Mâo anak dôk hriăm gưl 1, ƀiădah amai Nguyễn Thu Hương ti kdriêk čar Hai bà Trưng, ƀuôn prŏng Hà Nội amâo lŏ brei anak nao hriăm kơ êngao sang hră, kyua anak ñu hriăm jih sa hruê ti sang hră. Kyuanăn, êjai Phŭn bruă sang hră mơar ba mdah hdră mtrŭn mrô 29 bi klă kơ bruă mtô thiăm, hriăm thiăm, amai ƀuh hơ̆k mơak leh anăn sa ai:

Kâo tŭ ư hŏng dŭm klei čuăn kơ bruă sang hră gưl 1 amâo mâo guôn mtô thiăm. Kyuadah hlăm klei hriăm phung hđeh sang hră gưl 1, kâo mĭn klei hriăm hlăm sang hră ênŭm leh, phung hđeh ăt hriăm jih hruê ti sang hră leh, tơdah lŏ nao hriăm thiăm mmăt jing êmăn êdi. Tơdah hriăm thiăm phung anak srăng hriăm thiăm dŭm mta thâo kơ pô srăng găl guôp hĭn hlăm wưng ară anei.

Ti Dak Lak, leh hdră mtrŭn mrô 29/2024/TT-BGDĐT mơ̆ng Phŭn bruă sang hră mơar dưi ba mdah leh anăn dưi dưn mơ̆ng hruê 14/2, lu sang hră ti čar Dak Lak mdei leh bruă mkŏ mjing klei mtô thiăm, mkra mlih hdră êlan mtô čiăng găl guôp hŏng dŭm klei čuăn mrâo. Dŭm sang hră ti Dak Lak ăt hlăk mbang klei čuăn mrâo hŏng phung nai, phung hđeh sang hră leh anăn amĭ ama hđeh sang hră, mbĭt anăn mdei hĕ êjai klei mtô kơ êngao čiăng ksiêm dlăng, mkra mlih hdră êlan mtô găl guôp. Võ Ngọc Nam, khua kiă kriê sang hră gưl dua Phan Chu Trinh ( ƀuôn prŏng Ƀuôn Ama Thuôt, čar Dak Lak) brei thâo, sang hră hyuă kjăp mta phŭn hdră mtrŭn truh kơ jih jang phung nai, amĭ ama hđeh leh anăn hđeh sang hră. Mbĭt anăn, mñă kơ 100% phung nai bi klă klei ƀuăn ngă jăk klei čuăn mtô kơ tač, hriăm kơ tač. Êngao kơnăn, sang hră ăt ksiêm dlăng, mkra mlih hdră êlan mtô bi hriăm čiăng rơ̆ng djŏ hŏng hdră mtrŭn.

Nai Nguyễn Thị Thu Hiền, nai mtô Ngữ văn ti sang hră gưl dua Phan Chu Trinh brei thâo, hdră mtrŭn mrô 29 jing hdră êlan djŏ klă. Bi kơ tĭng mkăn, lu phung ami ama ăt čiăng kơ anak lŏ hriăm kơ êngao, boh nik jing phung hđeh sang hră adŭ 9, adŭ 12 dôk dơ̆ng mŭt hlăm dŭm klei bi lông yuôm bhăn. Kyuanăn, čiăng mâo klei mtô klă klơ̆ng čiăng kơ phung amĭ ama hđeh sang hră thâo klă, amâo mâo bĭt ti anôk bruă anak nao hriăm.

Hluê si Võ Đức Tân, ñu dôk mâo anak dôk hriăm adŭ 11 ti kdriêk Čư̆ Kuiñ, čar Dak Lak, hdră mtrŭn mrô 29 đru kơ phung hđeh sang hră mâo mmông nao hgŭm hlăm dŭm mta bruă mkăn, bi hrŏ klei kpĭ klei hriăm hră. Ƀiădah, hŏng phung hđeh adŭ 9, adŭ 12, ksiêm wĭt klei hriăm jing yuôm bhăn sơnăk. Mâo anak dôk hriăm adŭ 11, ñu hmăng hmưi, dŭm gưl bruă srăng hnưm mâo klei mtô klă klơ̆ng čiăng kơ phung hđeh dưi hriăm ênŭm ƀiădah amâo mâo soh hŏng klei čuăn.

