Gŏ sang amai Vũ Thị Thúy ti alŭ Ea Bring, să Băng Adrênh, kdriêk Krông Ana tuôm hŏng lu klei dleh dlan. Ung ñu khăng ruă duam, ñu amâo mâo bruă hơĭt, anăn klei dhĭp bŏ hŏng klei kƀah. Thŭn 2021, gŏ sang amai Thúy mâo Knơ̆ng bruă mặt trận kdriêk Krông Ana đru 50 êklăk prăk čiăng mkŏ mjing sang bi đru. Mbĭt hŏng ênoh ptăk čan, klei đru kơ hruê ai mă bruă mơ̆ng phung ƀuôn sang, boh sang gưl 4 mâo ênoh êbeh 100 êklăk prăk dưi bi leh. Leh mâo sang dôk kjăp amai Thúy čan thiăm prăk brei čan mơ̆ng knơ̆ng prăk đru ba ala ƀuôn čiăng bi liê blei kdrăp mkra mjing, ana mjeh, êđai mjeh pŏk mlar rông mnơ̆ng.

“Ung mô̆ čiăng rŭ mdơ̆ng sang dôk ƀiădah gŏ sang dleh dlan snăk. Mâo bruă mặt trận, êpul đru gŏ sang kâo mâo sa ênoh prăk čiăng mdơ̆ng sang prŏng siam, leh anăn kâo ăt mâo klei đru mơ̆ng êpul hgŭm phung mniê dŭm mta prăk pioh rông mnơ̆ng. Kâo akâo tlaih ƀun čiăng đru kơ gŏ sang mkăn kyua kâo mâo leh klei đru lu snăk, lač jăk lu.”

 Lãnh Như Biểu ti Ƀuôn Ea Pri, să Ea Wer, kdriêk Ƀuôn Đon ăt jing sa čô dưi hơĭt anôk dôk hlăm sang bi đru leh lu thŭn dleh dlan. Boh nik leh klei grăm đah, klei suaih pral hroh, boh sang bi đru kjăp, mđao ƀrư̆ jing yuôm bhăn hŏng ñu:

“Êlâo dih sang điêt, tĭ rưč kyua klei dleh dlan amâo dưi ngă pưk sang anăn adiê hjan ñu ƀrôč, ară anei bruă mặt trận đru ngă sang snăn kâo mni lač jăk kơ bruă mặ trận.”

Mai Tri Phúc, K’iăng Khua bruă mặt trận čar kwar kdriêk Ƀuôn Đon brei thâo, alŭ wăl mâo 18 djuê ana hdĭp mda, hlăm anăn mnuih djuê ƀiă mâo êbeh 47%. Bruă duh mkra mơ̆ng kdriêk lu jing bruă lŏ hma, ƀiădah kyua yan adiê amâo găl jăk, lăn ala amâo jing anăn klei hdĭp mnuih ƀuôn sang mâo lu klei dleh dlan, gŏ êsei ƀun mâo lu, ênoh gŏ êsei ƀun mâo lu, ênoh gŏ êsei ka mâo sang kjăp ăt lu mơh. Hlăm dŭm thŭn êgao, Knơ̆ng bruă mặt trận kdriêk Buôn Đon mđĭ bruă hâo hưn mtô mblang ciăng hnêč iêô jak klei đru mơ̆ng kluôm ala ƀuôn kñăm đru kơ phung dleh dlan hlăm kdriêk mâo thiăm boh sang prŏng siam:

“Lu mnuih ƀuôn sang ăt ƀun mơh, anăn bruă mkra mđĭ sang tĭ snăn dleh snăk, ênoh prăk amâo djăp. Grăp thŭn hmei ăt ƀri mlan 11 jing mlan ngă bruă kyua phung ƀun čiăng mâo hdră mđĭ klei hâo hưn leh anăn mtrŭt mjhar jih bruă kđi čar čiăng mâo prăk hrui mă lu hĭn.”

Kyua klei hgŭm mơ̆ng dŭm gưl mnuih ƀuôn sang leh anăn êpul êya duh mkra, mơ̆ng thŭn 2021 truh ară anei čar Dak Lak iêô mkrum leh giăm 60 êklai prăk. Mbĭt hŏng êbeh 7 êklai prăk mơ̆ng keh “kyua mnuih ƀun” mâo Gưl dlông leh anăn dŭm čar mkăn đru kơ Dak Lak, mâo leh 1.138 boh sang bi hgŭm dưi mkŏ mjing leh anăn mkra mđĭ; 173 gŏ sang dưi đru prăk blei kdrăp mnơ̆ng, ana mjeh, mnơ̆ng rông. Kyua anăn, wưng 2021-2023 ênoh gŏ êsei ƀun ti čar Dak Lak hrŏ leh kah knar 1,64-1,81% thŭn, hlăm anăn ênoh gŏ êsei ƀun hlăm krĭng mnuih djuê ƀiă hrŏ kah knar 3,33%-3,66%.  Y Giang Gry Niê Knơng, Khua Knơ̆ng bruă mặt trận čar Dak Lak brei thâo:

 “Klei gĭt gai mơ̆ng bruă Đảng dŭm gưl leh anăn êpul bruă đảng, boh nik klei bi hgŭm mơ̆ng knŭk kna leh anăn klei hrăm mbĭt mơ̆ng jih jang yang ƀuôn mkŏ mjing sang bi hgŭm kơ mnuih ƀuôn sang. Boh sang mrâo jing yuôm bhăn hŏng dŭm gŏ êsei ƀun, mjing boh kdrŭt kơ diñu hlăm klei mđĭ kyar bruă duh mkra êdei anei, tal dua jing brei mnuih ƀuôn sang ƀuh hdră êlan mơ̆ng knŭk kna hlăm bruă msir klei ư̆ êpa bi hrŏ klei ƀun ƀin, mbĭt hŏng bruă ngă mơ̆ng Knŭk kna snăn čar Dak Lak ăt pŏk ngă hdră rŭ mdơ̆ng sang kơ phung ƀun hlăm wưng kơ anăp.”

 Dŭm boh sang “Bi đru” hơuh mđao klei khăp dưi bi leh kơ dŭm gŏ êsei ƀun ti Dak lak jing mnơ̆ng yuôm bhăn mơ̆ng dŭm gưl knŭk kna leh anăn klei hrăm mbĭt mơ̆ng jih êpul êya kơ gŏ êsei dleh dlan kơ sang dôk. Anăn jing klei mđĭ ai prŏng, ba klei mơak, đru kơ gŏ êsei ƀun hơĭt ai tiê mă bruă, mkra mjing, mđĭ kyar bruă duh mkra, gŏ sang, gĭr ktưn tlaih ƀun kjăp./.