Khua bruă kƀĭn ala Trần Thanh Mẫn lač: gưl tal 1 klei bi kƀĭn mâo leh klei tŭ jing; mâo phung bi ala lehanăn mnuih ƀuôn sang mđing, ktuê hmư̆. Klei kơ bruă dăp mnuih ngă bruă, mâo ngă leh hŏng klei pral, djŏ mta mtrŭn, djŏ hdră êlan kơ klei ruah mâo hră mplĕ tŭ ư lu. Klei bi trông hlăm anôk bi kƀĭn, ti dŭm êpul, lehanăn klei êmuh, wĭt lač klei êmuh mâo ngă leh hŏng jih hnơ̆ng, hlăm klei hnŭk êngiê, kñăm kơ boh phŭn hlăm klei khuăt. Lu phung bi ala bi êdah klei blŭ, hŏng klei klă mngač, hlăm ai tiê bi đru, mâo bruă đua klam prŏng, mâo bi êdah leh lu hdră êlan mă bruă jăk pioh kơ bruă kiă kriê klei duh mkra ala ƀuôn, bruă răng mgang klei êđăp ênang mơ̆ng knŭk kna lehanăn dŭm phŭn dhar bruă.

  Ti anôk bi kƀĭn tal 34, Dharr bruă gĭt gai bruă kƀĭn ala ksiêm nik lehanăn mâo klei čoh čuăn klă kơ dŭm bruă ngă, klei bi trông kñăm mâo djăp klei găl pioh ba mdah hŏng anôk bruă mƀĭn ala bi mklă ti gưl 2, boh nik hŏng dŭm bruă mâo klei hmăi prŏng msĕ si Hdră bhiăn bruă ênua yang ƀuôn (lŏ mlih mrâo), lehanăn dŭm bruă, klei čih mkra pioh ba mdah kơ anôk bruă kƀĭn ala bi mklă ti sa anôk bi kƀĭn msĕ si: Čuăl mkă krĭng wăl êa ksĭ lăn čar; hdră bhiăn kiă kriê, ba yua phao ktuang, mnơ̆ng mtuh, lehanăn mnơ̆ng mbĭt anăn (lŏ mlih mrâo), dŭm hdră mtrŭn truăn hjăn kơ čar Nghệ An, kơ ƀuôn prŏng Đà Nẵng. Khua bruă kƀĭn ala Trần Thanh Mẫn mtă kơ dharr bruă gĭt gai bruă kƀĭn ala mđing hlăm dŭm bruă mâo leh klei thiăm mbŏ kơ bruă mkŏ mjing hdră bhiăn, klei bhiăn mtrŭn hlăm thŭn 2024:

"Hdră bhiăn lŏ bi mlih mâo 4 hdră bhiăn anăn jing: Hdră bhiăn mlih mrâo, thiăm mbŏ đa đa mta hlăm hdră bhiăn lăn ala; Hdră bhiăn sang dôk, Hdră bhiăn mnia mblei sang lăn; hdră bhiăn mkŏ mjing êpul brei čan prăk, lehanăn dŭm hdră mtrŭn mơ̆ng anôk bruă kƀĭn ala kơ klei bi hrŏ jiă ênoh ênil đĭ. Hŏng dŭm bruă dôk hlăm klei dưi mâo leh hdră êlan mă bruă, snăn ngă mtam yơh bi ruh mgaih jih klei dleh dlan, klei gun kpăk hlăm bruă knuă”.

