Blŭ hrăm hlăm mmông bi tuôm, bi ala khua gĭt gai Đảng, Knŭk kna Khua lăn čar Tô Lâm mơĭt klei êmuh hrăm, klei hơêč hmưi jăk siam, hơêč hmưi klei suaih pral mơ̆ng Khua gĭt gai Đảng Nguyễn Phú Trọng mơĭt kơ phung êdam êra ba anăp hđăp. Khua lăn čar mơĭt kơ phung êdam êra ba anăp hđăp, phung hlăm êpul kluôm ala hdĭp mơak, suaih pral, lŏ dơ̆ng lar bra ktang ai tiê “êdam êra ba anăp” hlăm bruă mkŏ mjing čar kwar Việt Nam khăp hơiêng.

Ară anei kluôm ala mâo hlăm brô êbeh 650 êbâo čô Êdam êra ba anăp hđăp tuôm nao hlăm klei bi blah sua mă klei êngiê djuê ana. Hlăm wưng êgao, Êpul hgŭm mkŏ mjing leh lu bruă ngă klă sĭt đru kơ phung êdam êra ba anăp hđăp. Hlăm anăn, mtrŭt mjhar leh phung hlăm êpul leh anăn ala ƀuôn mđup brei êbeh 1 êbâo boh sang klei khăp, mkra mđĭ 509 boh sang; mtrŭt mjhar mđup brei mnơ̆ng msĕ si hră mkiêt mkriêm, êdeh wai jơ̆ng, mnơ̆ng ƀơ̆ng huă, čhum ao, mnơ̆ng yua hriăm hră kơ hđeh mâo ênoh êbeh 269 êklai prăk.

Ƀri gưl Êpul hgŭm mprăp kơ klei bi kƀĭn phung bi ala kluôm ala Êpul hgŭm 

Êdam êra ba anăp hđăp Việt Nam tal V, wưng 2024-2029, Khua lăn čar čang hmăng phung hlăm êpul hdơr leh anăn gĭr jih ai tiê hlue ngă klei Awa mtă mtăn: “Hŏng phung jhŏng săn leh asei tuh êrah mčah klang pô”, Đảng, Knŭk kna leh anăn mnuih ƀuôn sang duah kơ digơ̆ anôk đih đăm, huă ƀơ̆ng kjăp, mbĭt anăn mtô bruă kơ grăp čô dưi hiu duh ƀơ̆ng.

 “Jiă kma klei Awa Hồ mtă, lĭng kahan leh anăn knuă druh dưi hriăm knuih jăk msĕ si: Jhŏng, amâo huĭ ôh kơ klei dleh dlan, dưi bi hriăm knuih mkŏ mjing, kpĭ kjăp kyua mnuih ƀuôn sang lač leh anăn phung knuă druh lăm lui knuih jhat msĕ si ƀơ̆ng ngăn; ti sang hriăm anăn ƀăng êgei lač kngan ngă, hriăm mbĭt hŏng bruă ngă đru kơ phung knuă druh săng hĭn klei mĭn kjăp, knuih mă bruă êngiê. Dŭm sang hră anăn hriăm mjuăt êjai, lông dlăng knuă druh”.

Khua lăn čar mtă kơ phung hlăm êpul gĭr hriăm leh snăn gĭr hĭn, gĭr leh snăn mđĭ hĭn, hŏng lu bruă ngă klă sĭt hĭn čiăng hnưm msir mgaih klei adôk kƀah hlăm bruă hŏng phung êdam êra ba anăp hđăp, dlăng anăn jing bruă klam, bi êdah klei hdơr knga êlam snăk hŏng phung duh myơr, săn leh asei kơ bruă mtlaih êngiê djuê ana, hluh lir lăn čar, mkŏ mkra leh anăn răng mgang čar kwar. Khua lăn čar Tô Lâm mñă klă:

 “Dŭm phŭn, dhar bruă, boh nik Êpul êdam êra cộng sản Hồ Chí Minh lŏ dơ̆ng ksiêm dlăng, kčĕ ba yua mbruă klei mĭn Hồ Chí Minh kơ sang hriăm prŏng phung êdam êra ba anăp, mkŏ mjing êpul knuă druh, mkŏ mjing phung êdam êra Việt Nam mâo klei khăp kơ lăn čar, ktưn hưn djuê ana mâo klei jhŏng kđi čar kjăpo, mâo knuih hdĭp jăk mngač, klei thâo ñŭ kma, mâo klei čang hmăng, ba anăp mbruă, thâo yua kdrăp mrâo mrang, duh myơr, săn asei klă sĭt jing phung mă bruă phŭn hlăm klei mkŏ mjing leh anăn răng mgang čar kwar.”

Khua lăn čar ăt mtă brei lŏ dơ̆ng bi hgŭm mkŏ mjing Êpul leh anăn phung Êdam êra ba anăp hđăp kluôm ala kjăp ktang; hgŭm jăk, tŭ dưn hlăm klei mlih mrâo, mkŏ mjing čar kwar. Mbĭt anăn mđing thâo ƀuh, mkŏ mjing, mkra mđĭ dŭm anôk hiu čhưn hƀuê ênuk kơ phung êdam êra ba anăp, klă sĭt jing “Anôk phŭn”, mtô kơ knhuah gru krŭ kdơ̆ng.

 Ară anei Gưl dlông Êpul hgŭm phung êdam êra ba anăp dôk pŏk ngă sa klei mtrŭt mjhar leh anăn 2 hdră bruă prŏng mâo Klei mtrŭt mjhar “Phung êdam êra ba anăp hđăp bi hmô hlue ngă knhuah mngač Hồ Chí Minh; Hdră "Êdam êra ba anăp hđăp ngă bruă duh mkra mbruă kyua klei khăp ƀĭng kahan”; Hdră “Kyua klei khăp ƀĭng kahan, grăp čô knuă druh, phung hlăm êpul ngă lu bruă jăk”. 74 thŭn êgao phung êdam êra ba anăp duh myơr, kriê pioh knhuah gru kdrưh kơăm mơ̆ng phung êdam êra ba anăp leh anăn dŭm gưl mnuih Việt Nam; ba anăp ngă djăp mta bruă, nao djăp anôk tơdah čar kwar čiăng; hdĭp kyua klei khăp ƀĭng kahan.