Truh ară anei, Adŭ bruă Phŭn bruă kahan ksiêm tŭ mă leh giăm 90 êklai prăk đru kơ hdră msir mghaih klei truh mơ̆ng yan adiê ngă. Hluê ngă “Hdră bruă Quang Trung” mâo Khua knŭk kna mtrŭt mjhar, Phŭn bruă kahan ksiêm mâo jao gĭt gai mdơ̆ng mrâo 429 boh sang đru kơ mnuih ƀuôn sang ti 8 čar kwar Krah – Lăn dap kngư. Truh ară anei, mâo leh 19 boh sang dưi ngă leh, êgao hdră kčah, lu hdră mkăn hlăk dôk ngă êbeh 70%. Jih jang ênoh sang tĭng srăng jao êlâo kơ hruê 15/1/2026, gĭr bi leh hnưm hĭn mơ̆ng 10 – 15 hruê ti dŭm alŭ wăl.

Bi ala phung khua kiă kriê dŭm alŭ wăl hưn mdah leh klei thâo kơ bruă hŏng hdră “4 tinei mtam” hlăm hdră mdrơ̆ng hŏng klei yan adiê ngă lehanăn hdră jak iêu dŭm êpul êya phŭn čiăng krơ̆ng kjăp klei êđăp ênang ti dŭm krĭng kreh mâo klei êa lip lêč, hdră hâo hưn kơ klei adiê hjan êa lip, msir mghaih klei truh mơ̆ng yan adiê ngă…

Thiếu tướng Nguyễn Hữu Phước, Khua knơ̆ng Anôk bruă kahan ksiêm čar Khánh Hòa brei thâo, gưl adiê hjan êa lip ti Khánh Hòa wưng êgao ngă êngăp êa ti lu anôk, êbeh 100.000 gŏ sang hmăi djŏ, luič liê êbeh 5.000 êklai prăk. Kahan ksiêm čar ba nao leh 6.500 čô knuă druh, lĭng kahan nao đru, mbĕ mnuih ƀuôn sang, msir mghaih klei truh mơ̆ng yan adiê ngă. 800 kdrăp mnơ̆ng dưi ba nao, đru giăm 20 êbâo čô mbĕ nao kơ anôk êđăp ênang. Leh gưl adiê hjan êa lip, Kahan ksiêm čar rŭ mdơ̆ng leh 24 boh sang hlăm “Hdră bruă Quang Trung”:

“Hmei mprăp kah mbha êpul, kdrăp mnơ̆ng hluê ngă bruă klam. Hdră mĭn jing ya mnơ̆ng mâo hlăm kiê kngan gĭr nao đru jih kơ mnuih ƀuôn sang. Knuă druh, lĭng kahan gưl să, êpul kahan răng mgang klei êđăp ênang ala ƀuôn mđrăm mbĭt pŏk ngă hdră msir mghaih klei truh mơ̆ng adiê hjan êa lip ngă ti alŭw ăl. Tăp êa hrŏ, bi mdoh tăp anăn”.

Thiếu tướng Nguyễn Hồng Nguyên, kơiăng khua adŭ bruă mơ̆ng Phŭn bruă kahan ksiêm bi mni ai tiê đua klam, klei pral kdal lehanăn boh tŭ dưi mâo hlăm hdră mtô mblang kơ bruă sowil lehanăn “Hdră bruă Quang Trung"mŏng dŭm êpul, alŭ ưăl, mbĭt anăn mñă anei jing bruă klam mâo Phŭn bruă kahan ksiêm mđing dlăng gĭt gai nanao.

Thiếu tướng Nguyễn Hồng Nguyên mtă kơ dŭm êpul, kahan ksiêm alŭ wăl hluê ngă kjăp klei gĭt gai mơ̆ng Đảng, Knŭk kna. Mbĭt anăn lŏ dơ̆ng mtrŭt mđĭ hdră hâo hưn, mtô mblang, boh nik hlăm wăl anôk êlan mạng, mjing klei bi mlih hlăm klei thâo săng, hdră kiă kriê, hluê ngă bruă klam, mkŏ mjing Êpul kahan ksiêm yang ƀuôn lehanăn rơ̆ng kjăp hdră bruă sowil, rơ̆ng klei êđăp ênang ala ƀuôn, msir mghaih klei truh mơ̆ng yan adiê ngă. Thiếu tướng Nguyễn Hồng Nguyên brei thâo:

TĐ:“Thŭn 2026, êpul kahan ksiêm yang ƀuôn mâo hdră bi lông 3 mrô sa: Hluê ngă klei bhiăn mrô sa, sĭt suôr mrô sa, giăm mnuih ƀuôn sang mrô sa. Kyua anăn, bruă klam hâo hưn kơ hdră kđi čar, hưn mthâo kơ pŏk rup kahan ksiêm yang ƀuôn jing lu tĭng lehanăn mâo klei bi mklin mbĭt”.