Ti ƀuôn Kđoh, să čư̆ Pơ̆ng, čar Dak Lak, bruă hâo hưn kơ hruê ruah khua dưi ngă mơ̆ng mlan 11 thŭn êlâo. Mbĭt hŏng yuôl ƀăng rông, áp phích ti dŭm bĭt êlan dơ̆ng, ngă klei mđung asăp, Bruă sang čư̆ êa alŭ wăl lŏ mtrŭt mđĭ bruă hâo hưn hŏng klei kƀĭn ƀuôn, klei kƀĭn hlăk mblang hdră bhiăn. Mbĭt anăn mđung klei hưn, hră mơar hâo hưn hlăm mbah hla pŏk yang ƀuôn leh anăn mbah hâo hưn anôk bruă čiăng hmao hưn kơ mnuih ƀuôn sang.

Y Hoh Niê, khua êpul bruă mặt trận ƀuôn Kđoh brei thâo, mta phŭn hâo hưn kñăm mtô kơ phung mplĕ hră ngă klei dưi ruah khua djŏ klei čuăn, ruah phung mâo kơhưm, phung thâo čiăng bi ala kơ mnuih ƀuôn sang.

“Mblang kơ mnuih ƀuôn sang săng leh anăn nao mplĕ hră čiăng ruah phung bi ala mâo kơhưm bi ala kơ mnuih ƀuôn sang, mă bruă mâo bruă klam čiăng ba wĭt boh tŭ dưn leh anăn đru kơ mnuih ƀuôn sang mâo klei hdĭp jăk hĭn. Hmei srăng lŏ ngă klei gĭt gai mơ̆ng gưl dlông leh anăn mtô mblang kơ mnuih ƀuôn sang ngă djŏ, čiăng kơ klei ruah khua mkŏ mjing tŭ dưn”.

Hŏng bruă hâo hưn, dŭm klei hưn kơ klei ruah khua ăt dưi hưn klă, phung mplĕ hră ăt mâo klei hmăng hmưi phung bi ala dưi ruah, srăng jing phung mâo djăp klei čuăn hluê si hdră bhiăn, mbĭt anăn thâo kơ hdră bhiăn djuê ana, jĕ giăm hŏng mnuih ƀuôn sang leh anăn dưi bi êdah klei blŭ ƀuôn sang pô. Amĭ Lip, ti ƀuon Ea Klok, să Čư̆ Pơ̆ng brei thâo:

“Kâo čiăng phung djŏ ruah ti anăp jing phung mâo klei thâo mĭn,m mâo klei thâo, uêñ mĭn kơ mnuih ƀuôn sang, amâo mâo bi kah mdrŏng, ƀun. Jĕ giăm hŏng mnuih ƀuôn sang, thâo kơ klei bhiăn djuê ana, thâo săng kơ mnuih ƀuôn sang, dưi bi êdah klei blŭ mnuih ƀuôn sang pô”.

Hluê si dhar bruă ruah khua čar Dak lak, truh kơ ară anei, klei kƀĭn tal 1 bi tŭ ư 28 čô dưi mhưn mdah gơ̆ng asei čiăng ruah 15 čô bi ala Bruă Kbĭn ala gưl 16, hlăm anăn mâo 5 čô mnuih djuê ƀiă, 9 čô mniê leh anăn 1 čô mda asei. Hŏng phung bi ala Êpul gơ̆ng bruă ƀuôn sang čar, hră anăn mâo 148 čô čiăng ruah mă 84 čô. Ti gưl să, kluôm čar mĭn tĭng ruah 2.445 čô bi ala Êpul gơ̆ng bruă ƀuôn sang.

Ti nah gŭ, klei čuăn kơ phung bi ala, boh nik jing phung mniê leh anăn mnuih djuê ƀiă dưi lač klă hlăm klei bi kƀĭn. H’ Hương B.Krông, khua dhar bruă mặt trận ƀuôn hgŭm Ea Kao, čar Dak Lak lač: 

“Bruă klam phŭn mơ̆ng phung mniê ƀrư̆ hruê ƀrư̆ dưi bi klă, srăng bi ala kơ klei blŭ mnuih ƀuôn sang pô, lač kơ klei čiăng, klei hmăng hmưi mnuih ƀuôn sang, boh nik jing phung mniê. Sơnăn phung mniê, mnuih djuê ƀiă jing sa hdră bi kƀĭn djŏ guôp, rơ̆ng kơ klei dưi mơ̆ng phung anei hlăm klei mgơ̆ng ruah. Klei anei dưi bi êdah jing boh tŭ dưn ƀiădah ăt jing bruă klam ktrŏ hŏng grăp čô dưi hưn mdah mgơ̆ng ruah”.

Hlăm wưng mâo klei bi mlih leh mkŏ dăp, bruă mprăp kơ klei ruah khua ti čar Dak Lak dưi bi klă jing bruă klam kđi čar phŭn, čiăng kơ klei čŏng pô leh anăn bi mguôp kjăp plah wah dŭm gưl bruă, dhar bruă. Bruă ksiêm dlăng, mkra mlih, ênoh mnuih mgơ̆ng ruah dưi ngă jăk, djŏ hdră bhiăn, mjing tur knơ̆ng kơ dŭm klei bi kƀĭn kơ anăp.

Hluê si Cao Thị Hòa An, k’iăng khua bruă Đảng čar, khua Êpul gơ̆ng bruă ƀuôn sang čar, khua dhar bruă ruah khua čar Dak Lak, dŭm mta bruă mprăp dưi ngă hrăm mbĭt, rơ̆ng kơ klei čuăn phung bi ala.

“Dŭm mta bruă truh kơ mnĭt mmông anei dhar bruă ruah khua ăt mâo klei bi mguôp leh anăn čŏng pô bi leh jăk leh anăn êlâo kơ hdră kčah. Hlăm wưng kơ anăp srăng lŏ dơ̆ng dŭm mta bruă rơ̆ng djŏ hdră bhiăn, leh anăn ênoh čuăn phung bi ala djŏ hŏng klei čuăn”.

Rơ̆ng mâo phung bi ala jing mnuih djuê ƀiă leh anăn phung mniê hlăm klei ruah khua amâo djŏ knŏng jing bi mâo djăp klei čuăn hdră bhiăn, ƀiădah lŏ bi kjăp klei đăo knang mơ̆ng mnuih ƀuôn sang. Hŏng boh sĭt mnuih ƀuôn sang msĕ si čar Dak Lak, bruă rơ̆ng kơ klei ruah khua srăng mkŏ mjing klei găl bi lar bruă klam bi ala mơ̆ng dŭm anôk bruă mnuih ƀuôn sang ruah, mkŏ mjing klei sa ai, bi tŭ ư hlăm dŭm gưl mnuih ƀuôn sang.