Leh 3 thŭn dôk hlăm sang mnă wĭt kơ sang ti ƀuôn Tôr 1, să Glar, kdriêk Đak Đoa, mlan 10/2023 mrâo êgao, ayŏng Trôl mâo êpul bruă ngăn prăk mơ̆ng să, mbĭt hŏng bruă sang čư êa alŭ wăl tŭ ư hưn mdah leh đru brei čan 50 êklăk prăk. Mâo ngăn prăk, ayŏng jhŏng kah 10 êklăk prăk blei 2 drei êmô, čiăng mă eh êmô jing hbâo brŭ, rông êmô ana mđai. 40 êklăk prăk adôk, ayŏng duh bi liê, wĭt pla mrâo 2 ha kphê. Ayŏng brei thâo, ñu mgei ai tiê êdi kyua mâo klei uêñ mĭn, klei đru:

“Kâo jing mnuih tuôm ngă soh hŏng klei bhiăn lăn čar, ƀiădah ăt mâo klei uêñ mĭn, klei đru. Kâo srăng yua ênoh prăk anei čiăng duh bi liê ngă đang kphê. Kâo hmăng hmưi mâo klei myun čiăng hnưm dưi tla wĭt kơ knŭk kna”.

Dôk mtuk mtlak bhu kphê bŏ tač sang, amai Lê Thị Tuyết Nhung ti êpul 2, alŭ 3, să Nam Yang, kdriêk Đăk Đoa brei thâo, 2 tôn kphê anei amai mrâo blei mơ̆ng mnuih ƀuôn sang hlăm să, kyua mâo ênoh prăk čan mơ̆ng Knơ̆ng prăk đru ba ala ƀuôn. Mâo hŏng anei 2 mlan, leh mrâo wĭt sang mnă, amai mdêč mdar amâothâo bĭt mơ̆ng pô srăng kčưm, kyua mâo klei hêñ, amâo mâo prăk ngă bruă duh ƀơ̆ng, mmông anăn mâo bruă sang čư êa alŭ wăl leh anăn êpul kahan ksiêm đru ngă hră mơar, hưn mdah kơ ñu lĭng čan 100 êklăk prăk ngăn prăk đru ba ala ƀuôn. Hŏng klei hmar, klei mbruă, amai yua ênoh prăk anăn čiăng pla leh anăn hrui blei kphê hlăm wưng hrui pĕ mrâo. Amai Nhung brei thâo:

“Pô tĭng mkă yua ênoh prăk anăn čiăng pla kphê, tal 2 jing mă prakw čhĭ mnia hlăm grăp hruê. Kâo mĭn hŏng ênoh prăk anei, kâo srăng ngă jăk. Leh anăn hmăng hmưi ênoh prăk anei hlăm wưng kơ anăp srăng dưi đru kơ phung mnuih msĕ hŏng kâo čiăng ngă bruă duh mkra.”

Thiếu tá Trần Thị Luận- k’iăng khua kiă kriê êpul kčŭt hưn phung ngă soh leh anăn đru kơ hdră bhiăn, klam bruă lŏ ñŭ kma hŏng ala ƀuôn, Kahan ksiêm kdriêk Đăk Đoa brei thâo: Leh mơ̆ng klei bi klă mrô 22/2023/QĐ-TTg mơ̆ng Khua knŭk kna dưi hluê ngă hlăm čar, mơ̆ng mlan 10 – 12/2023, kahan ksiêm kdriêk Đăk Đoa mâo leh klei bi mguôp hŏng Knơ̆ng prăk đru ba ala ƀuôn ksiêm dlăng, bi klă čiăng đru kơ phung mrâo wĭt sang mnă hlăm wưng 5 thŭn hŏng anei. Hluê anăn, mâo leh 45 čô dưi đru lĭng čan hlăm thŭn 2023, hŏng ênoh prăk čan kah knar mơ̆ng 70 – 100 êklăk prăk/ sa čô. Mĭn tĭng hlăm thŭn mrâo 2024, bruă anei srăng lŏ dơ̆ng ngă, jing anôk knang, đru kơ phung ngă soh jhŏng lŏ wĭt ñu kma hŏng ala ƀuôn, gĭr ktưn ngă pô klei hdĭp:

 “Kâo yap yuôm bhăn hŏng Knơ̆ng prăk đru ba ala ƀuôn hlăm klei đru, boh nik jing phung knuă druh ngăn prăk mâo klei hur har, ktuê dlăng jêñ jêñ êpul lĭng čan, đru ngă bi ênŭm hră mơar. Mâo pô bi leh hră mơar hlăm 1 truh 2 hruê, phung knuă druh đru bi leh hmar čiăng brei kơ diñu lĭng čan mđĭ kyar klei hdĭp mda”.

Dŭm mlan knhal jih thŭn 2023 mrâo êngao, ti čar Gia Lai mâo dŭm pluh čô mâo wĭt mơ̆ng sang mnă wĭt kơ alŭ wăl ăt mâo klei đru lĭng čan ngăn prăk. Nguyễn Triều Quang, k’iăng khua kiă kriê Knơ̆ng prăk đru ba ala ƀuôn čar brei thâo: hluê ngă djŏ hdră amâo mâo lui kơ sa čô ti tluôm mơ̆ng hdră, mơ̆ng krah mlan 10/2023, Knơ̆ng prăk kčưm kơ klei brei čan.

Hlăm wang êbeh sa mlan, brei čan leh êbeh 4 êklai prăk, kơ giăm 100 čô mâo ênŭm klei găl. Klă sĭt brei ƀuh, ênoh prăk anei dưi yua čiăng duh bi liê hlăm bruă lŏ hma, mnia mblei điêt leh anăn hriăm bruă. Hlăm wưng kơ anăp, mbĭt hŏng bruă lŏ dơ̆ng brei čan, knơ̆ng prăk lŏ dơ̆ng bi mbuôp hŏng dŭm êpul, dhar bruă, bruă sang čư êa alŭ wăl uêñ mĭn, mđĭ ai, đru kơ phung lĭng čan yua ngăn prăk tŭ dưn, mkŏ mjing lu klei găl čiăng kơ digơ̆ kpưn đĭ hlăm klei hdĭp.

“Hlăm wưng êgao, Knơ̆ng prăk đru ba ala ƀuôn bi mguôp kjăp hŏng dŭm êpul êya kđi čar yang ƀuôn jao leh anăn bruă sang čư êa alŭ wăl, kahan ksiêm, thâo klă boh sĭt, ksiêm dlăng klei čiăng mơ̆ng phung mrâo wĭt sang mñă. Hlăm wưng kơ anăp, Knơ̆ng prăk lŏ dơ̆ng thâo klă boh sĭt, hluê ngă hdră êlan mơ̆ng bruă sang čư êa čar čiăng ngă hdră anei jăk hĭn”.

Hdră brei čan hŏng phung mrâo wĭt mơ̆ng sang mnă hluê si hdră mtrŭn mrô 22/2023/QĐ-TTg hruê 17/8/2023 mơ̆ng Khua knŭk kna jing hdră yuôm bhăn. Bruă hnưm hluê ngă tŭ dưn ti čar Gia Lai dưi đru mguôp bi lar klei yuôm bhăn anăn, đru kơ phung tuôm lĕ hlăm klei soh mâo anôk knang kjăp bi hơĭt klei hdĭp leh anăn mâo klei găl kpưn đĭ./.