6 mlan akŏ thŭn 2024, êpul gru bi kal hrah dŭm čả iêo mkrum leh êbeh 360 êklai prăk, mđup brei hnư mnơ̆ng kơ êbeh 1 êklăk gưl čô ƀun ƀin, giăm ƀun, phung mâo klei hdĭp dleh dlan, phung djŏ drao ruă diosin, gŏ sang knŭk kna dlăng ba, gŏ sang tŭ klei hmăi mơ̆ng klei truh yan adiê, klei ruă tưp.

Bruă bi mdrơ̆ng hŏng klei truh yan adiê dưi đru leh kơ êbeh 25 êbâo gưl gŏ sang hŏng ênoh êbeh 7 êklai 500 êklăk prăk. Hlăm klei kƀĭn trông, Bùi Thị Hòa, Khua kiă kriê êpul gru bi kal hrah Việt Nam yap yuôm bhăn dŭm klei gĭr, boh tŭ klei ngă bruă mơ̆ng dŭm anôk bruă hlăm Êpul bi lông mrô 6. Mbĭt anăn mñă kơ êpul gru bi kal hrah dŭm čar lŏ dơ̆ng mlih mrâo hdră ngă bruă, hluê ngă dŭm hdră êlan, klei mtrŭt mjhar, bruă ngă jăk, đru kơ phung mâo klei hdĭp dleh dlan gĭr ktưn, kpưn đĭ hlăm klei hdĭp hŏng klei kjăp leh anăn tŭ dưn.