Ti čar Gia Lai, Khua bruă kƀĭn ala Vương Đình Huệ bi klă alŭ wăl mâo leh klei gĭr mđĭ kyar bruă duh mkra ala ƀuôn, mđĭ hnơ̆ng klei hdĭp kơ mnuih ƀuôn sang. Boh nik,hlăm bruă dhar kreh – yang ƀuôn mâo lu klei mlih jăk, bi lar jăk dŭm bôh tŭ dhar kreh mơ̆ng dŭm djuê ana čar Gia Lai, hnơ̆ng tŭ jăk bruă mtô mjuăt bi hriăm, bruă mdrao mgŭn dưi mđĭ hĭn. Dŭm hdră bi hơĭt klei hdĭp yang ƀuôn, lăm lui klei ư̆ êpa, bi hrŏ ƀun, mgaih msir bruă mă dưi mâo klei uêñ mĭn hluê ngă hrăm mbĭt, hnơ̆ng gŏ sang ƀun ƀin hrŏ adôk 8,11%. Kñăm gĭt gai dŭm gưl bruă, dhar bruă, dŭm alŭ wăl hluê ngă jăk bruă bi hơĭt klei hdĭp yang ƀuôn, kriê dlăng kơ mnuih ƀuôn sang hlăm wưng tết, rơ̆ng kơ grăp sang, grăp čô dưi mơak yan mnga, drông tết. Anei jing dŭm klei gĭr năng čih yap mơ̆ng čar.

Khua bruă kƀĭn ala Vương Đình Huệ ăt lač, kyua hmăi mơ̆ng klei ruă tưp Covid-19, ară anei ăt adôk mâo lu gŏ sang dleh dlan, phung mă bruă mâo anôk mâo mâo bruă mă. Ti anăp boh klei anei, Đảng, knŭk kna drei mâo nanao klei uêñ mĭn truh kơ mnuih ƀuôn sang hŏng bruă ba mdah dŭm hdră êlan kñăm mkŏ mjing klei găl hŏn. Boh nik êpul khua bruă Đảng mâo leh asăp mtrŭn mrô 26 kơ bruă kriê dlăng tết kơ phung ƀun ƀin.

Kƀĭn angĭn jing angĭn êbŭ, ai tiê khăp kơ pô riêng gah msĕ hŏng khăp kơ asei pô mơ̆ng djuê ana Việt Nam jing năng mpŭ dlông rŏng lăn leh anăn jing bruă truăn ngă jêñ jêñ, boh nik hlăm wưng tết truh, yan mnga hriê. Kyua tết yơh jing mrô sa, amâo mâo wưng lŏ msĕ hŏng tết. Phung khua gĭt gai Đảng, knŭk kna čiăng sơăi mâo klei găl hĭn kơ grăp čô, grăp sang dưi mâo klei găl drông tết, mơak yan mnga. Hmei dlăng yuôm bhăn leh ananw pah mni Bruă Đảng, bruă sang čư êa, bruă kđi čar ti čar Gia Lai khădah adôk dleh dlan, jing čar ƀun, ƀiădah mâo nanao klei uêñ mĭn kriê dlăng leh anăn dlăng yuôm bhăn bruă anei. Hmei ăt lŏ mñă, bruă kđi čar drei mâo leh klei uêñ mĭn srăng uêñ mĭn lu hĭn, mbĭt hŏng dŭm knơ̆ng bruă, phung mâo ai tiê kmah đru kơ mnuih ƀuôn sang leh anăn hdră jăk hĭn jing mđĭ kyar bruă mkra mjing mnia mblei čiăng kơ mnuih ƀuôn sang mâo klei găl tlaih ƀun. Uêñ mĭn mđĭ hĭn ênoh mnuih tla ênua yang ƀuôn, ênua mdrao mgŭn.

