Hlăm dŭm hrue anei, hlăm bruă dôk bi rŭ mdơ̆ng sang dôk mrâo ti alŭ Phú Phong, ƀuôn hgŭm Hoà Thịnh, ai êwa klei mă bruă dôk mhjĭt m’uăt mơ̆ng aguah ưm kma tlam mmăt. Grăp čô lĭng kahan bŏ êa hŏ hang mđĭ klŏ ƀrĭk, klia sang, bi lŭk čuah simăng jih ai tiê bi tiŏ êran bruă rŭ mdơ̆ng sang dôk kơ mnuih ƀuôn sang. Hạ sĩ Thái Tiến Tài, Tiểu đoàn 35, Lữ đoàn Đặc công 198 brei thâo, grăp hrue dlăng kơ bruă rŭ mdơ̆ng anăp ƀuh sang kơ mnuih ƀuôn sang dơ̆ng leh, phung ayŏng adei hlăm êpul êya kahan bŏ hŏng klei mơak:

“Kâo ƀuh bŏ hŏng klei mơak kyua mâo đru mguôp ai tiê hlăm bruă rŭ mdơ̆ng pưk sang kơ mnuih ƀuôn sang krĭng êa lip anei. Leh truh kơ anei, ƀuh klei hdĭp mnuih ƀuôn sang dôk hlăm klei dleh dlan, dŭm boh sang klưh jih. Knhal tuič bruă knuă dơ̆ng êdah, sang pưk dơ̆ng leh, jing klei mơak êdi mi ma.”

Hŏng mnuih ƀuôn sang ti alŭ Phú Phong, ƀuôn hgŭm Hoà Thịnh, mâo êpul lĭng kahan truh, klă sĭt jing anôk jưh knang prŏng êdi. Nguyễn Thị Tám (80 thŭn), mgei ai tiê kyua mrâo hit dôk rŭng răng kyua pưk sang pô jih êa ngă, ară anei mprăp dơ̆ng đĭ dôk sang mrâo:

“Hlăk leh găn klei êa lip, ƀuôn sang rai răk, amâo mâo mĭn ôh hbĭl pô srăng lŏ mâo hĕ sa boh sang dôk msĕ snei. Ƀiădah ară anei mâo leh jing yuôm bhăn êdi, sa boh sang siam mâo lĭng kahan mdơ̆ng brei, hŏng klei pral jăk siam, mâo ruah jar sang djŏ hŏng ai pô čiăng. Ară anei hlei pô hriê čuă mâo klei bi mni sơăi.”

Pô kiă kriê ti anôk dôk rŭ mdơ̆ng, Thiếu tá Nguyễn Văn Vượng, Tiểu đoàn 35, Lữ đoàn Đặc công 198 brei thâo, alŭ wăl êpul lĭng kahan mă bruă dôk găn adiê hjan sui jih mlan. Êjai anăn, êlan klông lĕ điêt, dleh hlăm klei dŭ mdiăng mnơ̆ng pioh rŭ mdơ̆ng. Mâo alŭ ƀuôn dôk hlăm krah kdrăn lŏ, êlan klông dleh dlan, lĭng kahan rô̆ hlăm lŭ dŭ mnơ̆ng, klam simăng, dŭ ƀrĭk pioh mdơ̆ng sang. Ƀiădah hŏng ai tiê klei thâo gĭr, hrue lehanăn mlam mă bruă amâo mâo mdei, phung lĭng kahan bi mbha mmông, hnêč hlăm wưng adiê jăk siam mă bruă yơh čiăng bi leh pral.

“Hlăm bruă hriê đru mnuih ƀuôn sang kơ anei, hmei gĭr ktir jih ai tiê hŏng bruă klam, amâo mâo uêñ hrue mlam, adiê mđiă thâodah hjan. Phung lĭng kahan hur har jih ai tiê mă bruă hlăm klei thâo bi mguôp, bi mđĭ ai hdơ̆ng găp kñăm bi leh pral sang kơ mnuih ƀuôn sang.”

Truh ti wưng anei, “Hdră êlan Quang Trung” bruă mdơ̆ng sang kơ mnuih ƀuôn sang hlăm krĭng êa lip čar Daklak hlăk čhuang hlăm wưng knhal tuič. Hŏng Lữ đoàn Đặc công 198, mâo leh 5 boh sang dưi bi leh. Dŭm boh sang adôk srăng dưi jao hlăm dŭm hrue tinăp, êlâo kơ hrue 15/1/2026 tui si klei Khua knŭk kna kčah jao. Mbĭt hŏng anăn, čiăng đru mnuih ƀuôn sang pral mâo anôk hdĭp mda hơĭt, êpul êya lĭng kahan mprăp leh djăp ênŭm mnơ̆ng mnuă pioh yua msĕ si ti vi, jhưng mdhô̆, jhưng đih, gŏ bưng čhiên mngan êlâo kơ đĭ dôk sang mrâo. Thượng tá Phạm Sỹ Cương, K’iăng khua bruă kđi čar mơ̆ng Lữ đoàn Đặc công 198 brei thâo:

“Hmei jih ai tiê mơ̆ng akŏ mtam, hŏng hrue mmông mâo bi kčah, jih jang dŭm boh sang hmei rŭ mdơ̆ng jing truh ti hrue 9/1 srăng bi leh sơăi yơh, jao kơ mnuih ƀuôn sang. Mơ̆ng anăn, đru kơ mnuih ƀuôn sang mâo ƀơ̆ng Tết Bính ngọ klă sĭt mơak mñai, jăk yâo.”

Tết Nguyên đán 2026 hlăk dơ̆ng truh giăm leh, alŭ Phú Phong, ƀuôn hgŭm Hòa Thịnh, čar Daklak hlăk hơô leh hlăm asei pô sa kdrăp mrâo. Ti dlông ƀô̆ lăn bŏ hŏng djah mkăm mčah rai leh klei êa lip knhal jih mlan 11 thŭn 2025, dŭm boh sang kjăp mâo mdơ̆ng. Tinăn bi knăl kơ ai tiê krŭ kngan mơ̆ng lĭng kahan 198, jih ai tiê hlăm grăp mnĭt mmông kñăm čiăng pral mâo sang kơ mnuih ƀuôn sang dôk, bi hơĭt klei hdĭp mda.

Dŭm boh sang mrâo, amâo mâo djŏ knŏng dưi mdơ̆ng hŏng ƀrĭk lehanăn simăng, ƀiădah hŏng êa hŏ, hŏng klei bhiăn ktang lehanăn yuôm bhăn hĭn jing hŏng ai tiê klei khăp lĭng kahan hŏng mnuih ƀuôn sang. Bruă Lữ đoàn Đặc công bộ 198 (Binh chủng Đặc công- Phŭn bruă lĭng kahan) dôk ngă jing klei gĭr prŏng kñăm čiăng bi leh “Hdră êlan Quang Trung” lŏ sa blư̆ dơ̆ng mñă knhuah siam mơ̆ng lĭng kahan Awa Hô – mâo mtam tơdah mnuih ƀuôn sang čiăng, srăng gĭr hgao jih klei dleh dlan kyua klei hdĭp êđăp ênang kơ mnuih ƀuôn sang./.