Gŏ sang Hồ Văn Lách ti alŭ Trung, să Trà Sơn, kdriêk Trà Bồng dôk hlăm ênoh gŏ êsi ƀun. Thŭn 2023, mâo hdră ala čar kñăm bi hrŏ ƀun hŏng klei kjăp, gŏ sang Hồ Văn Lách mâo đru leh 2 drei êmô ana mđai pioh rông. Ung mô̆ ñu, mâo mjuăt bi hriăm hdră rông êmô, mkra war êning. Ñu lŏ čan mâo 50 êklăk prăk mơ̆ng knơ̆ng prăk đru ba bruă yang ƀuôn hŏng mnga hdjul, mbĭt hŏng prăk bi đru mơ̆ng hdră ala čar kñăm bi hrŏ ƀun, ñu mâo mdơ̆ng leh sa boh sang mrâo kjăp hĭn. Hồ Văn Lách mơak leh diñu mâo bruă knuă mă hơĭt, kpưn đĭ tlaih mơ̆ng klei dleh dlan:

 “Mâo êmô jing jăk hĭn leh, mbĭt anăn lŏ mâo klei mjuăt bi hriăm. War êning mâo mkra kjăp siam prŏng, pla rơ̆k pioh čiêm êmô. Mmông wămn snăn hiu kiă êmô, bi tơdah amâo mâo wăn ôh, snăn nao wiă rơ̆k kơ êmô ƀơ̆ng. Mâo klei knŭk kna đru anei, hmei mâo klei lač jăk lu êdi kơ knŭk kna”.

 Bruă sang čư̆ êa kdriêk Trà Bồng, čar Quảng Ngãi mkŏ mjing leh lu adŭ mjuăt bi hriăm kơ dŭm gŏ êsei ƀun, lehanăn mnuih djuê ƀiă, ktrâo atăt kơ mnuih ƀuôn sang hdră pla mjing, rông mnơ̆ng čiăng mâo klei tŭ jing hĭn, tlaih mơ̆ng klei dleh dlan. Thŭn anei, să Trà Sơn, kdriêk Trà Bồng ktưn čiăng bi mâo êbeh 200 gŏ sang dưi tlaih mơ̆ng klei dleh dlan. Đinh Văn Phong, Khua să Trà Sơn, kdriêk Trà Bồng brei thâo, lu gŏ sang dôk dleh dlan hlăm să jing mnuih djuê ana Kor, dôk kƀah klei thâo săng, nao hiu êmuh hlăm grăp boh sang, si klei mĭn mnuih ƀuôn sang, čiăng thâo kơ klei duh ƀơ̆ng, leh kơ anăn mâo hdră êlan bi đru. Đinh Văn Phong brei thâo: Bruă sang čư̆ êa mtă leh kơ dŭm gŏ sang brei mâo klei ƀuăn yua prăk bi djŏ:

 “Dŭn dhar bruă êpul êya truh hŏng ƀuôn sang êmuh ai tiê klei mĭn mnuih ƀuôn sang, amâo mâo ngă klei mgô̆ ôh. Sitôhmô pô anei kƀah lăn pla mjing, pô anei amâo mâo sang dôk, pô adih čiăng mâo klei đru kơ hdră duh ƀơ̆ng, čiăng kơ êmô rông, čiăng kơ mjeh mnơ̆ng pla, snăn să mâo hdră mbha bi djŏ. Nâo djŏ hŏng ai tiê mnuih ƀuôn sang čiăng, čŏng diñu pô ruah mă, brei diñu ngă klei ƀuăn, bi tkưn tlaih mơ̆ng kllei dleh dlan”.

Thŭn 2020, hnơ̆ng ênoh gŏ êsei ƀun hlăm kdriêk Trà Bồng, čar Quảng Ngãi jing êbeh 42% snăn truh knhal jih thŭn 2023 knŏng adôk êbeh 29%. Kyua mâo hdră mơ̆ng lăn čar đru, truh ară anei, klei mưng mă bruă hđăp bi mlih leh. Boh nik, mnuih ƀuôn sang Cor ti kdriêk Trà Bồng lui leh klei mưng hiu duah ƀơ̆ng amâo mâo hơĭt sa anôk, mnuih ƀuôn sang mâo jao lăn, jao dliê, snăn klei hdĭp mâo leh lu klei bi mlih. Thŭn anei, kdriêk Trà Bồng ktưn msir truh 1.500 gŏ sang hlue hŏng hdră ala čar kñăm bi hrŏ ƀun hŏng klei kjăp. Nguyễn Văn Dũng, Khua bruă Đảng kdriêk Trà Bồng brei thâo: Bruă Đảng kdriêk mkŏ mjing ksiêm kơ bruă bi hrŏ ƀun ti 16 să hlăm kdriêk, păn kjăp ai tiê klei mĭn mnuih ƀuôn sang hlăm grăp boh ƀuôn, dŭm gŏ sang čiăng mâo hdră êlan bi djŏ hlăm bruă bi hrŏ ƀun:

 “Mrâo anei, khua bruă Đảng kdriêk đuĕ hiu truh leh jih 16 boh să, nao truh hlăm grăp boh ƀuôn čiăng ksiêm kơ bruă đru sang dôk, đru kơ klei duh ƀơ̆ng, lehanăn mâo klei gĭt gai truh hŏng grăp boh să tui si hdră êlan duh ƀơ̆ng mdê mdê. Ăt mâo mơh đa đa să, mâo ƀuôn anei jing mdê hŏng ƀuôn adih. Hdră kiă kriê mdê mdê mơh, đa krĭng jing nao hlăm bruă pla mjing, đa krĭng nao hlăm bruă rông mnơ̆ng, mâo hdră êlan ktrâo atăt mnuih ƀuôn sang bi djŏ tui si mdê bi ƀuôn lehanăn mdê bi gŏ sang, amâo mâo ôh klei ngă mă khă kơ leh”./.