Ară anei, êpul kiă kriê klei bi lông jih gưl 3 thŭn 2024 čar Daklak mâo mkŏ mjing leh 5 êpul hŏng 20 čô ngă bruă, hlăk dôk ksiêm kơ jih bruă mprăp kơ klei bi lông, mơ̆ng êpul kiă kriê klei bi lông gĭt gai leh dŭm kdriêk lehanăn 33 anôk bi lông hlăm čar. Êpul ksiêm dlăng tŭ mă dŭm klei blŭ, klei akâo mơ̆ng alŭ wăl, mơ̆ng sang hră anôk mkŏ mjing klei bi lông thâo kơ dŭm klei dleh dlan dôk găn čiăng mâo hdră đru mghaih msir hĕ, wĭt lač jih hdră bi kdơ̆ng hŏng klei ngă soh hlăm klei bi lông, rơ̆ng kơ klei êđăp ênang sĭt hlăm klei bi lông, djŏ hŏng klei bhiăn.

Tui si Phạm Đăng Khoa, Khua knơ̆ng bruă sang hră mơar čar Daklak, mơ̆ng klei ksiêm dlăng brei ƀuh, djăp êpul êya bruă mâo ngă leh hŏng klei jăk jih jang bruă, mâo klei đua klam, ngă leh jih bruă djŏ hŏng klei kčah jao./.