Mrâo ngă leh hră m’ar hŏng klei sa ƀăng bhă ti Anôk bruă sang čư̆ êa să Êa Tiêu, kdriêk Čư̆ Kuiñ, čar Dak Lak, ayŏng Trần Vũ Hải Đăng brei thâo, ayŏng knŏng luič 30 mnĭt ngă hră m’ar tinei:

“Hruê anei kâo truh ti să Êa Tiêu ngă hră m’ar bi mklă pô asei hliê, snăn kâo ƀuh phung knuă druh, mnuih mă bruă tinei đru jăk êdi, ktrâo lač klă klơ̆ng čih klei hâo hưn, msir mghaih pral čiăng kơ mnuih ƀuôn sang amâo luič lu hruê mmông ôh tơdah hriê ngă hră m’ar”.

          Hluê si ênoh hưn mơ̆ng Anôk bruă sang čư̆ êa kdriêk Čư̆ Kuiñ, grăp thŭn, grăp să ti al wăl mâo mơ̆ng 13 êbâo truh kơ 16 êbâo čô nao ngă hră m’ar. Kñăm mjing klei găl kơ êpul, mnuih nao ngă hră m’ar, dŭm să mƀlir leh Hdruôm hră ngă hră m’ar knŭk kna djŏ hŏng klei dưi msir mghaih ti jhưng ngă bruă mơ̆ng anôk bruă lehanăn hưn mthâo hlăm hla pŏk web điện tử mơ̆ng să; kah mbha mnuih mă bruă lehanăn phung khua să ngă bruă ti Anôk bruă tŭ mă lehanăn wĭt lač klei ngă hră m’ar. Dŭm să ăt ba yua gru hmô “Kreh dhar ngă bruă” mguôp hŏng “Hruê tal 5 mnuih ƀuôn sang amâo čih, anôk bruă amâo kčah” ba wĭt leh boh tŭ klă sĭt. Nguyễn Kim May, K’iăng khua bruă Đảng, Khua Anôk bruă sang čư̆ êa să Êa Ktur, kdriêk Čư̆ Kuiñ brei thâo

“Hmei mkŏ dưm leh kdrăp camera ksiêm dlăng mnuih mă bruă ti anôk ngă bruă sang ƀăng bhă ăt msĕ mơh thâo klei mnuih ƀuôn sang hriê ngă hră m’ar, mơ̆ng anăn mđĭ klei đua klam mơ̆ng phung knuă druh mă bruă ti anôk bruă. Dŭm hdră msir mghaih klei ngă hră m’ar hmei ngă pral, mjing klei găl jăk hĭn, rơ̆ng kơ mnuih ƀuôn sang hlăm bruă ngă hră m’ar, anăn jing hruê mmông hmei bi hrŏ hruê bi kčah, mjing klei găl kơ mnuih ƀuôn sang snăn hmei ăt hnêč msir mghaih…”

Võ Tấn Huy, Khua anôk bruă sang čư̆ êa kdriêk Čư̆ Kuiñ brei thâo, čiăng mkŏ mjing anôk bruă ngă hră m’ar thâo, tŭ dưn, Anôk bruă sang čư̆ êa kdriêk ba mdah leh hdră kčah bruă mkra mlih klei ngă hră m’ar knŭk kna hlăm grăp thŭn. Grăp gưl, Anôk bruă sang čư̆ êa kdriêk mkŏ mjing leh hdră ksiêm dlăng, jao bruă djŏ tuôm kơ hdră mkra mlih klei ngă hră m’ar kñăm ksiêm kjăp hdră mtrŭn, hdră kčah, tĭng dlăng boh tŭ dưi mâo, dŭm klei êdu kƀah čiăng ba mdah hdră msir, bruă klam djŏ guôp hlăm wưng ti anăp. Mbĭt anăn, kdriêk ăt pŏk ngă klei ƀuăn rơ̆ng hluê ngă bruă klam hŏng Khua anôk bruă sang čư̆ êa dŭm să ti alŭ wăl. Kdriêk ăt čih mkra hdră ba yua êlan hla pŏk web yang ƀuôn Zalo čiăng mâo klei bi mjĕ plah wah mnuih ƀuôn sang hŏng anôk bruă sang čư̆ êa kdriêk… Võ Tấn Huy brei thâo:

