Hŏng mnuih ƀuôn sang djuê ana Bahnar ti ƀuôn Klah, să Kon Chiêng, kdriêk Mang Yang, khua mduôn Híp yơh jing “Pô ba akŏ”, atăt čung mnuih ƀuôn sang găn klei dleh dlan, klei knap mñai, rŭ mdơ̆ng klei hdĭp trei mđao. Êbeh leh 75 thŭn, kdlưn hĭn kơ anăn, awa Híp jing mnuih păn kjăp hdră êlan mơ̆ng Đảng, Knŭk kna mâo leh hŏng mnuih ƀuôn sang, thâo săng ai tiê klei mĭn mnuih ƀuôn sang. Kyuanăn ñu mâo nanao klei mĭn si srăng ngă čiăng kơ mnuih ƀuôn sang tlaih mơ̆ng klei ư̆ êpa, ƀun ƀin. Mĭn snăn hlŏng ngă mtam, awa Híp mtô mblang, mtă mtăn čiăng kơ jih jang mnuih thâo bi mkrum pioh đru kơ dŭm gŏ êsei dôk găn hlăm klei dleh dlan čan pioh duh kơ bruă knuă, mkŏ mjing lu bruă bi hmô “Brei rông êmô mbha êđai”. Mơ̆ng anăn, grăp gŏ êsei ƀun mâo rông sa drei êmô ana mđai, tơdah leh mđai mâo êmô êđai snăn êmô ana anăn lŏ brei kơ sang gŏ êsei mkăn lĕ rông, nanao snăn yơh. Mơ̆ng bruă ngă yuôm bhăn anei. Awa hip mâo nanao klei mĭn, êjai dôk hdĭp anei gĭr đru yơh jih jang mnuih, djŏ si klei awa Hô mtô:

 “Hmư̆ klei Đảng, klei awa Hồ mtă, ya mta klei jing tŭ dưn kơ mnuih ƀuôn sang, snăn pô ngă bruă anăn yơh. Amâodah ya mta jing klei djŏ snăn pô brei mnuih ƀuôn sang ngă msĕ. Bi mtô mblang, mtă mtăn brei mnuih ƀuôn sang thâo săng čiăng mâo mnơ̆ng ƀơ̆ng huă brei thâo gĭr mă bruă knuă yơh, brei thâo tui hriăm klei mrâo, klei djŏ snăn kơh srăng tlaih mơ̆ng klei dleh dlan ƀun ƀin. Pô nao mtă mtăn kơ mnuih ƀuôn sang snăn yơh”.

Leh mrâo ktlah dôk hjăn, gŏ êsei Bzyich jing sa gŏ êsei dleh dlan ti ƀuôn Klah, să Kon Chiêng, kdriêk Mang Yang, mâo khua mduôn Híp đru. Khua mduôn bi kƀĭn mnuih ƀuôn sang, lehanăn jih jang mnuih mâo klei bi tŭ ư đru kơ gŏ sang Bzyich čan mơ̆ng keh prăk ƀuôn pioh blei êmô ana mđai. Jing mnuih mâo leh klei thâo, khua mduôn Híp pô mtam yơh jing mnuih djă ti kngan ktrâo ti bruă đru kơ ung mô̆ ñu mkra wĭt war pla mjing mtŭk mtŭl kñăm mđĭ hĭng ênoh mâo ba wĭt kơ gŏ sang gơ̆. Knŏng dua tlâo thŭn êdei kơ năn, klei hdĭp mda gŏ sang Bzyich mâo klei bi mlih.

“Kyua mâo khua mduôn, ñu tuh êyuh jih ai tiê đru leh kâo mâo čan sa ênoh truh 10 êklăk prăk pioh rông êmô, êdei 4, 5 thŭn hơĭt leh bruă knuă. Anăp anei kâo srăng gĭr hĭn pla mjing ana tŭ dưn, lehanăn rông mnơ̆ng”.

Hŏng klei mĭn, bruă mđĭ kyar klei hdĭp mda, mguôp hŏng bruă kriê pioh dhar kreh djuê ana pô, khua mduôn Hip duh mĭng jih ai tiê hrue mmông pŏk dŭm boh adŭ mtô tông čing kơ phung hđeh hlăm ƀuôn. Mơ̆ng klei tông čing, kdŏ čhuang, mơ̆ng klei yăl dliê, khua mduôp Hip čang hmăng kơ phung hđeh gưl mrâo hlăm ƀuôn thâo bi kriê pioh, mđĭ bi lar knhuah gru dhar kreh mơ̆ng aê ama pô êlâo.

“Ară anei kâo mduôn leh, knŏng čang hmăng kơ ƀuôn sang pô thâo bi kriê pioh ya mta jing knhuah bhiăn jăk mơ̆ng aê ama pô, ya mta jing jăk jing djŏ snăn bi djă pioh, klei jhat bi ñĕ đuĕ. Hlăm ƀuôn đăm lĕ ôh hlăm klei bi kah ana mbha djuê, ƀiădah brei mâo klei thâo bi mguôp, bi đru hdơ̆ng găp mđrăm mbĭt đĭ kyar. Ară anei hlăm ƀuôn mâo leh sang prŏng siam, phung hđeh mâo nao sang hră mơar, kâo ƀuh jing mơak êdi”.

Klei blŭ nao mđrĭng hŏng bruă ngă, khua mduôn Hip jing sa čô đảng viên mâo mnuih ƀuôn sang mpŭ. Amâo mâo djŏ knŏng dŭm anăn ôh, khua mduôn mâo nanao êpul bruă Đảng, bruă sang čư̆ êa alŭ wăl mpŭ. Đinh Y Rươm, Khua bruă mặt trận să Kon Chiêng, kdriêk Mang Yang, lač: Khua mduôn Hip jing mnuih mâo k’hưm, mâo klei thâo uêñ hŏng bruă knuă, jing sa čô knuă druh ngă bruă đru čung ba hŏng klei mbruă, jing knơ̆ng kơ klei thâo bi mguôp.

“Hlăm klei hâo hưn hŏng mnuih ƀuôn sang ñu jĕ giăm snăk, khăp kơ mnuih ƀuôn sang, ƀuh mnuih ƀuôn sang knap mñai ñu duah djăp êlan đru mnuih ƀuôn sang. Mnuih ƀuôn sang mâo klei đăo knang snăk. Kâo ƀuh năng tui hriăm mơ̆ng ñu, kyua mâo ñu mtô mblang đru hmei hlăm klei thâo bi đru hdơ̆ng mnuih ƀuôn sang, čiăng kơ mnuih ƀuôn sang mâo klei đĭ kyar”.

75 thŭn leh, êbeh 30 thŭn hlăm Đảng, Khua mduôn Hip mâo nanao klei thâo bi hmô jăk, hlăm klei bi đru kơ mnuih ƀuôn sang anăn yơh jing klei mơak kơ ñu. Mnuih ƀuôn sang Bahnar tinei jih jang mnuih thâo hdơr knga snăk kơ khua mduôn Hip – mnuih mjhar leh êlah pui thâo ba anăp kơ klei mđĭ kyar klei hdĭp, msưh kdŭn klei bhiăn amâo mâo jăk, đru ƀuôn sang mâo klei hdĭp trei mđao./.