Hlăm 235 gŏ êsei ară anei dôk hdĭp mda ti krĭng gun kpăk kơ lăn ala, mnuih ƀuôn sang plag wah să Đăk Nên, kdriêk Kon Plông, čar Kon Tum leh anăn să Trà Vinh, kdriêk Nam Trà My, čar Quảng Nam snăn mâo truh mkrah wah ênoh gŏ êsei ƀun. Kyua gun kpăk kơ lăn ala, mnuih ƀuôn sang amâo mâo klei bi liê mkra mjing pui kmlă, êlan klông, sang hră, amâo dưi mkăp hră mơar yua lăn…anăn blŭt hĕ lu klei găl mđĭ kyar bruă mkra mjing mđĭ klei hdĭp mda. Phan Quốc Vũ, Khua Anôk bruă kriê dlăng dliê mgang akŏ êa Thạch Nham, čar Kon Tum, brei thâo, anôk bruă čiăng jao dliê kơ mnuih ƀuôn sang, êpul êya kriê dlăng răng mgang, ƀiădah kyua dliê jing mơ̆ng čar Kon Tum lŏ mâo mnuih ƀuôn sang kyua čar Quảng Nam kriê dlăng anăn amâo dưi jao dliê ôh. Kyua anăn mnuih ƀuôn sang, êpul êya snăn amâo dưi jao dliê čiăng dưi mâo prăk  hrui wĭt lŏ mâo êpul răng mgang dliê lŏ dơ̆ng tuôm hŏng lu klei dleh dlan hlăm bruă kriê dlăng:

 “Bruă kriê dlăng răng mgang dliê krĭng wăl anei dleh dlan. Klei găl hdĭp mda mă bruă snăn anei jing krĭng ka mâo pui kmlă kuč mngač ăt msĕ mơh êlan klei pui đĭng blŭ leh anăn dŭm anôk bruă nah gŭ mkăn ka rơ̆ng kyua anăn dleh dlan hlăm klei hdĭp mda mơ̆ng êpul răng mgang dliê. Krĭng wăl anei jing krĭng lăn ala čar Kon Tum kriê dlăng ƀiădah mnuih ƀuôn sang snăn čar Quảng Nam. Anôk bruă dleh dlan hĭn jing bruă hâo hưn mnuih ƀuôn sang kriê dlăng răng mgang dliê”.     

Ară anei, ti krĭng gun kpăk kơ lăn ala, mnuih ƀuôn sang plah wah să Đăk Nên, kdriêk Kon Plông, čar Kon Tum leh anăn să Trà Vinh, kdriêk Nam Trà My, čar  Quảng Nam, amâo mâo ôh hdră bruă anôk bruă nah gŭ dưi bi liê mơ̆ng prăk knŭk kna. Klei anei ngă kơ klei hdĭp mnuih ƀuôn sang dleh dlan leh lŏ dleh dlan hĭn. Y Thị, K’iăng Khua dlăng bruă Đảng kdriêk Kon Plông, čar Kon Tum, brei thâo:

 “Klei čiăng bi liê msir mgaih klei dleh dlan hlăm klei hdĭp mnuih ƀuôn sang ăt msĕ mơh bi liê kơ hdră bruă nah gŭ leh anăn klei găl kơ klei hdĭp mda ala ƀuôn să Trà Vinh, kdriêk Nam Trà My amâo dưi msir mgaih ôh kyua hdră bhiăn amâo brei hlue ngă bi liê êngao kơ krĭng lăn knŭk kna. Leh lu blư̆ bruă sang čư̆ êa 2 să Đăk Nên- Trà Vinh leh anăn 2 kdriêk  Kon Plông- Nam Trà My mă bruă ƀiădah amâo dưi msir mgaih ôh klei gun kpăk”.

Ti anăp klei dleh dlan mơ̆ng 235 gŏ êsei, giăm 1.100 čô mnuih ƀuôn sang ti krĭng gun kpăk, bŏ 3 thŭn êgao, lu klei bi kƀĭn plah wah bruă djŏ tuôm leh anăn bruă sang čư̆ êa dŭm gưl 2 čar Kon Tum leh anăn Quảng Nam dưi mkŏ mjing ƀiădah klei gun kpăk ăt kăn dưi msir mgaih kyua 2 tĭng amâo mâo klei tŭ ư. Đặng Quang Hà, Khua Knơ̆ng bruă sang čư̆ êa kdriêk Kon Plông, čar Kon Tum, brei thâo:

“Čang hmăng gưl mâo klei dưi hnưm ksiêm dlăng, msir mgaih klei gun kpăk kơ lăn ala  mâo leh sui. Mơ̆ng anăn dŭm alŭ wăl mâo klei găl bi liê kơ anôk bruă nah gŭ, kriê dlăng klei hdĭp mnuih ƀuôn sang, rơ̆ng kơ mnuih ƀuôn sang klei găl kơ lăn ala, sang dôk, mkra mjing lŏ hma, mơ̆ng anăn mnuih ƀuôn sang mâo klei hdĭp hơĭt kjăp hĭn, jăk hĭn”.

Leh lu klei bi tuôm dua tĭng, čar Quảng Nam ăt dôk mâo klei mĭn krơ̆ng hră gŏ êsei mnuih ƀuôn  sang leh anăn bi mlih krĭng lăn Kon Tum ti čar pô. Mklăk wĭr čar  Kon Tum lač brei lui snăn lăn ala hlue si hră mơar leh anăn srăng ba hră gŏ êsei giăm 1.100 čô mnuih mơ̆ng Quảng Nam kơ Kon Tum. Boh nik, thŭn 2023, 2 čar tŭ ư mkŏ mjing 2 êpul ksiêm dlăng kluôm krĭng anei, mbĭt anăn mbha hră mă klei blŭ mnuih ƀuôn sang hŏng 2 hdră msir “mkra mlih anôk ngă hră mơar leh anăn bi mlih hlăm  hră gŏ êsei”.

Boh tŭ hlăm 2.240 čô mnuih ƀuôn sang hgŭm mă klei blŭ mguôp mâo 882 čô mnuih, mâo êbeh 37% akâo mkra mlih krĭng lăn anôk bruă knŭk kna 2 alŭ wăl, 1.358 čô mnuih, mâo êbeh 60% brei mlih hră gŏ êsei mnuih ƀuôn sang să Trà Vinh, kdriêk  Nam Trà My dôk hdĭp mda hlăm krĭng gun kpăk kơ lăn ala, mnuih ƀuôn sang jing ti čar Kon Tum. Khădah snăn truh ară anei boh tŭ gưl ksiêm dlăng kjăp plah wah 2 čar ăt ka dưi mđĭ lar ôh boh sĭt. Kon Tum leh anăn Quảng Nam ăt ka tŭ ư ôh leh anăn mnuih ƀuôn sang ăt lŏ dơ̆ng dôk hlăm klei kƀah, dleh dlan.