hĭn. Hmei mă phung mâo klei pah mni jing mta kñăm. Pô mâo klei pah mni ƀuh klei ktưn hưn kơ klei pah mni diñu mâo. Phung dôk dlăng ăt ƀuh klei ktưn hưn kơ dŭm boh tŭ phung dĭng kna pô dưi mâo leh. Hdră mkŏ mjing mrâo msĕ sơnăn srăng mđĭ ai phung ka tuôm mâo mă klei pah mni leh anăn mđĭ phung mâo mă klei pah mni čiăng drei dưi ƀuh hnơ̆ng tŭ jăk Klei mrâo ala čar năng jing klei pah mni klei mrâo yuôm bhăn hĭn mơ̆ng lăn čar Việt Nam”.

Hluê si pô čih klei mrâo Lê Quốc Minh, Khua gĭt gai Êpul hgŭm phung čih klei mrâo Việt Nam, klei mrâo mrâo mrang čiăng kơ dŭm klei mlih mrâo leh anăn mbruă jêñ jêñ. Hmăng hmưi dŭm anôk bruă klei mrâo srăng ngă tŭ jing klei mlih mrô, mlih mrâo hŏng klei mbruă, mâo hdră čih klei mrâo thơ̆ng kơ bruă leh anăn ƀrư̆ hruê ƀrư̆ kñăm kơ bruă hưn mthâo kơ ala ƀuôn. Hlăm wưng êgao, khădah tuôm hŏng lu klei dleh dlan, klei lông dlăng, ƀiădah Êpul dưi bi leh djăp bruă klam kđi čar mơ̆ng Êpul hgŭm phung čih klei mrâo Việt Nam.

 “Mơ̆ng akŏ wưng ngă bruă truh kơ anei, Đảng đàn, êpul khua bruă, Êpul gĭt gai leh anăn Êpul khua êmua bi sa ai hlăm bruă gĭt gai, ktrâo lač dŭm gưl êpul, bruă knuă mơ̆ng dŭm gưl bruă hlăm kluôm lăn čar mâo lu gru mngač, klei mlih jăk, hmao thâo klă klei čiăng, klei hmăng hmưi mơ̆ng phung čih klei mrâo, kñăm mgaih msir đru bi hơĭt klei mĭn, klei bi mguôp sa ai.

Êpul hgŭm phung čih klei mrâo Việt Nam mâo êbeh 25.000 čô hgŭm dôk ngă bruă ti 307 anôk bruă. Mơ̆ng akŏ wưng ngă bruă truh kơ ară anei, Anôk bruă bi hriăm bruă klei mrâo mơ̆ng Êpul mkŏ mjing leh êbeh 256 adŭ hriăm kơ giăm 9.000 čô čih klei mrâo hlăm lăn čar. Mbĭt anăn brei thâo, dŭm gưl hlăm Êpul mơ̆ng gưl dlông truh kơ alŭ wăl mkŏ mjing leh êbeh 250 êpul gơ̆ng mgaih msir klei soh hŏng knhuah hdĭp phung čih klei mrâo leh anăn dưi ngă bruă dhŏ hdră bhiăn, dưi ƀuah mkra djŏ mmông leh anăn ktang phĭt đa đa klei ngă soh hŏng klei bhiăn lăn čar leh anăn klei bhiăn ngă bruă.

Mrâo anei, hlăm mmông mă bruă hŏng Êpul hgŭm phung čih klei mrâo Việt Nam, Khua êpul bruă hâo hưn gưl dlông Nguyễn Trọng Nghĩa lač klă, hlăm wưng kơ anăp, Đảng đoàn Êpul hgŭm phung čih klei mrâo Việt Nam čiăng kñăm kơ bruă mtô bi hriăm bruă kđĭ čar, klei mĭn čiăng kơ phung čih klei mrâo thâo săng ngă bruă bruă klei mrâo jing bruă cách mạng, pô čih klei mrâo jing lĭng kahan nao êlâo hlăm mặt trận klei mĭn – dhar kreh mơ̆ng Đảng, lŏ dơ̆ng bi lar bruă klam, hluê ngă dŭm bruă klam kđi čar mâo Đảng, knŭk kna leh anăn mnuih ƀuôn sang đăo knang, kčah jao.

Êpul hgŭm phung čih klei mrâo Việt Nam čiăng jing anôk đăo knang, jing anôk knang thơ̆ng kơ bruă, čiăng kơ dŭm anôk bruă klei mrâo lŏ dơ̆ng gĭr, hluê hriăm mlih mrâo pô, klă sĭt jing mbah hâo hưn djŏ, klă hŏng boh sĭt lăn čar, jing êwa hdĭp, mơ̆ng anăn ngă bruă klam tă hdră klei mĭn, mkŏ mjing klei sa ai hlăm yang ƀuôn, rơ̆ng bruă klam jing klei hâo hưn phŭn, đăo knang hŏng mnuih ƀuôn sang. Grăp klei čih klei mrâo jing klei čih mâo knhuah dhar kreh, mtô bi hriăm. Grăp čô čih klei mrâo klă sĭt jing lĭng kahan hlăm mặt trận klei mĭn hŏng ala mngač, ai tiê ênuah, klei čih djŏ, hmar hlăm klei ngă bruă, jhŏng bi kdơ̆ng hŏng dŭm klei ngă soh, dôk kjăp ti anăp dŭm klei lông dlăng.

Ƀri wưng bi hdơr 99 thŭn hruê klei mrâo Cách mạng Việt Nam, Khua êpul bruă hâo hưn gưl dlông Nguyễn Trọng Nghĩa hơêč hmưi kơ Êpul hgŭm phung čih klei mrâo Việt Nam ƀrư̆ hruê ƀrư̆ năng jing êpil bruă kđi čar – yang ƀuôn – bruă knuă yuôm bhăn mơ̆ng lăn čar, jing sang dôk mbĭt, bi kƀĭn, bi mguôp kluôm êlam mơ̆ng phung čih klei mrâo kluôm ala.