Hlăm klei bi kƀĭn, Phŭn bruă hâo hưn kơ boh klei pŏk ngă, hlue ngă Hdră bruă djŏ tuôm kơ klei kriê dlăng kyua klei đĭ kyar kluôm mơ̆ng phung hđeh hlăm dŭm wưng tal êlao hlăm klei hdĭp ti gŏ sang leh anăn êpul êya wưng 2018- 2025.  Hlăm wưng êgao, dŭm phŭn, dhar bruă, anôk bruă leh anăn alŭ wăl đru kơ êbeh 6 êklăk 4 êtuh êbâo čô hđeh hŏng ênoh bi liê êbeh 1.646 êklai prăk.

Ti anôk bi kƀĭn, dŭm Phŭn, dhar bruă, alŭ wăl ăt lač kơ boh tŭ ăt msĕ mơh klei dleh dlan, lông dlăng tơdah ngă bruă kriê dlăng klei suaih pral leh anăn răng mgang phung hđeh, akâo kơ hdră msir čiăng dưi mâo lu hdră kñăm, hnơ̆ng kčah mơ̆ng dŭm Hdră mtrŭn mơ̆ng Khua Knŭk kna, hlăm anăn, lu phung bi ala bi êdah klei rŭng răng kơ klei ngă jhat kơ phung hđeh, tlĕ mă phung hđeh mâo klei bi knăl đĭ ti dŭm alŭ wăl, lu klei tuôm hŏng gun  kpăk, ka dưi msir mgaih.