Hluê si hdră mtrŭn mrô 29 mơ̆ng Phŭn bruă sang hră mơar, amâo mâo ngă klei mtô kơ êngao hŏng hđeh sang hră gưl 1, êngao kơ mtô klei kdŏ mmuñ, mjuăt asei mlei, mtô kơ klei thâo hlăm klei hdĭp. Phung nao amâodưi mtô kơ êngao sang hră mă prăk hŏng phung hđeh sang hră nai anăn dôk mâo sang hră brei mtô ti sang hră. Klei anei dưi bi hrŏ bruă phung nai ba hđeh sang hră pô mtô kơ êngao, mgô̆ amĭ ama hđeh atăt anak nao hriăm kơ êngao. Mbĭt anăn ăt mđĭ hĭn bruă klam kriê dlăng mơ̆ng sang hră hŏng phung nai tĭ gŭ klei kiă kriê pô êjai ngă bruă mtô kơ êngao sang hră. Hluê si Khúc Thị Huệ, khua kiă kriê sang hră gưl 3 Ngọc Hồi, kdriêk Thành Trì, Hà Nội, dŭm klei čuăn hlăm hdră mtrŭn mrô 29 srăng đru mgaih msir đa đa klei čôñ ăl hlăm yang ƀuôn, mơ̆ng phung amĭ ama hđeh sang hră djŏ tuôm hŏng bruă mtô, hriăm hlăm sang hră leh anăn êngao sang hră ară anei. Sang hră ăt ngă jăk dŭm klei čuăn hluê si hdră mtrŭn ăt msĕ mơh klei mtô kơ Knơ̆ng bruă sang hră mơar Hà Nội:

Sang hră mdei êjai bruă mtô êngao kơ hđeh sang hră mơ̆ng hruê 14/2. Thŭn anei lŏ dơ̆ng ksiêm wĭt klei hriăm kơ phung hđeh hriăm awăt adŭ 12 čiăng mâo klei hriăm thiăm đru kơ gưl bi lông bi ruê̆ gưl 3 amâo mâo mă prăk. Hđeh sang hră adŭ 12 mơ̆ng sang hră jing lu, sang hră dôk tă hdră ksiêm wĭt klei hriăm  kơ diñu pluă mbĭt hlăm dŭm hdră bi hriăm yang đar, phung nai ăt brei dŭm klei hriăm, mta phŭn hriăm. Tơdah leh mlan 5 sang hră ka mkŏ mjing hdră êlan anăn, kyuanăn klei djŏ tuôm hŏng ênoh prăk wĭt hriăm kơ phung hđeh sang hră ăt jing lu êdi.

Hlăm boh sĭt, bruă mtô kơ êngao, hriăm kơ êngao jing klei čiăng êdi leh anăn klă klơ̆ng mơ̆ng phung nai, phung hđeh sang hră leh anăn gŏ sang. K’iăng khua Phŭn bruă sang hră mơar Phạm Ngọc Thưởng ăt mñă klă, klei mĭn mơ̆ng phŭn bruă jing amâo mâo kăm bruă mtô kơ êngao, hriăm kơ êngao, ƀiădah čiăng êdi srăng ba mdah dŭm klei čuăn čiăng kriê dlăng jăk bruă anei:

Tơdah phung nai ngă ênŭm leh anăn mtô djŏ mmông pô leh anăn bi klă găl guôp phung hđeh sang hră amâo mâo guôn hriăm kơ êngao, djăp ênŭm leh klei čuăn mơ̆ng hdră hriăm. Ƀiădah amâodưi kluôm dhuôm ôh. Msĕ lač leh jing klei čiăng êdi, phung hđeh sang hră čiăng hriăm kơ êngao čiăng mđĭ hĭn klei hriăm pô. Klei mĭn kluôm mơ̆ng khua gĭt gai Phŭn bruă sang hră mơar jing kriê dlăng mta phŭn anei brei djŏ klei čuăn, ngă kơ bruă mtô kơ êngao, hriăm kơ êngao leh anăn bruă knuă mơ̆ng phung nai dưi khuăt leh anăn djŏ, ngă kơ bruă sang hră mơar, mơ̆ng phung nao klă sĭt jing năng mpŭ.

Hdră mtrŭn mrô 29 mơ̆ng Phŭn bruă sang hră mơar ba mdah hlăm thŭn hriăm dưi đru hmăi kơ hdră êlan mtô bi hriăm akŏ thŭn hriăm mơ̆ng sang hră leh anăn mơ̆ng phung hđeh sang hră. Khădah sơnăn, ƀiădah ăt mâo lu klei blŭ mguôp mñă klă, tơdah dŭm sang hră, phung nai, bruă sang čư̆ êa alŭ wăl ngă jăk hdră mtrŭn mrô 29 srăng ba bruă mtô kơ êngao sang hră nao djŏ êlan, bi hrŏ klei mgô̆ hđeh sang hră hriăm thiăm ngă truh klei ăl čôñ hlăm yang ƀuôn.