Mlan 2/2023, Lĭng kahan răng mgang knông lăn čar Cao Bằng bi rai leh boh klei CB223p hŏng klei soh tlĕ čhĭ mnuih, jing sa čô hđeh ka bŏ mlan. Êpul djŏ tuôm mă kơ̆ng leh Lê Thị Lỹ Lệ lehanăn Phạm Thành Sinh, dôk ti kdriêk Krông Pač, čar Dak Lak. Phung anei mâo mă hlăk dôk ktuê êlan ba hđeh anei găn knông lăn hlăm alŭ Tềnh Quốc, să Cần Công, kdriêk Hà Quảng. Mlan 7/2023, kahan ksiêm čar Cao Bằng lŏ bi rai boh klei mrô 623M, dŏng mtlaih phung arăng tlĕ čhĭ jing 2 čô mniê mơ̆ng Myanmar ba wĭt ti Việt Nam.

Lač kơ klei tlĕ čhĭ mnuih tuôm mâo leh ti alŭ wăl, amai Hứa Thị Thạch, Khua Êpul bruă mniê să Cần Nông, wăl krah Thông Nông, kdriêk Hà Quảng, čar Cao Bằng brei thâo:

Să Cần Nông jing să knông lăn. Klei tlĕ čhĭ mnuih găn knông lăn ti alŭ wăl, boh nik hlăm dŭm thŭn êgao mâo leh 1,2 boh klei ti să. Klei mrâo hĭn jing mlan 2 thŭn 2023, sa čô hđeh êkei mrâo kkiêng 16 hruê mâo phung tlĕ čhĭ mđing dlăng lehanăn mâo klei mĭn čiăng ba čhĭ ti China ƀiădah mâo êpul djŏ tuôm hmao ƀuh ti gơ̆ng knăl 614 să Cần Nông. Leh anôk bruă djŏ tuôm hmao ƀuh, mă kơ̆ng; kâo jing Khua Êpul bruă mniê leh hmư̆ klei anei kâo nao đru kriê dlăng mtam hđeh anei ti kđông kahan răng mgang knông lăn lehanăn mtrŭt mjhar dŭm gŏ sang mâo anak điêt bi đru hnun, êa ksâo, mtrŭt keh đru prăk hriăm hră mơ̆ng kdriêk đru 2 êklăk prăk blei êa ksâo kơ ĕ điêt anei, leh kơnăn kâo ba jao hđeh anei kơ Anôk bruă đru dlăng ba yang ƀuôn mơ̆ng čar lŏ dlăng kriê, rông ba gơ̆.

Čiăng gang mkhư̆ phung soh huĭ hyưt anei, êngao kơ klei ngă bruă ktang mơ̆ng anôk bruă djŏ tuôm msĕ si Kahan ksiêm, Kahan răng mgang knông kăn, hlăm bruă hluê ngă dŭm mta hlăm Hdră bruă 8 “Hluê ngă klei mtăp mđơr êkei mniê lehanăn msir mghaih dŭm boh klei mjêč hŏng phung mniê lehanăn phung hđeh”, Êpul bruă mniê čar Cao Bằng mâo leh lu gru hmô mtô mblang mrâo lehanăn tŭ dưn. Hứa Thị Thạch, Khua Êpul bruă mniê să Cần Nông brei thâo:

Hlăm klei thâo săng mơ̆ng mnuih ƀuôn sang tinei, klei čhĭ anak pô čiăng nao ti ala čar nah dih knông lăn bi hiu mă bruă mưn, dôk ung ala tač êngao… dôk mâo. Hmei mtô mblang ti alŭ wăl, mtô mblang kơ mnuih ƀuôn sang, phung mâo klei mĭn čiăng čhĭ mnuih, hmei kreh mblang klă nik kơ dŭm bruă ngă soh hlăk hiu čhĭ mnuih mbĭt anăn ăt mđĭ klei thâo săng, klei đua klam mơ̆ng êpul êya hlăm bruă kčŭt hưn phung ngă soh hlăk pô jing mnuih ƀuôn sang krĭng knông lăn, ƀuh mnuih krĭng mkăn hriê brei nao hưn mtam hŏng anôk bruă sang čư̆ êa alŭ wăl, anôk bruă djŏ tuôm pral nao msir mghaih.

