Anôk bruă đrua ba ala ƀuôn čar gang mkhư̆ mơ̆ng sui jing anôk sang hơuh mđao mơ̆ng lu phung hđeh mâo klei hdĭp dleh dlan. Mâo đa đa phung hđeh hdĭp tinei mơ̆ng hlăk mrâo k’kiêng, lu phung hđeh hriê tinei êjai mâo klei trh tơl. Adei Kpuih h’Kiêu, brei thâo:

 “Kâo leh anăn adei kâo dôk ti nei giăm 7 thŭn leh. Mơ̆ng hruê hriê tinei mâo phung nai kriê dlăng jăk êdi, lač jăk kơ phung nai rông ba hmei đĭ hriê kơ prŏng”.

Aduôn Tạ Thị Anh Đào, Khua kiă kriê anôk bruă đru ba ala ƀuôn čar Gia Lai brei thâo, anôk bruă dôk rông êbeh 60 čô hđeh êrĭt amĭ ama leh anăn phung hđeh amâo mâo jăk asei mlei. Phung nai, phung mă bruă mâo nanao klei khăp, răng kriê phung hđeh msĕ si anak čô pô.

 “Êngao kơ bruă hluê ngă hdră mtrŭn mrô 20 mơ̆ng knŭk kna, phung hđeh mâo prăk huă ƀơ̆ng, prăk yua, čhum ao čŭt hơô…Êngao kơnăn, anôk bruă lŏ mâo klei uêñ mĭn, klei đru mơ̆ng dŭm êpul êya, grăp čô čiăng kơ phung hđeh mâo klei hdĭp jăk hĭn. Si srăng ngă čiăng kơ phung hđeh ƀuh pô ăt mâo nanao klei khăp, klei kơup mgang mơ̆ng yang ƀuôn”.

Klei hưn mơ̆ng knơ̆ng bruă mnuih mă bruă kahan êka leh anăn ala ƀuôn čar Gia Lai, hlăm čar mâo êbeh 5000 čô hđeh mâo klei hdĭp dleh dlan. Mbĭt hŏng anăn jing dŭm êtuh êbâo čô hđeh ti dŭm krĭng dlan dlan. Hŏng klei kñăm răng mgang klei dưi êngiê mơ̆ng phung hdeh leh anăn gang mkhư̆ klei ngă pĕ êka hlăm phung hđeh, dŭm dhar bruă, alŭ wăl mkŏ mjing lu mta bruă hâo hưn, mđĭ klei thâo săng leh anăn bruă klam yang ƀuôn. Phạm Trần Anh, k’iăng khua knơ̆ng bruă mnuih mă bruă kahan êka leh anăn ala ƀuôn čar Gia Lai, lač:

 “Ti Gia Lai, boh nik ti dŭm krĭng taih kbưi, anôk hlăp lêñ kơ phung hđeh kƀah êdi. Knơ̆ng bruă ăt mñă kơ dŭm êpul bruă hlăm wưng yan mdei prŏng mkŏ mjing dŭm anôk hlăp lêñ kơ phung hđeh hlăm dŭm hruê mdei sang hră čiăng mâo anôk hlăp lêñ êđăp ênang, ñĕ kơ klei phung hđeh duah nao hlăm dŭm anôk huĭ hyưt huĭ dah mâo klei truh tơl”.

Thŭn êlâo, Keh prăk đru kơ phung hđeh čar Gia Lai iêo mkrum mâo êbeh 3,380 êklai prăk, mâo prăk leh anăn mnơ̆ng dhơ̆ng đru. Mơ̆ng ênoh anei, hlăm thŭn 2023 leh anăn 6 mlan akŏ thŭn 2024, Êpul kriê dlăng kreh prăk kah leh 2,435 êklai prăk ngă bruă mbraih kboh kơ 20 čô hđeh mâo klei kdĭp dleh dlan, 17 čô hđeh kblač kƀuê, mđup brei 50 boh êdeh wai jơ̆ng kơ phung hđeh mâo klei hdĭp dleh dlan.

Ayŏng Đỗ Đức Thanh, k’iăng khua bruă êdam êra čar Gia Lai brei thâo, hlăm mlan ngă bruă kyua phung hđeh thŭn anei, phung êdam êra hlăm čar mđup brei leh dŭm êbâo hnư mnơ̆ng, klei bi hmô hdră duh ƀơ̆ng, mkŏ mjing hdră mlih djah ksŭ mă hnư mnơ̆ng, mđup brei êdeh wai jơ̆ng kơ phung hđeh mâo klei hdĭp dleh dlan, kñăm mđĭ ai phung hđeh:

  “Êpul khua bruă êdam êra čar ăt ba mdah dŭm hnơ̆ng čuăn jing dŭm êpul bruă êdam êra lŏ dơ̆ng đru kơ phung hđeh mâo klei hdĭp dleh dlan, mâo hră anăn leh anăn bruă ngă klă klơ̆ng, amâodjŏ knŏng hŏng mnơ̆ng dhơ̆ng, ai dưi leh anăn dŭm hnư mnơ̆ng, ƀiădah lŏ mkŏ mjing klei êmuh hrăm, mđĭ ai, đru kơ diñu hlăm klei hriăm hră mơar leh anăn klei hdĭp”.

Kyuadah jing čar mâo lu mnuih djuê ƀiă, bruă duh mkra adôk lu klei dleh dlan, čiăng êdi klei gĭr jêñ jêñ leh anăn klei hrăm mbĭt mơ̆ng êpul êya ala ƀuôn hlăm bruă răng kriê kơ phung hđeh.

Răng mgang, kriê dlăng leh anăn mtô mjuăt phung hđeh ară anei jing mkŏ mjing ai dưi tŭ jăk, jing mta phŭn mkŏ mjing klei đĭ kyar kjăp mơ̆ng lăn čar êdei anăp. Mlan ngă bruă kyua phung hđeh jing wưng čiăng kơ dŭm gưl bruă, dhar bruă, phung mâo ai tiê kmah hlăm čar bi êdah bruă klam hlăm bruă răng mgang, kriê dlăng leh anăn mtô mjuăt phung hđeh. Knơ̆ng bruă mnuih mă bruă kahan êka leh anăn ala ƀuôn čar Gia Lai iêo mthưr dŭm êpul êya, grăp čô, knơ̆ng bruă, phung mâo ai tiê kmah hrăm mbĭt sa ai đru hŏng dŭm mta bruă klă klơ̆ng, tŭ dưn kơ phung hđeh mâo klei hdĭp dleh dlan, phung hđeh awăt êdu…hŏng keh prăk đru kơ phung hđeh čar Gia Lai. Hŏng klei gĭr mơ̆ng ala ƀuôn, phung hđeh mâo klei hdĭp dleh dlan ti Gia Lai mâo klei kriê dlăng, răng mgang leh anăn mâo klei hdĭp jăk hĭn.