Klei hưn mdah hlăm knăm mtrŭt mjhar brei ƀuh 3 thŭn êgao, bruă mặt trận dŭm gưl čar Dak Lak dưi iêo mkrum giăm 60 êklai prăk, đru kơ phung ƀun ƀin hluê si klei čuăn leh anăn rŭ mjing 925 sang bi mguôp. Hŏng akŏ “Êklăk ai tiê thâo khăp, êbâo boh sang bi mguôp” Knăm mtrŭt mjhar sa ai hŏng Mlan kyua phung ƀun ƀin thŭn 2023 ti čar Dak Lak jing bruă yuôm bhăn bi êdah ai tiê hla hrông guôm hla tĭ, bi mni kơ dŭm bruă hră mbĭt kyua phung ƀun ƀin.

Hlăm knăm mtrŭt mjhar, êpul mkŏ mjing mâo hră mơĭt leh anăn iêo mthưr dŭm êpul êya, grăp čô, knơ̆ng bruă, phung mâo ai tiê kmah nao hgŭm mkrum mguôp čiăng mđĭ kyar keh prăk, mkŏ mjing klei găl lŏ dơ̆ng đru kơ phung ƀun ƀin. Pô bi ala Dhar bruă mặt trận dŭm gưl hlăm čar ăt bi klă ênoh ngăn prăk ƀuăn mguôp hlăm keh. Bi ruê̆ knăm mtrŭt mjhar, êpul mkŏ mjing tŭ mă 13 êklai 600 êklăk prăk mơ̆ng dŭm êpul êya, anôk bruă đru leh anăn ƀuăn đru hlăm keh prăk kyua phung ƀun ƀin čar.