Hdră êma mrô 8, mâo Êpul hgŭm bruă mniê Việt Nam kiă kriê, ngă lleh hŏng klei tŭ dưn hlăm klei mtăp mđơr êkei mniê, lehanăn mghaih msir djăp mta boh klei  djŏ tuôm hŏng phung mniê lehanăn phung hđeh.. čiăng dưi dưn yua jih klei tŭ dưn lehanăn đuĕ nao kbưi hĭn hlăm gưl tal 2 wưng thŭn (2026-2030), Nai prĭn Lê Ngọc Thắng bi êdah 4 mta bruă srăng ngă hŏng klei klă: Tal sa jing; Si ngă srăng bi mguôp mbĭt bruă mtăp mđơr êkei mniê, amâodah ngă mă hjăn? Tui si ñu, jing truh leh yơh mmông bi mlih klei mĭn. Bi tơdah êlâo dih bruă bi mguôp mbĭt klei mtăp mđơr êkei mniê hŏng duŭm mta bruă mkăn jing klei djŏ mơh kyua čiăng mđĭ klei thâo săng, ƀiădah kơ êdei anăp, klei mtăp mđơr êkei mniê brei mâo klei duh bi liê hjăn;

"Tui si kâo mĭn, klei mtăp mđơr êkei mniê jing sa mkrah mơ̆ng yang ƀuôn… knư̆ ƀiă hĭn klei bi mguôp hŏng bruă mkăn knư̆ jing jăk, kyuadah klei mtăp mđơr êkei mniê dưi yap jing sa mta bruă ngă hjăn tal êlâo, amâo mâo guôn mâo klei bi đru mơ̆ng bruă mkăn ôh".

Klei tal 2 lĕ anăn jing: Bi djŏ guôp hŏng bruă bi mlih hdră mă bruă ară anei. Klei bi khuăt bruă sang čư̆ êa adôk mă dua gưl anăn jing gưl čar, lehanăn gưl ƀuôn hgŭm, snăn mâo sa klei êmuh prŏng kơ bruă mkŏ mjing êpul bruă mniê, lehanăn kơ klei dưi mă bruă mơ̆ng phung knuă druh nah gŭ. Klei anei čiăng bi mâo klei mjuăt bi hriăm prŏng hĭn, mđĭ klei thâo kơ mnuih mă bruă gưl čar, lehanăn ƀuôn hgŭm čiăng kơ diñu thâo săng lehanăn hlue ngă mta bruă hlăm klei tŭ jing.

Klei tal 3 anăn jing: Brei thâo bi klin jih klei kreh knhâo. Tui si Nai prĭn Lê Ngọc Thắng, čiăng bi mâo sa klei ksiêm wĭt hlăm 10 thŭn (2021-2030) hŏng klei kreh knhâo, lehanăn klă mngač čiăng dưi wĭt lač dŭm klei êmuh: Hdră êlan mrô 8 klă sĭt mjing leh ya klei bi mlih mơ̆ng klei mtăp mđơr êkei mniê hŏng phung mniê mnuih djuê ƀiă? Dŭm klei ksiêm wĭt anăn srăng mjing knơ̆ng kjăp pioh kơ klei lŏ čuăl mkă hdră êlan mă bruă hlăm wưng tinăp.

Klei tal 4 jing; Bi mguôp hŏng jih jang bruă yang ƀuôn jing bruă năng ngă. Klei mtăp mđơr êkei mniê, amâo mâo dưi bi ktlah ôh hŏng dŭm bruă dôk djŏ tuôm hlăm yang ƀuôn msĕ si klei bi dôk ung mô̆ mơ̆ng mda, klei bi anak amiêt awa sa êrah, klei bi lui ung mô̆, tơdah phung mniê nao mă bruă kbưi, klei ngă jhat kơ phung hđeh mniê, amâodah klei tlĕ čhĭ mnuih. Hdră êlan mrô 8 năng bi mklă lehanăn mghaih msir kơ dŭm bruă anăn, yap anei jing sa kdrêč amâo mâo dưi kƀah ôh hlăm bruă jao klei dưi kơ phung mniê.

Nai prĭn Lê Ngọc Thắng čang hmăng hlăm wưng tinăp čiăng lŏ mâo čiăng bi mâo hdră mă bruă hlăm klei kluôm ênŭm lehanăn mâo boh phŭn klă mngač. Lŏ dơ̆ng păn kjăo dŭm mta čuăn knơ̆ng: Jing mđĭ klei thâo săng, răng mgang klei dưi, klei tŭ dưn lehanăn klei tŭ dưn djŏ klei bhiăn, duh mĭn kơ klei hdĭp mda mnơ̆ng dhơ̆ng lehanăn ai tiê, boh nik mđĭ klei dưi thâo duh ƀơ̆ng hlăm phung mniê.

Hdră êlan djuê ana boh sĭt jing klei bi mguôp lu dhar bruă, lu mta klei djŏ tuôm hŏng anak mnuih  – amâo mâo djŏ knŏng hlăm 53 djuê ana jing mnuih djuê ƀiă, ƀiădah mbĭt hŏng mnuih djuê lar jing Yuăn. Nao kluôm dơ̆ng mơ̆ng bruă mdrao mgŭn, dhar kreh, bruă sang hră mơar, msir klei ư̆ êpa bi hrŏ klei ƀun knap. Kyuanăn, jih jang dŭm mta bruă hlăm hdră ala čar kñăm năng lŏ bi ksiêm wĭt hŏng klei klă mngač. Čiăng dưi nga jăk lehanăn mâo klei bi sa ai, kâo mĭn tui tiŏ mta kñăm, mnuih dưi dưn lehanăn alŭ wăl pioh ngă bruă, boh nik mđing êlâo jing hlăm krĭng taih kbưi.

Hdră êlan mrô 8 amâo mâo djŏ knŏng jing sa hdră mă bruă, ƀiădah lŏ bi knăl čiăng bi êdah kơ klei kut kat mơ̆ng bruă kđi čar prŏng mâo leh Đảng lehanăn knŭk kna tă êlan. Hŏng bruă klam jing êpul hgŭm bruă mniê Việt Nam ba akŏ mđing ngă dŭm mta bruă hlăm klei klă mngač, mghaih msir djăp mta klei djŏ tuôm hlăm klei hdĭp, sĭt nik srăng jing kliăng mjing klei bi mlih prŏng hŏng klei kjăp, mjing sa yang ƀuôn mâo klei mtăp mđơr./.