Ti dŭm anôk bi tuôm hŏng phung bi ala čar Lâm Đồng, mnuih ƀuôn sang brei kah mbha gưl, klei dưi klă klơ̆ng plah wah čar lehanăn ƀuôn hgŭm tơdah ngă bruă knŭk kna dua gưl, boh nik klei dưi mkăp hră djă yua lăn kơ mnuih ƀuôn sang. Akâo brei mjưh hdră kuai mă mnơ̆ng gŭ lăn ngă čhŏ djhan wăl hdĭp mda, ksiêm dlăng klei sua wĭt lăn dliê kmrơ̆ng ka ba yua, jao kơ alŭ wăl lehanăn mđung duh bi liê mkra mđĭ anôk bruă êlan klông. Khua mduôn Liêng Jrong Ha Bri, ti thôn 1, ƀuôn hgŭm Lạc Dương, čar Lâm Đồng brei thâo:

 “Lu mnuih ƀuôn sang tinei dôk čiăng kơ hră dưi djă ba yua lăn ƀiădah ară anei ƀuôn hgŭm kadưi hluê ngă, akâo kơ Anôk bruă kƀĭn ala ksiêm dlăng kyua anei jing klei čiăng mơ̆ng mnuih ƀuôn sang. Leh anăn brei ksiêm dlăng klei mnơ̆ng mgưt, ară anei kâo ƀuh mâo lu mta mnơ̆ng mgưt, hbâo pruê mgưt mơh, kphê mgưt mơh. Akâo kơ knŭk kna ksiêm dlăng klei anei kơ mnuih ƀuôn sang”.

Ti dŭm anôk bi tuôm, bi ala anôk bruă knŭk kna, dŭm dhar bruă djŏ tuôm mơ̆ng čar Lâm Đồng hâo mdah, mblang, tŭ mă dŭm mta klei djŏ hŏng klei dưi. Mbĭt anăn mtă kơ phung bi ala Anôk bruă kƀĭn ala bi mklin jih klei blŭ mơ̆ng mnuih ƀuôn sang brei anôk bruă knŭk kna mđing msir mghaih lehanăn hưn mdah dŭm bruă kơ Anôk bruă kƀĭn ala ksiêm dlăng.

Klei kbĭn bi tuôm hŏng mnuih ƀuôn sang dŭm alŭ wăl nah Ngŏ mơ̆ng čar Dak Lak (čar Phú Yên hđăp) mâo Êpul bi ala anôk bruă kƀĭn ala čar Dak Lak hluê ngă hŏng hdră klă anăp ti ƀuôn hgŭm Tuy Hòa lehanăn bi mkŏ online hŏng dŭm anôk hlăm ƀuôn hgŭm: Đông Hoà, Sông Cầu, Tuy An Bắc, Phú Hoà 1, Tây Hoà, Sơn Hoà, Sông Hinh lehqanăn Đồng Xuân. Phung bi ala čih yap klei đua klam mơ̆ng Anôk bruă kƀĭn ala, mbĭt anăn bi êdah klei čang hmăng Dak Lak hnưm mâo hdră êlan mđĭ kyar leh mkŏ dăp. Võ Ngọc Hiền Minh, ti ƀuôn hgŭm Tuy Hoà, čar Dak Lak brei thâo:

“Čar Dak Lak jiă knhuah dhar kreh lăn dap kngư liă lia, hlăk Phú Yên jing krĭng ktuê hang ksĭ kwar krah. Bruă bi mŭt, mjĕ mjuk dhar kreh plah wah êa ksĭ lehanăn dliê srăng pŏk klei găl mđĭ kyar prŏng kơ čar Dak Lak mrâo. Čang hmăng bruă knŭk kna alŭ wăl dŭm gưl mđing dlăng, gĭt gai čiăng mkŏ mjing čar ƀrư̆ hruê ƀrư̆ mdrŏng siam, klei hdĭp ƀrư̆ hruê jăk siam hĭn.

Hlăk êjai anăn, mnuih ƀuôn sang ti dŭm să nah Yŭ čar Dak Lak bi êdah klei sa ai hŏng gru hmô bruă knŭk kna dua gưl dưi ba yua mơ̆ng akŏ mlan 7 truh kơ ară anei. Mnuih ƀuôn sang brei mđĭ hĭn ênoh mnuih mă bruă, mkŏ mjing hdră mjuăt bi hriăm mđĭ klei thâo kơ êpul knuă druh mnuih mă bruă; duh kơ anôk bruă nah gŭ, kdrăp mnơ̆ng mkăp kơ hdră kriê dlăng, kñăm rơ̆ng boh tŭ hdră mă bruă lehanăn bi hrŏ klei lu đei bruă ti gưl ƀuôn hgŭm, boh nik hdră kriê dlăng lăn ala leh hluê ngă gru hmô bruă knŭk kna dua gưl.

Blŭ ti anôk bi tuôm, Nguyễn Thị Thu Nguyệt, kơiăng khua anôk bruă kƀĭn ala čar Dak Lak mtă kơ bruă knŭk kna mơ̆ng gưl čar truh kơ gưl nah gŭ lŏ dơ̆ng hluê ngă dŭm hdră mtrŭn mơ̆ng gưl dlông, boh nik hdră mtrŭn kơ bruă mkŏ dăp anôk bruă, mơ̆ng anăn msir mghaih bi knar, tŭ dưn kơ anôk bruă duh mkra lehanăn mnuih ƀuôn sang.

 “Mtă kơ Knơ̆ng bruă sang čư̆ êa čar Dak Lak lŏ dơ̆ng ksiêm dlăng, ba mdah dŭm hdră msir klă klơ̆ng čiăng bi leh mta kñăm đĭ kyar 8%  hluê si klei gĭt gai mơ̆ng Knŭk kna truh kơ thŭn 2025, mbĭt anăn gĭr mâo hnơ̆ng đĭ kyar dua ênoh mrô hlăm wưng ti anăp. Čiăng dưi ngă klei anei, brei bi hơĭt anôk bruă, kah mbha gưl, klei dưi klă klơ̆ng,jao bruă klam kơ alŭ wăl, rơ̆ng mta kñăm mđĭ kyar hơĭt kjăp lehanăn djŏ hŏng klei dưi.

Hlăm ai êwa ngă phŭn mil pô, kpă ênuah lehanăn rŭ mdơ̆ng, Klei kƀĭn bi tuôm mơ̆ng êpul bi ala Anôk bruă kƀĭn ala čar Dak Lak lehanăn Lâm Đồng ba wĭt leh boh tŭ dưn jăk siam. Phung bi ala, bi ala alŭ wăl lehanăn dŭm dhar bruă čih yap, mblang lu mta phŭn’ mñă srăng lŏ dơ̆ng mđing hmư̆ lehanăn hrăm mbĭt hŏng mnuih ƀuôn sang hlăm hdră mkŏ mjing alŭ wăl đĭ kyar pral lehanăn hơĭt kjăp.