Hluê si Knơ̆ng bruă Sang hră mơar mtô bi hriăm čar Khánh Hòa, ară anei kluôm čar mâo êbeh 64.000 čô hđeh mnuih djuê ana ƀiă, hlăm anăn gưl hđeh điêt mâo êbeh 28.000 čô. Knŏng ti krĭng nah Dhŭng (alŭ wăl Ninh Thuận hđăp), mâo êbeh 60% phung hđeh gưl sa jing mnuih djuê ana ƀiă.

Lê Thái Trường Thi, Kơiăng khua Knơ̆ng bruă Sang hră mơar mtô bi hriăm čar Khánh Hòa brei thâo, êlâo adih kyua phŭn hrui ngăn prăk dôk kƀah, čar Ninh Thuận hđăp knŏng dưi pŏk ngă dŭm hdră mtrŭn braih kơ phung hđeh lehanăn đru hnư prăk đru hriăm hră kơ phung hđeh mnuih djuê ƀiă, hlăk mâo lu hdră mtrŭn mdê hjăn mkăn ka dưi ngă ênŭm. Leh bi mŭt 2 čar mơ̆ng hruê 1/7/2025, bruă pŏk ngă dŭm hdră mtrŭn ka dưi pŏk ngă pral. Lê Thái Trường Thi, brei thâo:

“Bruă pŏk ngă Hdră mtrŭn kluôm ăt dôk lu klei kpăk gun djŏ tuôm kơ klei prăk kăk, hdră mtrŭn. Kyua djŏ tuôm kơ hdră mtô bi hriăm jih sa hruê aguah tlam, nai mtô, anôk bruă nah gŭ, hdră đru… mâo lu mta djŏ tuôm kơ klei huă yang hruê mơ̆ng phung hđeh. Mâo lu klei dleh dlan. Krĭng Ninh Thuận hđăp lu anôk ka dưi mtô aguah tlam mơh hlăm sa hruê.

Leh klei hâo hưn mơ̆ng VOV kơ bruă phung hđeh ti krĭng Dhŭng Khánh Hòa ka dưi dưn hdră đru dôk huă yang hruê, Knơ̆ng bruă sang čư̆ êa čar Khánh Hòa brei thâo, jao leh kơ Knơ̆ng bruă Sang hră mơar mtô bi hriăm gĭt gai, ksiêm dlăng jih hdră mtrŭn mtô bi hriăm mơ̆ng dua alŭ wăl êlâo adih, mơ̆ng anăn đru kčĕ brei čih mkra dŭm hdră mtrŭn mrâo ba mdah kơ Êpul gơ̆ng bruă ƀuôn sang čar. Mta phŭn mđing kơ hdră mtrŭn đru kơ phung hđeh ti krĭng dleh dlan msĕ si prăk đru hriăm hră kơ phung hđeh mnuih djuê ƀiă, đru prăk tăk hriăm, hdră êa ksâo ti sang hră, mbĭt hŏng dŭm hdră đru kơ phung hđeh dôk huă lehanăn mkra mdĭ klei găl hriăm hră kơ phung hđeh krĭng mnuih djuê ƀiă. Bruă čih mkra dŭm hdră mtrŭn mrâo kñăm bi hrŏ klei bi kpleh dưi dưn hdră mtrŭn mơ̆ng dŭm krĭng, rơ̆ng phung hđeh hriăm hră ti kluôm čar Khánh Hòa leh bi mŭt mbĭt dưi dưn klei găl dưi hriăm hră lehanăn dlăng kriê klei suaih pral, mnơ̆ng ƀơ̆ng huă jăk hĭn.

Nguyễn Thanh Hà, Kơiăng khua knơ̆ng bruă sang čư̆ êa čar Khánh Hòa brei thâo, dŭm hdră mtrŭn tĭng srăng ba mdah kơ Êpul gơ̆ng bruă ƀuôn sang čar Khánh Hòa ti klei bi kƀĭn ti anăp, leh kơnăn dưi pŏk ngă hlăm kluôm čar, boh nik mđing kơ krĭng mnuih djuê ƀiă lehanăn krĭng adôk dleh dlan.

“Bruă đru dôk huă yang hruê, dôk đih dăm kơ phung hđeh mnuih djuê ƀiă dôk ba wĭt boh tŭ jăk siam. Đru kơ phung dưi hriăm hră hŏng klei jăk găl hĭn, đru kơ gŏ sang adôk dleh dlan. Mơ̆ng anăn, đru kơ phung hđeh mđĭ mta tŭ jăk hlăm mnơ̆ng ƀơ̆ng, đru mđĭ kyar kluôm dhuôm, rơ̆ng klei suaih pral bi sĭt klei čang hmăng mơ̆ng pô”./.