Gia Lai hgŭm kngan lăm lui êbeh 8.400 sang dôk êjai, sang tĭ rưč
Thứ ba, 10:00, 11/03/2025 Pô mblang: Y -Ƀel Êban Pô mblang: Y -Ƀel Êban
VOV4.Êđê - Hŏng klei gĭr lehanăn ai tiê “Amâo mâo lui hlei pô dôk ti tluôn”, čar Gia Lai dôk iêu mtrŭt djăp klei găl mâo čiăng msir lăm sang dôk êjai, sang tĭ ƀrôč. Dŭm êbâo boh sang kjăp ară anei dưi bi mlih kơ dŭm boh sang jhat rai, jing leh sang hơuh mđao kơ dŭm gŏ sang ƀun, gŏ sang knŭk kna dlăng ba, mnuih mâo bruă tŭ dưn. Klei hgŭm kngan kjăp mơ̆ng anôk bruă kđi čar amâo djŏ knŏng mkra mđĭ klei hdĭp ƀiădah lŏ jing ai mtrŭt kơ dŭm gŏ sang lŏ dơ̆ng gĭr ktưn kpưn đĭ hĭn.

Hŏng klei mă bruă mjêč mơ̆ng êpul rŭ mdơ̆ng, sang mrâo mơ̆ng ayŏng Ksor Si (39 thŭn, ti ƀuôn Măi, să Ia Hrung, kdriêk Ia Grai) dơ̆ng jing rup. Sang prŏng giăm 50 m2 mâo dua adŭ pĭt,  sa adŭ tuê. Ayŏng Ksor Si brei thâo, gŏ sang hmăng êdi kơ hruê bi leh sang, čiăng kơ gŏ sang mâo anôk dôk hơĭt, anak aneh mâo anôk hriăm hră mơar.

"Sang hđăp jhat rai, tĭ ƀrôč jih leh. Ară anei mâo sang mrâo kjăp, mâo anôk anak hriăm hră. Kâo lač jăk kơ Đảng, Knŭk Kna đru kơ gŏ sang kâo mâo anôk dôk hơĭt. Êdei dih tơdah mâo klei găl, kâo srăng rŭ mdơ̆ng thiăm sang pui leh anăn sang mnei.”

Ti kdriêk Ia Grai, 545 gŏ sang ƀun, gŏ sang Knŭk Kna dlăng ba, phung mâo bruă tŭ dưn dưi đru rŭ mdơ̆ng sang mrâo. Yap truh mlan 2/2025, kluôm čar Gia Lai rŭ mdơ̆ng mrâo leh anăn mkra wĭt 1.423 boh sang, hlăm anăn mâo 132 boh sang dưi ngă leh. Dŭm boh sang anei kơ gŏ sang ƀun, gŏ sang Knŭk Kna dlăng ba, phung mâo bruă tŭ dưn, đru bi hơĭt klei hdĭp kơ lu mnuih ƀuôn sang dleh dlan. Čiăng rơ̆ng djŏ hdră kčah, êngao kơ ênoh prăk mkăp brei, dŭm alŭ wăl lŏ dơ̆ng iêo mkrum hruê ai mơ̆ng yang ƀuôn, êpul lĭng kahan, mtrŭt mjhar dŭm ai dưi yang ƀuôn čiăng rŭ mdơ̆ng mrâo leh anăn mkra wĭt sang dôk, boh nik hlăm dua hdră ala čar kñăm.

Čar mă leh klei đru mơ̆ng dŭm êpul êya, knơ̆ng bruă leh anăn anôk bruă gưl dlông. Phŭn bruă kahan ksiêm jao leh 231 êklai prăk đru kơ hdră, hlăm anăn 201,301 êklai prăk mơĭt hlăm keh prăk Kyua mnuih ƀun ƀin mơ̆ng čar. Êngao kơnăn, đa đa knơ̆ng bruă mâo hdră duh bi liê ti čar ăt đru mguôp hŏng hdră hŏng ênoh prăk giăm 20 êklai prăk. Lê Ngọc Quý, khua Bruă sang čư̆ êa kdriêk Ia Grai brei thâo:

 “Hŏng klei gĭr bruă kđi čar, êngao kơ ênoh đru 60 êklăk prăk čiăng rŭ mdơ̆ng mrâo mkra wĭt, hmăi iêo jak, mtrŭt mjhar mnuih ƀuôn sang, gŏ sang, găp djuê bi mkrum mguôp, yua hruê ai mơ̆ng dŭm êpul bruă, leh anăn dŭm hdră bruă, mnơ̆ng yua, kdrăp yua mđĭ ênhă ba yua, mkra war êning đru kơ mnuih ƀuôn sang mkra mjing, rông mnơ̆ng, đĭ hnơ̆ng klei hdĭp mnuih ƀuôn sang”.

