Êbeh sa mlan hŏng anei, mơ̆ng hruê dôk hlăm sang klei khăp mơ̆ng dhar bruă kahan ksiêm mđup brei, H’Wăn Ƀuôn Yă, ti alŭ 2, să Ea Siên, wăl krah Ƀuôn Hồ ăt dôk mâo nanao ai tiê hơ̆k mơak. Ñu brei thâo, jing mniê djiê ung rông anak hjăn, lu thŭn dôk ti sang arăng, 2 sào lăn knŏng djăp ƀơ̆ng, kyuanăn bruă rŭ sang dôk kjăp knŏng msĕ hŏng sa klei êpei.

 “Kahan ksiêm brei sang kơ kâo kâo mơak êdi. Mơ̆ng hruê dôk ti sang anei ƀuh mâo klei suaih pral, ai tiê jăk mơh, amâo lŏ mâo klei rŭng răng ôh. Kâo mduôn leh, amâo lŏ mâo ai mă bruă, amâo mâo prăk rŭ mdơ̆ng sang dôk. Dôk ti sang ayŏng nanao kăn găl lei mơh. Lač jăk kơ êpul kahan ksiêm leh anăn dŭm gưl bruă.”

Ăt mâo klei hơ̆k mơak êjai mŭt dôk hlăm sang mrâo, Trần Anh Dũng, 58 thŭn, ti alŭ 3, să Knông lăn Ea Bŭng, kdriêk Ea Sup, čar Dak Lak brei thâo:

        “Thŭn 1980 gŏ sang kâo mơ̆ng Đà Nẵng hriê dôk ti Ea Sup. Kyua dleh dlan yơh dôk ti sang mdhă ka truh mơh 20 m2, hjan ƀrôč, mđiă bhul. Mâo kahan ksiêm kdriêk Ea Sup leh anăn dŭm gưl bruă rŭ mdơ̆ng brei sang dôk kjăp, ară anei mâo sang mrâo amâo lŏ hŭi kơ hjan hlĭm, bruih ƀram, gŏ sang kâo hơ̆k mơak êdi.”

Ea Sup jing kdriêk tal êlâo ti čar Dak lak bi leh hnơ̆ng čuăn rŭ mjing 80 boh sang mđup brei kơ dŭm gŏ sang dleh dlan êlâo kơ yan hjan hlĭm. Đại úy Hoàng Thế Quang, Khua êpul kčĕ bruă, kahan ksiêm kdriêk Ea Sup brei thâo:

          “Kahan ksiêm mñă leh kơ dŭm anôk bruă mkăp brei mnơ̆ng rŭ mjing msĕ si phung rŭ mjing brei čan prăk blei mnơ̆ng leh anăn đru brei prăk mưn, čiăng hmao bi leh dŭm boh sang đru kơ dŭm gŏ sang.”

Dak Lak jing čar mâo ênoh mnuih ƀuôn sang lu hĭn krĭng Lăn Dap Kngư hŏng 1,95 êklăk čô, 49 djuê ana ayŏng adei hdĭp mda. Hnơ̆ng gŏ sang ƀun ƀin mơ̆ng čar ară anei adôk giăm 8%. Đru kơ dŭm gŏ sang mdul ƀiă klei dleh dlan, mơ̆ng krah mlan 3/2024, Phŭn bruă kahan ksiêm hluê ngă hdră rŭ mjing 1.200 sang klei khăp ti Dak Lak. Grăp boh sang mâo ênoh 80 êklăk prăk, hlăm anăn Phŭn bruă kahan ksiêm đru 50 êklăk prăk, bruă sang čư êa đru kdrêč adôk, kahan ksiêm dŭm kdriêk, să đru hruê ai. Sang hrŭ mjing hŏng rup bi hmô 36B (Phŭn bruă kahan ksiêm), ênhă 36m2, mtih ƀrick, čuôr hŏng tôl, ƀăng bhă msei leh anăn triă ƀrĭk. Hluê si Thiếu tướng Lê Vinh Quy – Khua kiă kriê kahan ksiêm čar Dak Lak, truh kơ wưng anei, hlăm čar dưi ngă leh 500 boh sang jao kơ mnuih ƀuôn sang. Ară anei kahan ksiêm dŭm kdriêk, wăl krah, ƀuôn prŏng dôk mtrŭt bi hmar čiăng rŭ mdơ̆ng jih jang êlâo kơ hruê 30/10/2024.

 “Hmei bi mguôp hŏng dŭm knơ̆ng, dhar bruă, bruă sang čư êa dŭm alŭ wăl leh anăn mđĭ hĭn êpul bruă mđing kơ nah gŭ čiăng đru kơ mnuih ƀuôn sang hruê ai leh anăn bruă mkŏ mkra kơ mnuih ƀuôn sang. Êngao kơ rơ̆ng hnơ̆ng tŭ jăk, kahan ksiêm čar ăt mñă kơ kahan ksiêm dŭm alŭ wăl srăng ngă hlăm wưng hnưm hĭn ba jao kơ dŭm gŏ sang, mkŏ mjing klei găl brei diñu mâo klei hơĭt mă bruă knuă.”

          Hdră rŭ mjing 1.200 boh klei khăp mđup brei kơ dŭm gŏ sang dleh dlan bi êdah klei uêñ mĭn mơ̆ng Phŭn bruă kahan ksiêm hŏng mnuih ƀuôn sang čar Dak Lak. Bruă anei đru mguôp klă klơ̆ng kơ bruă bi hơĭt klei hdĭp yang ƀuôn, mkŏ mkra krĭng ƀuôn sang mrâo, mtrŭt mđĭ bruă “Jih jang mnuih ƀuôn sang răng mgang klei êđăp ênang lăn čar”, mđing truh bi hdơr 120 thŭn hruê mkŏ mjing čar Dak Lak.

Êlâo kơnăn, kahan ksiêm čar Dak Lak leh anăn kahan ksiêm kdriêk Čư̆ Kuiñ ăt bi mguôp hŏng bruă sang čư êa alŭ wăl mkŏ mjing knăm rŭ mdơ̆ng “Sang klei khăo” kơ găp djuê, gŏ sang kahan ksiêm djiê êngiă Trần Quốc Thắng, jing kahan ksiêm să Ea Tiêu djiê leh hlăm boh klei hruê 11/6.

Hlue ngă hdră êlan mơ̆ng Đảng, knŭk kna leh anăn Phŭn bruă kahan ksiêm kơ bruă kriê dlăng phung kahan êka, gŏ sang lĭng kahan djiê êngiă, phung mâo bruă tŭ dưn, hlăm wưng êgao, Keh prăk ƀĭng hgŭm Phŭn bruă kahan ksiêm, Keh prăk ƀĭng hgŭm kahan ksiêm čar Dak Lak mbĭt hŏng klei đru mguôp, klei đru mơ̆ng jih jang êpul kahan ksiêm hlăm lăn čar, đru leh sa ênoh 500 êklăk prăk čiăng rŭ mdơ̆ng sang klei khăp kơ gŏ sang Thiếu tá, kahan ksiêm êngiă asei Trần Quốc Thắng.