Leh lu thŭn tŭ klei ƀun ƀin, gŏ sang amai Rơlan Siu H’Hăng, dôk ti ƀuon Tu 1, să Ia Ga, kdriêk Čư̆ Prông dưi klă sĭt tlaih mơ̆ng klei ƀun ƀin. Amai H’Hăng brei thâo, gŏ sang mâo 3ha ana mtŭk, leh anăn amai ăt mâo lu klei mĭn tĭng čoh bruă ngă hma. Ƀiădah kyua amâo mâo prăk kăk, lu thŭn gŏ sang mdêč mdar, suăi êmăn gŏ sang kăn mâo klei đĭ kyar lei. Mâo hŏng anei 3 thŭn, gŏ sang amai dưi lĭng čan 50 êklăk prăk mơ̆ng ênoh prăk đru kơ gŏ sang ƀun ƀin, amai dưi ngă dŭm klei pô čiăng. Kyua thâo tĭng mkă, mă bruă knuă, ară anei amâo leh hnư hrui wĭt mơ̆ng 40 – 50 êklăk prăk hlăm sa thŭn mơ̆ng klei čoh bruă ngă hma:

 “Êlâo dih gŏ sang tuôm hŏng lu klei dleh dlan, čiăng blei mnơ̆ng rông leh anăn mjeh ana pla mjing ƀiădah amâo mâo prăk. Leh dưi lĭng čan ênoh prăk mơ̆ng knơ̆ng prăk đru ba ala ƀuôn, kâo čan 50 êklăk prăk, blei sa 1 drei êmô, pla thiăm kphê, leh anăn kriê dlăng đang ana mtŭk. Arăn, hnư hrui wĭt mơ̆ng gŏ sang jing mơ̆ng 40 – 50 êklăk prăk hlăm sa thŭn.”

Ăt msĕ sơnăn, thŭn anei, gŏ sang ayŏng Ksor Tứ ti ƀuôn Čuêñ, să Uar, kdriêk Krông Pa hơ̆k mơak êdi kyua dưi rŭ mdơ̆ng sang dôk mrâo. Ayŏng brei thâo, mâo hŏng anei 3 thŭn, kyua dưi lĭng čan 40 êklăk prăk mơ̆ng ngăn prăk đru ba ala ƀuôn, ayŏng duh bi liê pla kbâo, blei êmô mjeh. Leh 3 thŭn, ayŏng dưi tloh tla nư, dưi rŭ mdơ̆ng sang dôk leh anăn mâo 5 drei êmô. Ayŏng hơ̆k mơak brei thâo:

 “Êlâo dih, gŏ sang kâo hdĭp hlăm sang sô siă, êa ƀrôč. Knŭk kna đru brei ngăn prăk čiăng duh ƀơ̆ng, pô dưi rŭ mdơ̆ng sang dôk. Ară anei sang kâo mâo leh klei hơĭt, kâo săng gĭr čoh bruă ngă hma, mđĭ kyar klei hdĭp mda”.

Ară anei, jih jang ênoh prăk brei čan mơ̆ng Knơ̆ng prăk đru ba ala ƀuôn anôk bruă ti čar Gia Lai hlăm alŭ wăl jing êbeh 6.700 êklai prăk, hŏng 153.925 čô lĭng čan. Knŏng ti thŭn 2023, Knơ̆ng prăk đru ba ala ƀuôn anôk bruă ti Gia Lai mâo ênoh prăk brei čan mâo 1.700 êklai prăk, hŏng 41.500 gưl čô lĭng čan. Hlăm anăn, phung lĭng čan jing gŏ sang ƀun ƀin, gŏ sang mnuih djuê ƀiă hluê si dŭm ênoh lĭng čan hlăm hdră mtrŭn mrô 11/NQ-Cp mơ̆ng khua knŭk kna msĕ si brei čan sang dôk yang ƀuôn, brei čan mđĭ kyar bruă duh mkra ala ƀuôn kơ mnuih djuê ƀiă, jing êbeh 13.000 gŏ sang. Đinh Văn Nghĩa – K’iăng khua kiă kriê Knơ̆ng prăk đru ba ala ƀuôn čar Gia Lai brei thâo:

 “Knơ̆ng prăk đru ba ala ƀuôn čar dlăng yuôm bhăn bruă hluê ngă dŭm hdră brei čan kơ mnuih djuê ƀiă ti dŭm alŭ wăl. Hmei bi mguôp kjăp hŏng dŭm gưl bruă, dhar bruă leh anăn alŭ wăl ksiêm dlăng kơ klei čiăng leh anăn klei găl mơ̆ng dŭm gŏ sang ƀun, giăm ƀun, gŏ sang mnuih djuê ƀiă leh anăn gŏ sang knŭk kna dlăng ba mkăn, čiăng ba mdah dŭm hdră kčah, hnơ̆ng čuăn mkăp brei ênoh prăk lĭng čan kơ dŭm alŭ wăl hluê si hnơ̆ng dleh dlan leh anăn klei čiăng mơ̆ng mnuih ƀuôn sang djŏ guôp leh anăn tŭ dưn”.

Ênoh prăk brei čan mơ̆ng Knơ̆ng prăk đru ba ala ƀuôn dưi đru mguôp, đru kơ dŭm gŏ sang ƀun, giăm ƀun leh anăn gŏ sang mnuih djuê ƀiă ti čar Gia Lai dưi mgaih msir dŭm klei dleh dlan hlăm klei hdĭp, mđĭ kyar klei hdĭp mda, gĭr ktưn tlaih mơ̆ng klei ƀun ƀin hŏng klei kjăp.