Hluê si amai Hoàng Trang Định, Khua Êpul bruă mniê wăl krah Thông Nông, kdriêk Hà Quảng, hŏng bruă klam jing mnuih kăp mtô mblang, mtrŭt mjhar lehanăn đru kơ phung mniê, phung hđeh arăng tlĕ čhĭ lŏ wĭt ñŭ kma hŏng êpul êya, grăp čô jing mnuih mă bruă mtô mblang ti gưl nah gŭ. Klei anei srăng đru kơ hdră mtô mblang, mtrŭt mjhar ti gưl nah gŭ dưi pŏk mlar hĭn truh kơ êpul phung mniê dôk čiăng klei đru. 

Kơ hdră mtô mblang, gang mkhư̆ klei tlĕ chŏ mnuih hlăm wưng êgao mâo leh bruă đảng, sang čư̆ êa mđing dlăng. Hlăm dŭm thŭn êlâo, ăt mâo sa čô hgŭm arăng tlĕ čhĭ ti China. Leh wĭt ti alŭ wăl, pô anei huĭ ñŭt, êdei anei mâo leh êpul, dŭm gưl bruă mđing mjing djăp klei găl lehanăn thâo klă klei čiăng, blŭ hrăm lehanăn mđĭ ai, amai anei amâo lŏ ñŭt, jhŏng hĭn, ƀrư̆ ñŭ kma hŏng êpul êya, nao hgŭm hlăm dŭm êpul bruă ti alŭ wăl.

Hlăm wưng êgao, Êpul bruă mniê čar Cao Bằng dlăng myuôm bruă mtô mblang, gang mkhư̆ klei tlĕ čhĭ mnuih jing sa hlăm dŭm mta phŭn hlăm bruă hluê ngă klei mtăp mđơr êkei mniê lehanăn msir mghaih dŭm bruă djŏ tuôm kơ phung mniê lehanăn phung hđeh ti čar. Hluê si Nông Thị Tuyết, Khua êpul bruă mniê čar Cao Bằng, čiăng hluê ngă tŭ dưn hlăm mta klei lăm Hdră bruă 8, boh nik hdră mtô mblang, gang mkhư̆ klei tlĕ čhĭ mnuih brei mâo hdră ngă mrâo mđing truh kơ mta kñăm mđĭ boh tŭ dưn hdră gang mkhư̆, bi kdơ̆ng hŏng klei tlĕ čhĭ phung mniê, phung hđeh; mđĭ klei thâo săng kơ mnuih hgŭm hlăm êpul, kñăm lăm lui klei bi kah êkei mniê, klei bi čăm biêng hlăm gŏ sang, klei tlĕ čhĭ phung mniê, phung hđeh.

Ăt hluê si Khua êpul bruă mniê čar Cao Bằng, hlăm wưng êgao, Êpul gĭt gai mkŏ mjing leh hdră mtô mblang mñă klă kơ klei huĭ hyưt, mnêč jhat, klei truh mơ̆ng klei čhĭ mnuih, klei kčah mtrŭn mơ̆ng hdră bhiăn bi kmhal phung čhĭ mnuih lehanăn hdră msir mghaih klei tlĕ čhĭ phung mniê, phung hđeh hlăm dŭm alŭ wăl, dŭm hdră mtrŭn hŏng êpul bruă mniê dŭm gưl hlăm hdră đru răng mgang phung arăng tlĕ čhĭ lŏ wĭt ñŭ kma hŏng yang ƀuôn…

Dŭm gru hmô mtô mblang ti Cao Bằng brei ƀuh leh klei mlih mrâo mơ̆ng dŭm gưl, bruă đua klam mơ̆ng phung knuă druh, phung mniê, êpul mtô mblang hlăm êpul êya hlăm hdră gang mkhư̆, bi kdơ̆ng hŏng klei tlĕ čhĭ mnuih, hgŭm kngan mkŏ mjing sa wăl anôk êđăp ênang kơ phung mniê, phung hđeh mniê./.