Blŭ hrăm hlăm hdră “Tết kuh kŭm- Yan mnga bi đru” pioh kơ mnuih ngă bruă tuôm hŏng klei dleh dlan ti car Kon Tum, K’iăng khua knŭk kna Trần Hồng Hà mơĭt leh asăp čuă êmuh mơ̆ng khua gĭt gai Đảng Nguyễn Phú Trọng; phung khua kiă kriê hlăm Đảng, knŭk kna lehanăn ai tiê klei khăp siă suôr truh hŏng grăp čô, mbĭt hŏng klei hơêč hmưi jăk siam hĭn.  Hơêč hmưi kơ jih jang mnuih, mnuih ƀuôn sang mâo sa yan Tết h’uh mđao, jăk yâo.

K’iăng khua knŭk kna bi mni kơ čar Kon Tum duh mĭn leh kơ mnuih ngă bruă lehanăn dŭm gŏ êsei dleh dlan ƀri yan mnga truh. Wưng anei, k’iăng khua knŭk kna Trần Hồng Hà mbĭt hŏng phung khua kiă kriê čar Kon Tum mđup brei leh mnơ̆ng Tết kơ  200 čô mnuih ngă bruă lehanăn 50 gŏ êsei mâo klei hdĭp dleh dlan, grăp hnư hŏng ênoh 1 êklăk 300 êbâo prăk.