Tui si knơ̆ng bruă pui kmlă čar Daklak, hlăm dŭm mlan akŏ thŭn 2024 klei čiăng ba yua pui hlăm čar đĭ hĭn hŏng dŭm thŭn êlâo. Boh nik, hlăm mlan 2 klei čiăng yua pui đĭ 30% mkă hŏng thŭn 2023. Hlăm dŭm hrue akŏ mlan 3 klei lŏ yua thiăm ti hnơ̆ng 510MW lehanăn anăp truh ti hnơ̆ng dklưn hĭn jing 550 MW hlăm dŭm hrue tinăp. Tĭng êlâo kơ klei anei, mơ̆ng akŏ yan bhang leh mtam, knơ̆ng bruă kiă kriê leh djăp êpul êya ksiêm nanao, lehanăn mghaih msir bi pral ti anôk yua pui êgao hnơ̆ng, êgao hnơ̆ng ti anôk mđĭ mtrŭn pui, aptomat mtrŭn pui… pioh kơ bruă bi êran pui hŏng klei êđăp ênang, ksiêm jih jang êlan klei pui kmlă, anôk mđĭ mtrŭn pui, boh nik jih jang kdrăp dôk ba yua ară anei čiăng pral thâo ƀuh lehanăn mghaih msir mtam.   Mbĭt hŏng anăn, knơ̆ng bruă lŏ mđĭ, bruă mkra wĭt êlan klei pui anôk leh mtrŭn rơ̆ng dưi bi êran pui hŏng klei jăk, amâo lĕ hlăm klei êgao hnơ̆ng ti ađa đa anôk mđĭ mtrŭn pui.

Trần Tấn Phùng, K’iăng khua knơ̆ng bruă pui kmlă Daklak, lač: anôk bruă mkăp leh jih jang bruă kñăm mghaih msir dŭm klei amâo mâo jăk truh, huĭdah klei yua pui đĭ hĭn đei, čiăng mâo mtam hdră êlan mghaih msir, rơ̆ng mkăp hơĭt pui kơ bruă duh mkra lehanăn hdĭp mda:

 “Mkŏ mjing hdră mkăp pui pioh kăp mdrơ̆ng hŏng klei pui êran êgao hnơ̆ng, lehanăn huĭ mâo klei amâo mâo jăk truh, lehanăn knơ̆ng bruă srăng mkra wĭt jêñ jêñ êlan klei pui kmlă kơ mnuih yua pui, duh tal êlâo leh mâo knơ̆ng bruă sang čư̆ êa bi mklă ba yua msĕ si ti sang êa drao, dŭm anôk bruă knŭk kna lehanăn dŭm anôk pom êa”./.