Ƀuôn hgŭm Quy Nhơn jing sa hlăm dŭm alŭ wăl mprăp hnưm kơ gưl ruah khua. Mơ̆ng akŏ wưng păn bruă, ƀuôn hgŭm bi kluôm leh êpul khua gĭt gai leh anăn dhar bruă ruah khua ƀuôn hgŭm, mbĭt anăn mkŏ mjing 5 êpul thơ̆ng kơ bruă mâo: mnuih mă bruă, bruă nah tluôn, hâo hưn, mtô mblang, msir klei hưn, kčŭt hưn, klei êđăp ênang leh anăn bruă mdrao mgŭn. Dŭm êpul bruă dưi dăp êpul đru bruă, mbha bruă klam klă nik kơ grăp anôk bruă, rơ̆ng kơ klei čŏng pô, bi tŭ ư hlăm klei gĭt gai leh anăn ngă bruă.

 Hluê si hdră kčah, ti ƀuôn hgŭm srăng mâo 6 anôk bruă ruah khua, mĭn tĭng ruah 30 čô bi ala Êpul gơ̆ng bruă ƀuôn sang ƀuôn hgŭm wưng thŭn 2026 - 2031. Hlăm klei bi kƀĭn tal 1, mâo 48 čô mgơ̆ng ruah. Hlăm anăn mniê mâo 45,7%. Ênoh phung leh hriăm gưl prŏng jing lu hĭn. Êpul khua dhar bruă ruah khua ƀuôn hgŭm Quy Nhơn ngă bruă mă hră mơar phung mgơ̆ng ruah, mbĭt anăn hluê ngă dŭm bruă msĕ si mprăp kơ klei bi kƀĭn tal 2, ksiêm dlăng hră anăn phung mplĕ hră, rơ̆ng ngă djŏ hdră bhiăn leh anăn klei čuăn mơ̆ng klei mplĕ hră.

Nguyễn Đức Toàn-  Khua dlăng bruă Đảng, khua Bruă sang čư̆ êa ƀuôn hgŭm Quy Nhơn brei thâo:

“Ƀuôn hgŭm Quy Nhơn hưn mdah 48 čô, čiăng mnuih ƀuôn sang ruah 30 čô djŏ hŏng klei čuăn, hưn mdah phung bi ala mâo djăp klei thâo, klei đăo knang, knhuah hdĭp mŭt hlăm Êpul gơ̆ng bruă ƀuôn sang ƀuôn hgŭm čiăng đru kơ alŭ wăl mkŏ mjing bruă Knŭk kna jĕ giăm hŏng mnuih ƀuôn sang, kñăm mđĭ kyar bruă duh mkra ala ƀuôn ti alŭ wăl. Êngao kơnăn, hmei ksiêm dlăng čiăng mkŏ mjing dŭm êpul mplĕ hră ti 63 alŭ leh anăn ksiêm dlăng, ngă hră anăn phung mplĕ hră ti alŭ wăl”.

Hluê si hdră kčah, hlăm klei mplĕ hră mlan 3 kơ anăp, čar Gia Lai mâo 6 anôk mplĕ hră ruah phung bi ala Bruă Kbĭn ala, mĭn tĭng ruah 16 čô. Hŏng Êpul gơ̆ng bruă ƀuôn sang čar, kluôm čar mâo 18 anôk ruah khua, mĭn tĭng ruah 85 čô, rơ̆ng djŏ hdră bhiăn, ênoh mnuih djŏ klei čuăn.

Čiăng kơ klei ruah khua mkŏ mjing êđăp ênang, êngiê leh anăn tŭ jing, mơ̆ng knhal jih mlan 11/2025, Êpul khua bruă Đảng čar Gia Lai mkŏ mjing klei kƀĭn trông ngă bruă mprăp kơ klei mplĕ hră hŏng êlan online mkŏ hŏng 135 să, ƀuôn hgŭm. Truh kơ ară anei, klei mplĕ hră mơ̆ng gưl čar truh kơ nah gŭ dưi bi kluôm ênŭm. Rơ̆ng kơ klei sa ai, hrăm mbĭt hlăm klei gĭt gai leh anăn ngă bruă. Êpul khua dhar bruă mặt trận čar ăt mkŏ mjing dŭm klei kƀĭn mtô kơ bruă hưn mdah phung mgơ̆ng ruah, bi klă hdră êlan, mta phŭn leh anăn klei čuăn dŭm klei kƀĭn kơnăp djŏ hŏng hdră bhiăn. Nao mbĭt hŏng anăn, bruă hâo hưn kơ klei mplĕ hră dưi mtrŭt mđĭ, đru kơ phung mplĕ hră săng kơ klei dưi, bruă klam pô leh anăn ênoh čuăn phung bi mnuih ƀuôn sang ruah.

Ară anei, dŭm alŭ wăl hlăm čar Gia Lai dôk kñăm mtô kơ klei mplĕ hră, bi ênŭm hră anăn phung mgơ̆ng ruah djŏ hŏng klei čuăn, mbĭt anăn mprăp kơ mnơ̆ng yua, hdră êlan rơ̆ng kơ klei êđăp ênang alŭ wăl leh anăn bruă mdrao mgŭn hlăm hruê ruah khua. Akŏ mlan 1/2026, dhar bruă ruah khua čar Gia Lai mkŏ mjing lu êpul ksiêm dlăng bruă mprăp ti dŭm să, ƀuôn hgŭm hmao mkra mlih, ruh mgaih klei dleh dlan, rơ̆ng kơ klei mprăp dưi ngă jăk, djŏ klei čuăn. Ksiêm dlăng ti ƀuôn hgŭm Quy Nhơn, Thái Đại Ngọc- khua hlăm bruă Đảng gưl dlông, khua bruă hlăm bruă Đảng čar, khua dhar bruă ruah khua čar Gia Lai mñă klă:

“Ngă hră mơar anak mnuih klă klơ̆ng, klei anei yuôm bhăn sơnăk. Si drei srăng ngă, rơ̆ng kơ hnơ̆ng jăk, anak mnuih djŏ hnơ̆ng, amâo djŏ ôh knŏng hlăm klei čuăn. Kyua anei jing pô bi ala kơ dŭm gưl mnuih ƀuôn sang. Kyua anei jing phung bi ala kơ dŭm gưl mnuih ƀuôn sang. Kyuanăn kluôm bruă kđi čar mơ̆ng čar truh kơ nah gŭ srăng ngă jăk bruă anei”.