Hlăm hdră bruă mơ̆ng Phŭn bruă Kahan ksiêm, Anôk bruă kahan ksiêm kdriêk Êa Hleo mâo jao ênoh čuăn mkra 86 boh sang khăp čiăng. Hluê si Thượng tá Phùng Minh Trí – Khua Anôk bruă kahan ksiêm kdriêk Êa Hleo, leh mâo klei gĭt gai mơ̆ng gưl dlông, mlan 3/2024, êpul êya đru kčĕ kơ Anôk bruă sang čư̆ êa kdriêk Êa Hleo mkŏ mjing Anôk bruă gĭt gai hdră ngă bruă anei; bi hgŭm hŏng dŭm anôk bruă djŏ tuôm, Anôk bruă sang čư̆ êa dŭm să, wăl krah ksiêm dlăng mnuih dưi dưn. Mphŭn hdră rŭ mkra, kahan ksiêm kdriêk mkŏ dăp êpul, boh nik phung đoàn viên êdam êra mơ̆ng êpul nao đru hruê ai mă bruă đru rŭ mdơ̆ng sang kơ mnuih ƀuôn sang… Hŏng dŭm klei gĭr kluôm dhuôm, leh giăm 2 mlan, kdriêk Êa Hleo ngă leh bruă mdơ̆ng 86 boh sang, ba jao kơ dŭm gŏ êsei, bi leh êlâo kơ wưng kčah 4 mlan. Thượng tá Phùng Minh Trí lač:

“ Leh giăm 2 mlan pŏk ngă, boh sang tal 86, jing sang knhal tuič hlăm hdră anei ti kdriêk dưi ngă leh. Anei klă sĭt jing bruă ngă tŭ yuôm, klă sĭt lehanăn jiă kma klei khăp čiăng, rơ̆ng hdră đru kơ ala ƀuôn ti alŭ wăl kdriêk, đru kơ mnuih ƀuôn sang mâo anôk dôk hơĭt kjăp, bi hơĭt ai tiê mă bruă duh mkra pla mjing.

  Ti kdriêk Čư̆ Kuiñ bruă hluê ngă hdră mkŏ mkra sang khăp čiăng ăt dưi ngă djŏ wưng kčah khădah dôk tuôm hŏng lu klei dleh dlan. Hluê si Thượng tá Nguyễn Cao Quyết – Khua anôk bruă kahan ksiêm kdriêk, lu gŏ sang dưi dưn hdră anei, ƀiădah lăn čiăng mkra sang ka mâo, ka bi mlih mta kñăm ba yua lăn, amâo mâo hră dưi yua lăn. Dŭm gŏ sang amâo djă pioh hră bi mklă gŏ êsei ƀun, giăm ƀun. Mbĭt hŏng anăn, jing klei dŭm êpul đru amâo jao prăk djŏ wưng kčah. Čiăng msir mghaih dŭm klei dleh dlan, gun kpăk, anôk bruă kahan ksiêm kdriêk bi hgŭm hŏng dŭm adŭ thơ̆ng kơ bruă; Anôk bruă sang čư̆ êa dŭm să mjêč ngă leh dŭm mta hră mơar đru kơ mnuih ƀuôn sang; mtrŭt mjhar dŭm anôk bruă duh mkra tinei “Nao čan êjai” mnơ̆ng yua ngă mkra. Hŏng klei đru mơ̆ng dŭm êpul djŏ tuôm, dŭm klei dleh dlan, gun kpăk mơ̆ng anôk bruă pral dưi ruh mtlaih. Thượng tá Nguyễn Cao Quyết brei thâo:

“Êngao phŭn mkăp prăk mơ̆ng Phŭn bruă kahan ksiêm lehanăn čar đru, kahan ksiêm kdriêk ăt iêu mthưr klei đru mơ̆ng dŭm êpul mkăn, mnuih mâo ai tiê kmah čiăng đru kơ mnuih ƀuôn sang. Bi mnuih mă bruă snăn iêu mthưr dŭm êpul, kahan ksiêm să nao mkra sang kơ mnuih ƀuôn sang. Hnơ̆ng čuăn rŭ mkra sang jing kjăp, jăk, ba yua tŭ dưn”.