Sa hlăm dŭm bruă mâo kdriêk mđing jing mkra mlih klei ngă hră m’ar, mkra mlih hdră duh bi liê dŭm kdrăp mnơ̆ng mơ̆ng kdriêk truh kơ sa hŏng klei jăk găl, mrâo mrang kơ mnuih ƀuôn sang. Mbĭt anăn bi hgŭm hŏng Anôk bruă hâo hưn êlan kbưi čiăng mkăp tur knơ̆ng hluê ngă hdră anei hlăm đĭng blŭ djă hiu. Kdriêk ăt gĭt gai hlăm bruă hluê ngă hdră đru kơ mnuih mă bruă, mkŏ mjing êpul knuă druh mâo klei thâo, mâo klei đua klam hlăm hdră mă bruă, hluê hŏng bruă mkra mlih klei ngă hră m’ar snăn bruă klam tur knơ̆ng jing mđing truh kơ bruă knŭk kna điện tử, knŭk kna mrô, čiăng hluê ngă jăk bruă anei anăn jing hdră mlih mrô.

Hlăm wưng êgao, hdră mkra mlih klei ngă hră m’ar knŭk kna čar Dak Lak dưi pŏk ngă kluôm dhuôm hlăm 6 mta bruă mơ̆ng hdră mkra mlih klei ngă hră m’ar knŭk kna kluôm wưng thŭn 2021-2030 mơ̆ng Knŭk kna. Čar mâo leh lu hdră mlih mrâo hlăm bruă kiă kriê, gĭt gai čiăng mđĭ klei sa ai hlăm mnuih ƀuôn sang, anôk bruă duh mkra. Boh nik, mtrŭt mđĭ bruă hluê ngă hră m’ar knŭk kna hnơ̆ng 3, hnơ̆ng 4. Hlăm thŭn 2022, čar Dak Lak đĭ leh 32 mrô bi mklă klei sa ai mơ̆ng mnuih ƀuôn sang, dôk tal 27 mơ̆ng kluôm ala. Čiăng kơ bruă mkra mlih klei ngă hră m’ar ba wĭt boh tŭ dưn hlăm wưng ti anăp. Nguyễn Tuấn Hà, K’iăng khua Anôk bruă sang čư̆ êa čar Dak Lak brei thâo:

“Êpul knuă druh, boh nik phung khua kiă kriê brei pral kdal, msir mghaih bruă mâo. Tal 2 jing mnuih hgŭm hlăm Anôk bruă kiă kriê brei mđĭ hdră ksiêm dlăng bruă mkra mlih klei ngă hră m’ar, msir mghaih klei ngă hră m’ar, hluê ngă djŏ klei bhiăn, msir mghaih klei adôk mâo, klei êdu kƀah. Tal 3 lŏ dơ̆ng ksiêm dlăng čiăng bi hrŏ, bi ênưih klei ngă hră m’ar, mlih mrâo hlăm bruă hluê ngă klei bhiăn sa ƀăng bhă hlăm bruă msir mghaih klei ngă hră m’ar kñăm mđĭ hnơ̆ng tŭ hdră mă bruă”.

Hŏng bruă pŏk ngă mđrăm mbĭt dŭm hdră msir mbĭr hŏng hdră ngă mrâo, bruă mkra mlih klei ngă hră m’ar knŭk kna ti alŭ wăl Dak Lak mâo leh dŭm knhuang đĭ năng čih yap, mơ̆ng anăn mjing klei găl, klei sa ai mơ̆ng dŭm êpul, mnuih tơdah nao ngă hră m’ar, đru mkŏ mjing anôk bruă ngă hră m’ar tŭ dưn, mrâo mrang, djŏ hŏng klei čiăng, bruă klam hlăm boh klei mrâo./.