Mbĭt hŏng kluôm ala, klei bi lông hriăm jih gưl 3 thŭn 2024, mkŏ mjing mơ̆ng hruê 26- 29/6 čar Dak Lak mâo giăm 21.000 čô bi lông ti 33 anôk hŏng êbeh 870 adŭ bi lông hlăm dŭm kdriêk, wăl krah, ƀuôn prŏng. Êbeh 2000 čô knuă druh, phung nai dlăng klei bi lông leh anăn mă bruă ti dŭm anôk bi lông. Truh wưng anei, Dak Lak mprăp mkŏ mjing leh klei bi lông hlue si hdră kčah leh anăn klei kčah mtrŭn mơ̆ng Phŭn bruă sang hră mtô bi hriăm, mđing kơ sa klei bi lông êđăp ênang, mâo boh tŭ dưn. Bruă gang mkhư̆ klei ruă rưp, bi doh wăl hdĭp mda, doh êƀăt mnơ̆ng ƀơ̆ng, đru kơ yan bi lông, phung amĭ ama hđeh bi lông, ăt mâo Anôk bruă gĭt gai klei bi lông dŭm gưl pŏk ngă leh anăn mâo hdră msir mơ̆ng hnưm hlăm klei bi hgŭm hlue ngă. 

Bruă rơ̆ng êđăp ênang hlăm klei bi lông dưi mđing dlăng snăk. Hlue si Đại tá Nguyễn Hữu Lương, Khua adŭ bruă klei êđăp ênang kđi čar kriê dlăng bruă knuă (PA03), Kahan ksiêm čar Dak Lak, bruă kahan ksiêm mơ̆ng hnưm mkŏ mjing leh hdră kčah bi hgŭm kjăp hŏng dŭm anôk bruă phŭn hlăm dŭm hdră msir rơ̆ng êđăp ênang kơ klei bi lông.