Dŭ mnơ̆ng ba wĭt ti sang mrâo, gŏ sang Amai H’Bion Ƀuôn Yă, ti ƀuôn Ea Sar, să Êa Sar hơ̆k mơak. Amai H’Bion brei thâo, 13 thŭn êgao, sa boh sang điêt hlăm brô 20m2 mâo 4 čô dôk bŏ hŏng klei dleh dlan. Klei čang hmăng dưi mâo sa boh sang prŏng hĭn mâo leh dua ung mô̆ ñu bi mĭn mơ̆ng dŭm thŭn ƀiădah ka dưi hluê ngă ôh kyua klei hdĭp adôk lu klei dleh dlan. Leh thâo knŭk kna đru mdơ̆ng sang, 2 ung mô̆ ñu mdei êjai klei hiu mă bruă mưn, wĭt đru mkra pưk sang pô čiăng bi hrŏ ƀiă klei bi liê. Mơ̆ng anăn, sang ung mô̆ ñu dưi mdơ̆ng prŏng siam hĭn mơh.

 “Ară anei mâo knŭk kna đru sang leh, ung mô̆ kâo h’ĭt mơh ai tiê mă bruă, mđing mđĭ kyar bruă duh mkra, pral tlauh kơ ƀun.

Hơ̆k mơak mâo sang mrâo leh 13 thŭn dôk sang êjai, amai H’Mah Mlô, ti alŭ 6, să Ea Sar, kdriêk Êa Kar brei thâo: Ung mô̆ ñu nao hiu mă bruă mưn jih thŭn mlan amâo mâo djăp yua hlăm klei hdĭp lehanăn kơ 2 čô anak nao sang hră, ñu amâo bi mĭn ôh kơ klei srăng mdơ̆ng sa boh sang kjăp. Ƀiădah klei amâo jhŏng mĭn anei, ară anei jing sĭt, kyua maao 44 êklăk prăk Knŭk kna đru lehanăn 40 êklăk prăk čan mơ̆ng Knơ̆ng prăk đru ba yang ƀuôn. Mâo sang dôk kjăp, klei hdĭp ung mô̆ amai H’Mah msĕ si mŭt hlăm gưl mrâo:

 “Êlâo adih dua ung mô̆ mkra sang duah tiap mă snăn, mdhă muôr ƀơ̆ng jih, adiê ƀrôč mơh amâo thâo bĭt mjing. Leh mâo knŭk kna đru kơ dua ung mô̆, klei hdĭp jăk ƀiă leh, gĭr mă bruă knuă anal čô dưi nao sang hră mơar.

Hluê ngă Hdră bruă 1, Hdră bruă ala čar kñăm 1719, thŭn 2023, să Êa Sar dưi mdơ̆ng 36 boh sang kơ dŭm gŏ êsei mnuih djuê ƀiă ƀun. Truh ară anei, dŭm boh sang anei dưi ngă leh, mnuih ƀuôn sang dưi mŭt dôk. Hluê si Văn Đình Thìn, Khua anôk bruă sang čư̆ êa să Êa Sar, leh đru sang dôk kơ gŏ sang ƀun, să dôk hluê ngă dŭm bruă čiăng đru lăn dôk kơ 44 gŏ sang amâo mâo lăn ti alŭ wăl.

 “Hluê ngă hdră đru lăn kơ mnuih dưi dưn hluê Hdră bruă 1 snăn să ăt dôk ksiêm dlăng. Ară anei să amâo mâo lăn kyua anăn hdră mđing truh mơ̆ng să jing čuăl mkă dŭm anôk bi mguôp mbĭt čiăng đru kơ mnuih blei lăn.

Hdră bruă 1 hlăm hdră bruă 1719, čar Dak Lak dưi mkăp êbeh 91 êklai prăk čiăng hluê ngă hdră đru lăn dôk, sang dôk, lăn pla mjing lehanăn êa yua kơ dŭm gŏ sang mnuih djuê ƀiă ƀun. Hlăm anăn, kdriêk Êa Kar jing sa hlăm ƀiă alŭ wăl hlăm kluôm čar hluê ngă djŏ wưng, hŏng 150 gŏ sang mâo leh sang dôk, 629 gŏ sang dưi yua êa doh. Hdră đru lăn dôk, lăn pla mjing ăt kdriêk dôk mđĭ hluê ngă, gĭr bi leh hdră anei hlăm thŭn 2024.

Nguyễn Đăng Kai, K’iăng khua Adŭ bruă Djuê ana kdriêk Êa Kar brei tjâo, čiăng pŏk ngă tŭ dưn Hdră bruă 1 mơ̆ng hdră bruă 1719, leh mâo hdră kčah lehanăn klei ktrâo lač mơ̆ng Gưl dlông lehanăn čar, Adŭ bruă đru kčĕ leh kơ Anôk bruă sang čư̆ êa kdriêk ba mdah hdră kčah hluê ngă, hâo hưn, ktrâo lač kơ dŭm să, wăl krah ksiêm dlăng, čih mkra, ngă tur knơ̆ng bi mklă phung dưi dưn… Mbĭt anăn mđĭ hdră mtô mblang kñăm mjing klei sa ai hlăm mnuih ƀuôn sang.

 “Êlâo kơ ngă hmei hưn mthâo leh ti anôk bi kƀĭn lehanăn si srăng ngă čiăng siă suôr hŏng bruă, jao djŏ mnuih čiăng mâo pô đua klam kơ bruă lehanăn ngă djŏ hdră bhiăn. Leh anăn tơdah mâo hdră kčah klă klơ̆ng snăn dŭm anôk bruă, mnuih đua klam srăng ngă bruă jih ai tiê, čiăng ba wĭt klei tŭ jing.

Kyua mâo klei hgŭm kjăp mơ̆ng bruă knŭk kna alŭ wăl lehanăn dŭm anôk bruă djŏ tuôm, dŭm êtuh gŏ sang ƀun, giăm ƀun hlăm krĭng mnuih djuê ƀiă kdriêk čư̆ čhiăng Êa Kar, čar Dak Lak mâo sang dôk, bi hơĭt klei hdĭp, đru kơ alŭ wăl mtrŭt mđĭ hdră bi hrŏ ƀun, rơ̆ng hdră đru kơ yang ƀuôn./