Truh kơ ară anei, Kêh prăk dưi iêo mkrum leh êbeh 77 êklai prăk. Mĭn tĭng kluôm thŭn 2023 srăng mâo êbeh 111 êklai prăk, rơ̆ng bi mâo djăp leh anăn êgao hdră kčah mâo Êpul gơ̆ng jao hlăm thŭn 2023. Hluê anăn, Keh prăk đru leh kơ giăm 114 êbâo gưl čô hđeh, ênoh jih jang giăm 90 êklai prăk.

Hlăm klei kƀĭn, K’iăng Khua lăn čar Võ Thị Ánh Xuân, Khua kiă kriê Êpul gơ̆ng lač, hlăm wưng kơ anăp, êngao kơ dŭm klei găl, drei srăng tuôm hŏng lu klei dleh dlan, klei lông dlăng, klei ngă bruă mơ̆ng dŭm knơ̆ng bruă ăt adôk tuôm hŏng lu klei dleh dlan, êjai anăn ênoh phung hđeh dleh dlan čiăng mâo klei đru ăt adôk lu sơnăk. Kyuanăn, Keh prăk srăng čŏng pô, bi lar bruă klam đru kčĕ bi mguôp phung hgŭm hŏng dŭm mta bruă klă kơ̆ng.