Dharr bruă gĭt gai bruă kƀĭn ala mâo leh klei blŭ kơ bruă čih mkra hdră bhiăn răng mgang klei êđăp ênang êlan klông. Khua adŭ bruă răng mgang lăn čar lehanăn răng mgang klei êđăp ênang hlăm anôk bruă kƀĭn ala Lê Tấn Tới lač: Hrue 22/5, Bruă kƀĭn ala bi trông leh hlăm sang bi kƀĭn, kơ klei čih mkra hdră bhiăn răng mgang klei êđăp ênang êlan klông. Jih jang hdră êlan kñăm mâo leh klei bi tŭ ư hŏng klei čiăng čih mkra hdră bhiăn răng mgang klei êđăp ênang êlan klông, dưi mâo klei mđing hmư̆, mlih mkra. Năng mđing hĭn, Khua adŭ bruă răng mgang lăn čar, răng mgang klei êđăp ênang hlăm anôk bruă kƀĭn ala lač, Mkă dlăn hŏng bruă knuă leh êgao, mâo klei čang hmăng kơ dhar bruă gĭt gai bruă kƀĭn ala lŏ thiăm mbŏ dŭm mta mtrŭn “êdeh ô tô hiu mdiăng mưn hđeh hriăm hră, hđeh điêt” hlăm mta 46 hlăm klei čih mkra hdră bhiăn. K’iăng khua bruă kƀĭn ala Nguyễn Khắc Định mâo klei blŭ:

"Êdeh hiu mdiăng phung hđeh brei mâo ênoh čuăn hjăn, si srăng ngă čiăng kơ mnuih kiă kriê, pô mgăt êdeh, čiăng rơ̆ng kơ êdeh leh trŭn jih mnuih, amâo srăng lŏ mâo ôh klei wơr mnuih hlăm êdeh. Drei čiăgn bi thâo klă bruă knuă anei hŏng jih jang, ksiêm dlăng jih jang, mkŏ mjing klei ksiêm dlăng nanao êdeh čiăng bi djăp ênoh čuăn dưi êran, bi tơdah êdeh amâo mâo lŏ jăk ôh snăn amâo lŏ dưi yua ôh”.

Bi êdah klei anăn mâo klei bi tŭ ư prŏng hŏng dŭm mta čuăn kơ êdeh ô tô mdiăng phung hđeh hriăm hră, hđeh adŭ điêt hŏng êdeh ô tô, Khua knơ̆ng čih hră mơ̆ng anôk bruă kƀĭn ala Bùi Văn Cường lač: Êngao kơ dŭm mta mtrŭn hŏng êdeh ô tô, snăn hŏng pô mgăt êdeh, mnuih kiă kriê hlăm êdeh, sang hră anăn... Boh nik klei mdiăng hđeh hriăm hră gưl sa, hđeh adŭ điêt brei mâo mdhô̆ bi djŏ guôp hŏng phung hđeh, lehanăn brei bi mngač mơh hlei anôk bruă kiă kriê bruă anei, kñăm bi mâo mta mtrŭn klă ênŭm;

 Mta 70 hlăm hdră bhiăn êlan dơ̆ng mâo mtrŭn kơ dua klei êdeh dŭ mdiăng hđeh hriăm hră, jing mơ̆ng sang hră, lehanăn phung ngă bruă tiŏ nao êdeh mưn brei dŭ mdiăng hđeh đua klam bruă anei, čiăng snăk bi mâo klei bhiăn kjăp čoh čuăn mtrŭn klă bruă klam kơ sang hră, bruă klam kơ anôk ba yua êdeh dŭ mdiăng hđeh, si bruă srăng ngă čiăng bi jăk kơ bruă anei”.

Ăt hlăm klei bi kƀĭn anei mơh, Dhar bruă gĭt gai bruă kƀĭn ala mă klei blŭ kơ bruă hlak mblang, čih pioh, mlih mkra hdră bhiăn ƀuôn prŏng phŭn (lŏ mlih mrâo), lehanăn mă klei blŭ kơ klei čuăl mkă ƀuôn prŏng phŭn Hà Nội wưng thŭn 2021 - 2030, tă hdră hlŏng truh kơ thŭn 2050 lehanăn bi mlih klei čuăl mkă ƀuôn prŏng phŭn Hà Nội truh thŭn 2045, tă hĕ hdră hlŏng truh kơ thŭn 2065./.