Hjăn hlăm thŭn 2025, čar ktưn čiăng tiŏ nao mâo 2.500 čô mnuih nao mă bruă kơ ala tač êngao, đĭ êgao kơ mkrah mkă hŏng thŭn dih. Čiăng dưi bi leh hŏng ênoh čuăn,   Đắk Lắk mâo gĭt gai leh anôk ngă hră mơar, bi hgŭm hŏng phung duh mkra mâo bruă tiŏ nao mnuih nao mă bruă kơ ala tač êngao, mkŏ mjing klei hâo hưn, kčĕ đru ti dŭm boh ƀuôn alŭ hlăm čar. Lehanăn čar, lŏ mâo klei kuôl kă klei bi hgŭm hŏng knơ̆ng bruă kiă kriê kahan čar kăp kčĕ đru kơ lĭng kahan dơ̆ng jih leh thŭn dôk hlăm kahan.

Nguyễn Quang Thuân, K’iăng khua knơ̆ng bruă kiă kriê bruă knuă čar Daklak brei thâo, čar hlăk dôk ngă tŭ jing dŭm hdră êlan đru mnuih mă bruă hriăm bruă, lehanăn nao mă bruă kơ ala tač êngao, boh nik hŏng mnuih djuê ƀiă, mâo đru mơ̆ng 12 - 16 êklăk prăk grăp čô pioh hriăm bruă, hriăm klei blŭ, lehanăn ngă hră mơar mkăp visa:

 “Anei jing sa klei găl prŏng pioh đru mnuih duah bruă, boh nik hŏng mnuih djuê ƀiă. Klei anei hmei ăt gĭt gai leh dŭm anôk mtô bi hriăm bruă, sang hră mjuăt bi hriăm nanao hlăm čar čiăng mâo klei bi hgŭm mđrăm mbĭt. Ară anei knơ̆ng bruă ăt hlăk mă bruă hŏng dŭm anôk bruă djŏ tuôm čiăng bi mâo dŭm hdră êlan djŏ tuôp hŏng klei mjuăt bi hriăm bruă mă kơ mnuih djuê ƀiă, lehanăn duah brei bruă mă kơ digơ̆”.