Hlăm hjiê mkra mjing bŏ kdô kphê, Y- Jai Hđơ̆k, sa hlăm dŭm ƀĭng ngă lŏ hma ti ƀuôn Kla, ƀuôn hgŭm Êa Ana, čar Dak Lak nao hgŭm hlăm hdră bi hgŭm mđĭ boh yuôm kphê brei thâo, anei jing yan hrui êmiêt kphê tal 2 mơ̆ng leh mnuih ƀuôn sang bi hgŭm hŏng Anôk bruă Êđê Kphê, hŏng klei đru mơ̆ng Knŭk kna. Nao hgŭm hlăm hdră anei, mnuih ƀuôn sang mâo mjuăt bi hriăm kơ hdră mnêč, mkăp hbâo pruê, êa drao răng mgang mnơ̆ng pla mjing lehanăn mâo anôk bruă duh mkra hrui blei đĭ hĭn mkă hŏng wăl anôk mnia mblei. Klei ngă kơ Y- Jai mơak anăn jing boh tŭ ba wĭt thŭn anei đĭ êbeh 1,5 blư̆ mkă hŏng thŭn êlâo.

Kphê thŭn anei hrui pĕ lu êgai 2/3 mkă hŏng thŭn êlâo. Dưi bi hgŭm pla kphê snei jăk êdi hŏng mnuih ƀuôn sang. Tơdah knŭk kna mjing klei găl hĭn, kâo mĭn hdră pla kphê srăng đĭ kyar hơĭt kjăp.

Hdră ala čar kñăm bi hrŏ ƀun hơĭt kjăp wưng thŭn 2021 – 2025, sa hdră mtrŭn prŏng mâo Anôk bruă kƀĭn ala ba mdah, dưi hluê ngă kjăp ti Dak Lak. Hŏng Hdră bruă 3, sa hlăm 9 hdră bruă, 5 thŭn êgao mkăp leh êbeh 223 êklai prăk, đru kơ giăm 6.700 gru hmô pla mjing, bi lu jơr hdră duh ƀơ̆ng. Hlăm anăn, dŭm gru hmô bi hgŭm pla mjing mđĭ boh tŭ yuôm, ba wĭt leh boh tŭ dưn jăk siam. Amâo djŏ knŏng đru kơ mnuih ƀuôn sang mđĭ klei thâo pla mjing, mđĭ boh tŭ yuôm, gru hmô anei lŏ đru kơ anôk bruă duh mkra mâo krĭng pla mjing kjăp, kluôm, mkŏ mjing anăn knăl.

Hŏng Y - Pôt Niê, Khua anôk bruă Êđê Kphê, hdră mđĭ boh tŭ yuôm kphê mâo Knŭk kna đru dưi pŏk ngă ti krĭng ƀuôn sang, lŏ mjing boh tŭ yuôm hlăm ai tiê klei mĭn.

Mơ̆ng êlâo truh kơ ară anei, ka mâo mnuih Êđê ngă klei bi hgŭm kluôm. Kyua anăn tal êlâo ăt mâo klei đing mợh kơ Y - Pôt. Ƀiădah leh bi hgŭm mbĭt hŏng Knŭk kna, mâo knŭk kna đru sa kdrêč lehanăn pô đru sa kdrêč, mnuih ƀuôn sang mâo leh klei bi mguôp lehanăn mâo klei đăo knang hĭn. Kâo ƀuh hdră bi hgŭm anăn amâo djŏ knŏng ngă duh mkra ƀiădah boh tŭ yuôm hlăm ai tiê klei mĭn ăt jăk mơh.

Dak Lak leh bi mŭt mbĭt dưi pŏk mlar leh krĭng lăn, jing krĭng čư̆ čhiăng prŏng, krĭng nah Yŭ giăm êa ksĭ Ngŏ. Krĭng lăn mơ̆ng êbeh 50 djuê ana hrăm mbĭt hdĭp mda, ăt jing krĭng ngă lŏ hma lu jơr hŏng kphê, durian, tiêu, ca cao ba akŏ kluôm ala, mdiê lŏ tinei knŏng dôk ti tluôn krĭng Dap mnai krông Hồng lehanăn Krông Cửu Long. Kyua anăn, Hdră mtrŭn mâo Anôk bruă kƀĭn ala ba mdah hlăm Hdră ala čar kñăm mđĭ kyar bruă duh mkra – ala ƀuôn krĭng mnuih djuê ƀiă lehanăn krĭng čư̆ čhiăng klă sĭt srăng mdĭ boh tŭ dưn, pŏk klei čang hmăng mđĭ kyar mơ̆ng dliê truh kơ êa ksĭ.

Nguyễn Xuân An, khua adŭ bruă dhar kreh – ala ƀuôn să Êa Na brei thâo, alŭ wăl mâo djăp ênŭm klei lu jơr mơ̆ng Dak Lak, mơ̆ng mdiê truh kơ mnơ̆ng pla sui thŭn, rông mnơ̆ng hlăm êa lehanăn ăt dôk mkŏ mjing dŭm gru hmô bi hgŭm mđĭ boh tŭ yuôm, kñăm đru bi mrâo mrang hdră duh mkra, pla mjing, mnia mblei ti krĭng ƀuôn sang.

Êngao kơ hdră bi hgŭm bruă kphê snăn thŭn anei să pŏk leh bi hgŭm bruă pla mdiê lŏ, čiăng djŏ guôp hŏng dŭm ƀuôn mâo bruă pla mdiê lehanăn kphê. Hŏng phŭn đru mơ̆ng Knŭk kna, srăng đru kơ mnuih ƀuôn sang kơ hdră mnêč, hbâo pruê lehanăn pla mjing djŏ hdră. Dŭm anôk bruă duh mkra tơdah mâo klei dưi bi hgŭm srăng hưn mthâo. Hlăm hdră anei, ƀĭng ngă lŏ hma pla mjing djŏ hdră srăng mâo anôk bruă duh mkra hrui blei mnơ̆ng hŏng ênoh đĭ hĭn mkă hŏng wăl anôk mnia mblei.

Knŭk kna đru djăp klei găl mâo, đru mjuăt bi hriăm kơ hdră mnêč, knŭk kna bi hgŭm mnuih ƀuôn sang lehanăn anôk bruă duh mkra, anei jing boh tŭ mơ̆ng gru hmô bi hgŭm mđĭ boh tŭ yuôm, sa kdrêč điêt ƀiădah bŏ hŏng klei tŭ yuôm hlăm bruă hluê ngă Hdră mtrŭn mơ̆ng Anôk bruă kƀĭn ala kơ klei mđĭ kyar bruă duh mkra – ala ƀuôn ti krĭng mnuih djuê ƀiă lehanăn krĭng čư̆ čhiăng. Hdră mtrŭn dưi ba mdah mâo wưng kčah, ƀiădah klei bi hgŭm hlăk jing tur knơ̆ng kjăp lehanăn pŏk êlan kơ ƀĭng ngă lŏ hma ti Lăn dap kngư đĭ kyar hơĭt kjăp, trei mđao./.