Hlăm hdră lăm lui sang dôk êjai ti Gia Lai, kahan ksiêm leh anăn lĭng kahan mâo bruă klam kmeh gơ̆ng. Amâo djŏ knŏng đru dŭ mnơ̆ng, hli lăn, klei atur, êpul lŏ nao hgŭm rŭ mjing, kpơ̆ng čuôr, bi pral bruă bi leh sang dôk. Đa đa knuă duh kahan ksiêm lŏ mguôp wăt prăk mlan pô đru kơ gŏ sang bun rŭ mdơ̆ng sang mrâo. Hlăm ênoh anăn, thiếu tá Lê Đình Hải, khua êpul kahan ksiêm să Ia Mrơn, kdriêk Ia Pa mguôp leh 60 êklăk prăk. Hluê ngă msĕ ñu, knuă druh, kahan ksiêm să ăt hgŭm kngan đru mguôp thiăm 60 êklăk prăk leh anăn hnêč mmông wăn đru kơ mnuih ƀuôn sang rŭ mdơ̆ng sang. Thiếu tá Lê Đình Hải brei thâo:

 “Hlăm klei ksiêm dlăng, aduôn dôk hŏng 1 čô leh anăn2 čĕ, kâo ƀuh klei hdĭp gŏ sang aduôn dleh dlan, kâo kčĕ hŏng bruă đảng nah gŭ, Bruă sang čư̆ êa să čiăng đru ngăn prăk rŭ mdơ̆ng. Ƀiădah ung ñu djiê leh, kyuanăn dleh mâo hdră đru. Kyuanăn, kâo wĭt bi trông hŏng mô̆ anak bi mguôp rŭ mdơ̆ng sang mrâo kơ ñu, kjăp hĭn čiăng bi hơĭt klei hdĭp”.

Hluê si hdră kčah, čar Gia Lai mĭng tĭng lăm lui 8.485 boh sang hlăm thŭn 2025 hlăm hdră Hrăm mbĭt lăm lui sang dôk êjai, sang tĭ rưč. Kyua klei sa ai mơ̆ng bruă kđi čar, knŏng hlăm dua mlan giăm anei, lu boh sang pral hĭn siam hĭn, kjăp hĭn leh anăn êlưih hĭn dưi ngă bi leh, ba wĭt klei hơ̆k mơk kơ dŭm êtuh gŏ êsei. Rah Lan Chung, khua Bruă sang čư̆ êa čar Gia Lai mñă:

 “Bruă hlăm lui sang dôk êjai, sang tĭ rưč rơ̆ng kơ klei klă mngač, mtăp mđơr, hnơ̆ng tŭ jăk leh anăn tŭ dưn, kñăm iêo jak ai dưi mơ̆ng grăp anôk bruă, knơ̆ng bruă, êpul êya, grăp čô, êpul êya mnuih ƀuôn sang hlăm leh anăn êngao čar. Mbĭt anăn mtrŭt mjhar mnuih ƀuôn sang đru mguôp mđĭ hnơ̆ng tŭ jăk sang dôk kơ mnuih ƀuôn sang. Êngao kơnăn, čiăng jêñ jêñ mtrŭt mjhar čiăng ksiêm dlăng, bi klă, mă klei hriăm pah mni dŭm êpul êya, grăp čô mâo boh tŭ dưn hlăm bruă hluê ngă hdră bruă.”

Hŏng klei hrăm mbĭt mơ̆ng bruă kđi čar leh anăn lĭng kahan, hdră lăm lui sang dôk êjai ti čar Gia Lai dôk dưi mtrŭt bi pral. Dŭm boh sang mđao amâo djŏ knŏng bi hơĭt klei hdĭp ƀiădah lŏ mjing tur knơ̆ng kjăp čiăng kơ gŏ sang ƀun kpưn đĭ, đru mkŏ mjing alŭ wăl ƀrư̆ hruê ƀrư̆ mdrŏng siam.

Pô mblang: Y -Ƀel Êban

Viết bình luận

TIN CÙNG CHUYÊN MỤC

Video

 

Tiếng chuông ngân (Jingle Bells)
Ru em
27/11/2024
Vi yông ‘nhă kơ ba
11/11/2024
Bơto bơtê cau lòt lơh broă ngài
24/10/2023