Gưl êa lip prŏng knhal jih thŭn  leh êgao, ba klei luič liê prŏng kơ lu boh čar, ƀuôn prŏng hlăm alŭ wăl kwar krah lehanăn lăn dap kngư. Leh gưl klei truh tơl mơ̆ng yan adiê ngă, mnuih ƀuôn sang dơ̆ng lŏ kgŭ, pral čiăng bi hơĭt klei hdĭp mda.

Amâo mâo djŏ knŏng dŏng đru mnuih ƀuôn sang mơ̆ng klei êa lip, leh găn klei truh anei, lĭng kahan truh mtam hlăm djăp anôk čiăng đru kơ dŭm alŭ wăl mghaih msir boh mơ̆ng keli truh tơl. Lĭng kahan đru mghaih msir mơ̆ng dŭm anôk êa ngăm hwai jih lŭ lăn hlăm dŭm boh sang êa drao, mbha mnơ̆ng ƀơ̆ng huă kơ mnuih ƀuôn sang, lehanăn dlăng kriê klei suaih pral kơ mnuih ƀuôn sang kbiă hriê mơ̆ng klei êa lip. Aê mdrao Võ Thôi, K’iăng khua sang êa drao prŏng alŭ wăl Quảng Nam, brei thâo:

“Leh găn klei êa lip lêč knơ̆ng bruă kahan ƀuôn prŏng Đà Nẵng lehanăn anôk bruă răng mgang alŭ wăl 5 tiŏ nao lehanăn mâo mtam bruă ngă čiăng păn kjăp jih jang boh klei. Leh mâo klei êa hrŏ ti sang êa drao adôk hlăm brô tăp kđao, kliăng jơ̆ng, snăn knơ̆ng bruă kahan ƀuôn prŏng Đà Nẵng lehanăn anôk bruă răng mgang alŭ wăl 5 nao đru mtam kơ sang êa drao bi mdoh lŭ lăn. Lač jăk kơ lĭng kahan mâo hriê đru leh.”

Dŭm êbâo čô mnuih ƀuôn sang mâo leh lĭng kahan pral hmao đru dŏng, tlaih mơ̆ng klei êa lêč. Leh dŭm klei êa lip, ka yŏng mâo mdei ôh, knuă druh lĭng kahan lŏ dơ̆gn đuĕ nao. Ngă “Hdră êlan Quang Trung” mơ̆ng khua knŭk kna mtrŭt mjhar, kahan alŭ wăl 5 lŏ truh hlăm krĭng găn leh klei êa lip lêč kjham, pioh đru mnuih ƀuôn sang rŭ mdơ̆ng pưk sang. Dŭm hrue anei, dŭm êbâo čô knuă druh lĭng kahan lŏ nao đru mnuih ƀuôn sang rŭ mdơ̆ng pưk sang, hrue mlam dôk mdơ̆ng dôk klia hŏng klei mjêč mă bruă čiăng pral mâo sang dôk kơ mnuih ƀuôn sang. Mă bruă lu, mdei ƀiă, hnêč jih hrue mmông êjai adiê mđiă siam čiăng mkra hĕ sang, bi hơĭt anôk kơ mnuih ƀuôn sang dôk êlâo kơ Tết Nguyên đán.

Trung úy Phạm Ngọc Dân, Tiểu đoàn 303, Trung đoàn 584, hlăm knơ̆ng kiă kriê kahan čar Daklak, hlăk mđrăm mbĭt hŏng êpul lĭng kahan rŭ mdơ̆ng pưk sang kơ mnuih ƀuôn sang, ñu lač:

“Hlue ngă klei khua knŭk kna mtrŭt mjhar, lĭng kahan alŭ wăl lehanăn dŭm êpul êya kahan mơ̆ng phŭn bruă lĭng kahan jih ai tiê hrue mlam, amâo mâo uêñ kơ adiê mđiă thâodah hjan. Phung ayŏng adei gĭr hlăm klei dleh dlan, kƀah wư hlăm djăp mta mnơ̆ng mnuă mă bruă, ƀiădah ăt ktưn čiăng bi leh êlâo kơ hrue 15/1/2026 truh ƀiă êdi mâo 50% ênoh boh sang tui si alŭ wăl jao kơ kahan alŭ wăl 5 lehanăn êpul êya kahan mơ̆ng phŭn bruă lĭng kahan rŭ mdơ̆ng hlăm alŭ wăl.”