Dak Lak jing čar čư̆ čhiăng mâo hlăm brô 2 êklăk čô mnuih ƀuôn sang, ênoh gŏ êsei ƀun mâo hlăm brô 8%. Đru msir sang dôk êjai, sang tĭ ƀrôč, phŭn bruă kahan ksêm pŏk ngă leh hdră rŭ mkra 1.200 boh sang khăp čiăng jao kơ dŭm gŏ sang ƀun, dleh dlan, mnuih djuê ƀiă, gŏ sang knŭk kna dlăng ba ti Dak Lak lehanăn jao kơ Anôk bruă kahan ksiêm čar pŏk ngă. Hŏng ai tiê đua klam mbĭt hŏng klei gĭr ktưn mơ̆ng Kahan ksiêm Dak Lak lehanăn bruă knŭk kna alŭ wăl, 1.200 boh sang dưi mkra leh hlăm mlan 7/2024, êlâo kơ wưng kčah 3 mlan, ba wĭt leh klei mơak kơ dŭm gŏ sang dưi dưn hdră anei. Ayŏng Y-Thon Niê (djuê ana Êđê) ti ƀuôn Ma Sŭt, să Krông Jing, kdriêk Mdrak brei thâo klei mơak hlăk dưi dôk hlăm sang mrâo.

“Sang kyâo kâo kđăp gơ̆ sô siă leh prŏng 20m2, adiê hjan ƀrôč, bi adiê ê’ăt hlơr, ƀhŭl mtŭk mtŭl. Mâo Phŭn bruă jao brei sang kâo mơak snăk, ară anei amâo lŏ huĭ kơ adiê hjan, mđiă ôh. Ung mô kâo mbĭt hŏng anak čô hơĭt ai tiê mă bruă knuă, rông anak čô hriăm hră mơar. Lač jăk kơ Phŭn bruă kahan ksiêm lehanăn dŭm gưl dhar bruă”.

Hluê Đại tướng Lương Tam Quang – Khua phŭn bruă kahan ksiêm, 1.200 boh sang jao kơ dŭm gŏ sang dleh dlan ti Dak Lak dưi rŭ mkra hnưm hĭn mkă hŏng wưng kčah bi êdah leh ai tiê pral kdal, đua klam mơ̆ng êpul kahan ksiêm lehanăn anôk bruă dŭm gưl hlăm čar Dak Lak, klei sa ai mơ̆ng dŭm anôk bruă duh mkra hlăm hdră đru kơ yang ƀuôn. Khua phŭn bruă Kahan ksiêm mñă, Phŭn bruă kahan ksiêm srăng lŏ ba akŏ hlăm bruă hluê ngă hdră “Kluôm ala hgŭm kngan msir klei sang dôk êjai, sang tĭ ƀrôč hlăm kluôm ala čar”, amâo lui hlei pô dôk ti tluôn.

“Lŏ dơ̆ng hluê ngă klei kiă kriê mơ̆ng Khua gĭt gai Đảng Tô Lâm, Phŭn bruă kahan ksiêm srăng ba akŏ hlăm bruă hluê ngă hdră “Kluôm ala hgŭm kngan msir klei sang dôk êjai, sang tĭ ƀrôč hlăm kluôm ala čar”. Mơ̆ng ară anei truh kơ jih thŭn 2025, đru mguôp hlăm mta kñăm msir lăm 153 êbâo boh sang sô, sang tĭ ƀrôč hlăm kluôm ala, boh nik ti dŭm krĭng taih kbưi, krĭng amâo rơ̆ng kjăp klei êđăp ênang, hlăm anăn mâo krĭng Lăn dap kngư./.