Ngă “Hdră êlan Quang Trung”, kahan alŭ wăl 5 ktuh êyuh leh đru bi rŭ mdơ̆ng truh 610 boh sang mrâo, lehanăn mkra wĭt 314 boh sang jhat hlăm alŭ wăl mâo kahan kiă kriê. Hjăn čar Daklak, mâo 331 boh sang dưi mdơ̆ng mrâo, hlăm anăn 96 dưi bi leh lehanăn jao hlăm gưl tal êlâo. Blŭ hrăm hlăm knăm anei, Trung tướng Lê Ngọc Hải - Khua knơ̆ng kiă kriê kahan alŭ wăl 5 brei thâo, hlue ngă "Hdră êlan Quang Trung”, lĭng kahan truh hŏng mnuih ƀuôn sang pral hĭn, čiăng đru mnuih ƀuôn sang pral hĭn, mdơ̆ng mrâo lehanăn mkra wĭt sang kơ mnuih ƀuôn sang, bi hơĭt klei hdĭp êlâo kơ Tết hŏng klei djăp ênŭm. Dŭm boh sang mrâo mdơ̆ng amâo mâo djŏ knŏng jing anôk dôk, ƀiădah lŏ anôk jưh knang hơĭt, mđĭ thiăm ai tiê mnuih ƀuôn sang hgao klei dleh dlan, rŭ mdơ̆ng klei hdĭp leh klei êa lip.

- kahan alŭ wăl 5 bi leh lehanăn jao 96 boh sang mơ̆ng “hdră êlan Quang Trung" ti Daklak

         -Knơ̆ng gĭt gai lĭng kahan krĭng nao čuă, mđĭ ai gŏ sang Lê Thị Đã              

Ti Khánh Hòa, gưl jao sang tal anei mâo 6 gŏ sang hlăm ƀuôn hgŭm Đô Vinh, să Phước Hâụ lehanăn să Tây Khánh Sơn. Čiăng dŭm boh sang dưi ngă leh djŏ wưng, Knơ̆ng gĭt gai kahan krĭng 5 gĭt gai leh Knơ̆ng gĭt gai lĭng kahan čar Khánh Hòa bi hgŭm hŏng Krĭng êa krĭng 4, Lữ đoàn Đặc công kahan êa mrô 5 lehanăn êpul kahan alŭ wăl, amâo uêñ klei dleh dưi ksiêm dlăng mơ̆ng yan adiê, mkŏ mjing hdră hluê ngă jih hruê mlam, wăt hruê mdei. Hlăm anăn, Knơ̆ng gĭt gai lĭng kahan čar Khánh Hòa, Krĭng êa krĭng 4, Lữ đoàn Đặc công kahan êa mrô 5, grăp êpul đru mdơ̆ng 2 boh sang. Blŭ ti knăm anei, Thiếu tướng Trần Thanh Hải, Kơiăng khua gĭt gai kahan krĭng 5, mñă, Hdră bruă Quang Trung, jing klei bi êdah kơ ai tiê thâo bi đru, knhuah siam mơ̆ng mnuih Việt Nam hlăm mmông dleh dlan, bi êdah klă hdră “Ti anôk mnuih ƀuôn sang dleh dlan, tinăn mâo lĭng kahan”.