Hluê si Knơ̆ng bruă kiă kriê bruă knuă čar Dak Nông, thŭn hriăm 2023 – 2024, kluôm čar kƀah 1021 čô nai mtô, hlăm anăn nai mtô hđeh điêt kƀah 235 čô, nai mtô gưl 1 kƀah 324 čô, nai mtô gưl 2 kƀah 260 čô leh anăn gưl 3 kƀah 202 čô. Klei kƀah nai mtô hmăi lu sơnăk kơ bruă mtô leh anăn hriăm, boh nik ti dŭm krĭng taih kbưi, krĭng mnuih djuê ƀiă.

Čiăng mgaih msir boh klei anei, bruă sang čư êa čar Dak Nông mrâo hưn mdah hŏng Êpul gơ̆ng bruă ƀuôn sang čar ksiêm dlăng bi klă 622 klei kuôl kă nai mtô, mmông bi klă jing 12 mlan. Aduôn Nguyễn Thị Thu Hường, khua kiă kriê Knơ̆ng bruă kiă kriê bruă knuă čar Dak Nông brei thâo, khădah kƀah êbeh 1000 čô nai mtô ƀiădah knŏng dưi kcĕ bi klă 622 klei kuôl kă jing hlê ngă hdră mtrŭn mrô 111 thŭn 2022 mơ̆ng knŭk kna. Bi kơ wưng sui, čar srăng lŏ dơ̆ng hưn mdah hŏng gưl dlông čiăng bi mbŏ phung nai mtô kơ bruă mtô bi hriăm ti alŭ wăl, rơ̆ng djăp ênoh hluê si klei čuăn.