Čiăng pŏk ngă hdră bruă, kahan ksiêm čar tiŏ nao 13 knơ̆ng bruă rŭ mdơ̆ng hŏng êbeh 700 čô mă bruă grăp hruê, hŏng êbeh 300 čô knuă druh, lĭng kahan đru, giăm 5.500 gưl hruê đru rŭ mdơ̆ng. Kahan ksiêm dŭm să, ƀuôn hgŭm đru kčĕ hŏng bruă sang čư̆ êa alŭ wăl ba nao thiăm 4.973 gưl phung mă bruă ti nah gŭ. Hlăm ênoh 178 boh sang, truh ară anei bi leh leh anăn jao 106 boh sang.

Hŏng 70 boh adôk, kyua dŭm gŏ sang mâo klei čiăng mbŏ prăk bi liê čiăng pŏk mlar, mđĭ sang dôk, kahan ksiêm čar bi hgŭm ksiêm dlăng, rơ̆ng djŏ mnuih, djŏ klei găl leh anăn hnơ̆ng rŭ mdơ̆ng. Thiếu tướng Phan Thanh Tám, Khua kahan ksiêm čar Dak Lak bi mklă, bruă bi leh dŭm boh sang tal êlâô hlăm wưng bhiâo amâo djŏ knŏng jing klei yuôm bhăn ala ƀuôn ôh ƀiădah lŏ jing klei hrăm mbĭt mơ̆ng êpul kahan ksiêm, gưl bruă Đảng, bruă sang čư̆ êa leh anăn dŭm êpul bruă nah gŭ hlăm klei kriê dlăng klei hdĭp mnuih ƀuôn sang, boh nik dŭm gŏ sang hmăi kyua angĭn êbŭ mrâo êgao.