Wưng anei, Khua bruă kƀĭn ala Vương Đình Huệ leh anăn êpul ngă bruă mđup brei leh 400 hnư mnơ̆ng kơ dŭm gŏ sang knŭk kna dlăng ba, phung mâo ai đru, knuă druh, lĭng kahan, gŏ sang ƀun, phung djŏ drao ruă điosin, phung mă bruă mâo klei hdĭp dleh dlan ti alŭ wăl čar, iêo mkrum mđup brei 200 boh sang klei hgŭm, mâo ênoh 10 êklai prăk kơ dhar bruă mặt trận čar Gia Lai. Ăt hlăm hdră nao čuă leh anăn mă bruă ti Gia Lai, Khua bruă kƀĭn ala Vương Đình Huệ ktuê dlăng leh Knơ̆ng prăk Công thương Việt Nam (Vietinbank) mđup brei 10 êklăk prăk kơ čar Gia Lai čiăng đru rŭ mjing anôk bruă kahan ksiêm să Knông lăn.

Ăt ƀri wưng nao mă bruă ti krĭng Lăn Dăp Kngư, Khua bruă kƀĭn ala Vương Đình Huệ jao klei jao leh klei dưi kơ Bùi Văn Cường, Khua kiă kriê adŭ bruă Kƀĭn ala, mơĭt 300 hnư mnơ̆ng tết kơ čar Dak Lak. Hluê si asăp mtrŭn mơ̆ng êpul khua bruă Đảng gưl dlông leh anăn hluê ngă klei mbha bruă mơ̆ng Phŭn bruă kđi čar, Khua bruă kƀĭn ala Vương Đình Huệ mâo leh klei nao čuă leh anăn hơêč hmưi tết ti 3 alŭ wăl jing Bạc Liêu, Gia Lai, Yên Bái.  Ƀiădah, hŏng klei khăp pô, Khua bruă kƀĭn ala Vương Đình Huệ lŏ iêo mkrum thiăm dŭm hnư mnơ̆ng čiăng mđup brei kơ dŭm gŏ sang knŭk kna dlăng ba, mnuih djuê ƀiă mâo klei hdĭp dleh dlan ti đa đa alŭ wăl. Knŏng ti čar Dak Lak, Khua bruă kƀĭn ala Vương Đình Huệ mơĭt leh 300 hnư mnơ̆ng (grăp hnư mâo ênoh 1 êklăk 300 êbâo prăk) mđup brei kơ mnuih ƀuôn sang ƀri wưng yan mnga Giáp Thìn dơ̆ng truh. Khua bruă kƀĭn ala Vương Đình Huệ mơĭt klei êmuh hrăm truh kơ bruă Đảng čar, bruă sang čư êa, mnuih ƀuôn sang dŭm djuê ana ti čar Dak Lak ƀri wưng akŏ yan mnga thŭn mrâo. Bùi Văn Cường brei thâo:

 “Khua bruă kƀĭn ala Vương Đình Huệ, Khua hlăm phŭn bruă kđi čar, Khua bruă kƀĭn ala jao kơ kâo leh anăn mơĭt klei hơêč jăk siam hĭn kơ bruă Đảng čar, bruă sang čư êa, mnuih ƀuôn sang čar Dak Lak. Hơêč hmưi thŭn mrâo mâo klei suaih pral, yâo mơak leh anăn tŭ jing. Hơêč hmưi kơ čar lŏ dơ̆ng mđĭ kyar bruă duh mkra ala ƀuôn, răng mgang klei êđăp ênang, mkŏ mjing Đảng, bruă kđi čar mâo lu boh tŭ dưn”.

Hluê si Nguyễn Đình Trung, Khua hlăm bruă Đảng gưl dlông, Khua bruă Đảng čar Dak Lak: Tết thŭn anei, čar Dak Lak iêo mkrum mâo êbeh 802 êklai prăk čiăng ngă bruă kriê dlăng tết kơ gŏ sang knŭk kna dlăng ba, mnuih ƀuôn sang mâo klei hdĭp dleh dlan. Hlăm dŭm hruê êgao, dŭm êpul ngă bruă mơ̆ng čar mao tgruh ti dŭm krĭng taih kbưi čiăng mđup brei hnư mnơ̆ng tết hŏng klei hmăng hmưi amâo mâo lui kơ sa čô kơ tluôn.