Sa hdră bruă mâo Êpul bruă mniê kdriêk Thuận Châu hđăp bi hgŭm hŏng Anôk bruă mdrao mgŭn Sơn La pŏk ngă ti 23 să dleh dlan. Hŏng hdră êlan “hdră mtô mblang nao êlâo, hdră đru hluê êdei”, phung knuă druh êpul lehanăn knuă druh mdrao mgŭn nao ti grăp alŭ, ƀuôn mtrŭt mjhar, bi mlih “klei mĭn, hdră ngă”. Aduôn Lường Thị Thanh Thủy, Kơiăng khua bruă Đảng să Thuận Châu, Khua hđăp Êpul bruă mniê kdriêk Thuận Châu hđăp brei thâo, hdră đru ƀă kkiêng anak êđăp ênang mđing truh kơ phung knuă druh êpul, êpul bruă mniê lehanăn boh nik phung mniê mnuih djuê ƀiă dưi dưn hdră mtrŭn anei. Kyua anăn, ênoh phung mniê mnuih djuê ƀiă dưi dưn hdră mtrŭn anei jing lu êdi tĭng mơ̆ng thŭn 2021.

“Hlăm wưng tal 1 (2021-2025), Thuận Châu pŏk ngă leh klă klơ̆ng dŭm mta phŭn đru kơ hdră ƀă kkiêng anak truh kơ anôk bruă êpul. Kyua anăn, phung amai adei mniê mnuih djuê ƀiă dưi dưn hdră đru kơ klei ƀă kkiêng anak êđăp ênang anei lu”.

Čiăng rơ̆ng boh tŭ dưn, Êpul hgŭm bruă mniê kdriêk Thuận Châu hđăp, mkŏ mjing leh adŭ mjuăt bi hriăm klei thâo. Mnuih nao hgŭm jing phung knuă druh mniê lehanăn knuă druh bruă mdrao mgŭn gưl să, pô đua klam hluê hdră đru ti gưl nah gŭ. Êpul ăt ba yua prăk duh mơ̆ng hdră anei đru kơ phung amĭ jing mnuih djuê ƀiă kkiêng anak êđăp ênang ti dŭm anôk bruă mdrao mgŭn knŭk kna.

Ăt hluê si Lường Thị Thanh Thủy, mơ̆ng thŭn 2021 truh kơ thŭn 2024, kdriêk Thuận Châu hđăp đru leh kơ êbeh 1.600 čô mniê mnuih djuê ƀiă kơ klei ƀă kkiêng anak êđăp ênang. Ênoh bi liê kơ hdră anei êbeh 2,4 êklai prăk. Anei jing sa hlăm dŭm alŭ wăl mâo ênoh phung amĭ mnuih djuê ƀiă mâo đru kơ hdră ƀă kkiêng anak lu êdi ti čar Sơn La.

“Êlâo kơ pŏk ngă hdră đru anei (êlâo kơ thŭn 2021), ênoh phung mniê mnuih djuê ƀiă hriê ksiêm mkă dlăng tian lehanăn kkiêng anak ti anôk bruă mdrao mgŭn ƀiă êdi, knŏng mâo hlăm brô 600 čô amĭ grăp thŭn. Khă snăn, leh êbeh 3 thŭn pŏk ngă, êbeh 1.000 čô mniê dưi dưn lehanăn nao kkiêng ti dŭm anôk bruă mdrao mgŭn. Mơ̆ng anăn, hnơ̆ng tŭ hdră kriê dlăng klei suaih pral phung amĭ lehanăn hđeh dưi mkra mđĭ, ênoh phung mniê djiê êjai kkiêng hrŏ, ênoh hđeh mrâo kkiêng djiê ăt hrŏ lu.

Dŭm boh tŭ anei jing tur knơ̆ng yuôm bhăn čiăng kơ Êpul bruă mniê Thuận Châu ba mdah hŏng Gưl dlông, čar lehanăn anôk bruă djŏ tuôm pŏk hdră đru anei hlăm wưng tal 2 (2026-2030), kñăm đru kơ phung mniê mnuih djuê ƀiă ti alŭ wăl. Hŏng giăm 2,5 êklai prăk mâo mkăp, êbeh 1.000 čô mniê ti Thuận Châu dưi đru, êbeh 1 êbâo čô hđeh mrâo kkiêng êđăp ênang, êbeh 1 êbâo čô amĭ mâo dlăng kriê kjăp. Amai Lò Thị Hồng, sa čô mniê mnuih djuê ana Thái brei thâo:

"Êlâo adih hmei huĭ nao kơ anôk bruă mdrao mgŭn să, prăk kăk kăn mâo. Ară anei knuă druh hriê truh ti sang mtrŭt mjhar, lŏ đru prăk kăk huă ƀơ̆ng, êrô êbat, hmei hơĭt mơh ai tiê. Anak pô kkiêng suaih pral mơak êdi”.

Hdră bruă 8 amâo djŏ knŏng ba nao mnuih mă bruă truh ti krĭng dleh dlan, ƀiădah yuôm bhăn hĭn, jing ba klei thâo săng, bi mlih klei mĭn lehanăn jao klei êđăp ênang kơ phung amĭ krĭng dlông, đru mguôp hlăm hdră mkra mđĭ klei suaih pral lehanăn mtăp mđơr hĭn kơ ênuk gưl êdei./.