Dŭm êbâo čô knuă druh, lĭng kahan alŭ wăl 5 hlăk dôk hlăm djăp anôk dŭm boh ƀuôn alŭ hmăi mơ̆ng klei êa lip lêč, dôk bi đru mdơ̆ng sang mrâo, mkra wĭt pưk sang kơ mnuih ƀuôn sang. Hŏng klei đua klam, klei hur har mơ̆ng kahan Awa Hồ mâo leh klei hmăi jăk hŏng ai tie emnuih ƀuôn sang kwar krah  - Lăn dap kngư. Ƀuh lĭng kahan suăi êmăn, mnuih ƀuôn sang hlăm alŭ, ƀuôn bi knă êsei, bi tŭk êa, jih jang bi krăp nao bi đru mbĭt klam jih jang klei dleh dlan. Krah krĭng lăn dôk găn klei luič rai leh klei êa lip lêč, snăn ai tiê klei khăp lĭng kahan lehanăn mnuih ƀuôn sang sĭt suôr hĭn, h’uh mđao hĭn. Nguyễn Thị Mận, ti ƀuôn hgŭm Hòa Thịnh, čar Daklak, mgei ai tiê lač:

“Ƀuh phung lĭng kahan mă bruă suăi êmăn, pap snăk, mơ̆ng anăn mâo phubng amai adei, nao bi đru ya mta bruă dưi ngă. Hmei đru lĭng kahan, knă kơ diñu êsei huă bi jăk čiăng mâo klei suaih pral mdơ̆ng sang kơ mnuih ƀuôn sang”.

Mbĭt hŏng anăn, dôk mbĭt, mă bruă mbĭt, bi yăl dliê hŏng mnuih ƀuôn sang. Ai tiê klei khăp mnuih ƀuôn sang lehanăn lĭng kahan knư̆ hrue knư̆ mâo hyuă kjăp hĭn, mjing leh ai ktang kjăp hlăm mnuih ƀuôn sang, jing lŏ dơ̆ng thiăm klei ktang kơ lĭng kahan alŭ wăl 5 kjăp knhuang hlăm mta êlan rŭ mdơ̆ng lehanăn răng mgang lăn čar. Thiếu tướng Lương Đình Chung, pô ngă bruă kđi čar hlăm kahan alŭ wăl 5 lač, dăl hlăm 81 thŭn rŭ mdơ̆ng, bi blah, lehanăn đĭ hriê kơ prŏng, lĭng kahan yang ƀuôn Việt Nam mâo nanao bruă klam ba akŏ, kyua mnuih ƀuôn sang mă bruă:

“Lĭng kahan mơ̆ng mnuih ƀuôn sang yơh kbiă, kyua mnuih ƀuôn sang yơh bi blah”. Dôk hlăm alŭ wăl kwar krah lăn dap kngư, krĭgn lăn găn nanao klei amâo mâo jăk mơ̆ng yan adiê, knuă druh, lĭng kahan mơ̆ng alŭ wăl 5 thâo ƀuh klă klei đru mnuih ƀuôn sang jing asăp mtrŭn mơ̆ng ai tiê, truh hŏng mnuih ƀuôn sang bi pral mtam. Hmei mâo đru leh sa kdrêč mbĭt hŏng jih jang bruă kđi čar, lehanăn hŏng jih jang mnuih ƀuôn sang hlăm alŭ wăl mâo lĭng kahan dôk, mđrăm mbĭt hgao klei dleh dlan mơ̆ng klei êa lip lêč. Tơdah mnuih ƀuôn sang lehanăn dŭm alŭ wăl dưi găn klei truh tơl mơ̆ng êa lip lêč, snăn phung knuă druh, lĭng kahan alŭ wăl ƀuh mơak ai tiê êdi.”

Ti krah klei hlĭm hjan, êa lip lêč, lehanăn dŭm klei dleh dlan dôk găn, snăn mâo lĭng kahan alŭ wăl 5 truh mtam, siă suôr hŏng mnuih ƀuôn sang, jing leh anôk kơ mnuih ƀuôn sang jưh knang. Hrue mmông srăng êgao, ƀiădah klei thâo khăp lĭng kahan lehanăn mnuih ƀuôn sang dôk nanao. “kahan awa Hồ – jing lĭng kahan kơ mnuih ƀuôn sang” – klei anăn hlŏng jiă kđăm leh hlăm ai tiê klei mĭn mnuih ƀuôn sang kwar krah, lăn dap kngư./.