Hlăm wưng păn bruă êgao, hdră bhuă “Phung hriăm gưl prŏng 5 jăk” lŏ dơ̆ng jing hdră bruă phŭn mơ̆ng phung hriăm gưl prŏng, mâo dŭm gưl Êpul hgŭm phung hriăm gưl prŏng mđĭ kyar kluôm hŏng lu hdră êlan mrâo, mbruă. Čiăng thâo ƀuh klă hĭn kơ boh tŭ dưn dưi mâo, mkŏ mjing dŭm hdră êlan mloh mrâo hlăm bruă hluê ngă hdră “phung hriăm gưl prŏng 5 jăk” hlăm wưng kơ  anăp, Võ Đức Phúc, bi ala Êpul hgŭm phung hriăm gưl prŏng Việt Nam ƀuôn prŏng Hồ Chí Minh lač: mlih mrâo jing boh klei êlâo êdei, jing mta kñăm hdră ngă bruă, čiăng mă phung hriăm gưl prŏng jing mta phŭn mơ̆ng hdră bruă.

“Drei bi mlih klei mĭn, mă klei mĭn djŏ jing tur knơ̆ng kơ klei thâo săng djŏ, hdră tă djŏ, bruă ngă djŏ guôp. Bi hŏng phung hriăm gưl prŏng, drei čiăng mlih mrâo hŏng êlan čiăng kơ phung hriăm gưl prŏng thâo, săng, đăo knang, khăp kơ hdră bruă, mơ̆ng anăn diñu pô mtrŭt mjhar čiăng đĭ hriê kơ prŏng leh anăn đĭ kyar. Bi hŏng dŭm gưl knuă druh hlăm êpul, drei srăng brei kơ diñu thâo, diñu jing mta phŭn ktrâo atăt hdră, jing pô tŭ klei jăk mơ̆ng hdră. Diñu srăng jing phung đĭ hriê kơ prŏng mơ̆ng hdră bruă čiăng kơ anak mnuih jing mta phŭn, mta kñăm mơ̆ng hdră bruă”.

Anăn pia klei ngă bruă: Phung hriăm gưl prŏng Việt Nam, kjăp knhuah gru – bŏ hŏng klei hmăng hmưi – mkŏ mjing êdei anăp – mkŏ mjing lăn čar srăng bi râo ktang hlăm phung hriăm gưl prŏng Việt Nam klei hmăng hmưi mđĭ kyar lăn čar mdrŏng mtang, mrâo mrang, yâo mơak, bi klă hlăm klei đăo knang mơ̆ng phung hriăm gưl prŏng hŏng Đảng, knŭk kna, hdră kiă kriê Yang buôn ngă phŭn. Mai Hải Yến, Khua kiă kriê Êpul hgŭm phung hriăm gưl prŏn anôk bruă bi hriăm knuă druh ƀuôn prŏng Hồ Chí Minh lač:

“Thŭn anei kâo khăp êdi kơ anăn pia kyua ñu mâo knhuah iêo jak leh anăn kâo khăp êdi kơ boh hră “Kjăp knhuah gru” kyuanăn kâo hmăng hmưi hlăm wưng kơ anăp, Êpul hgŭm phung hriăm gưl prŏng ăt msĕ hŏng dưm gưl êpul srăng mkŏ mjing lu wăl brei kơ phung găp ksul mbŭ kli mĭn, mjuăt bi hriăm knhuah hdĭp, knuih kniêng, čiăng kơ diñu dưi bi klă knhuah gru ênuk gưl pô, ăt msĕ hŏng lŏ čuê bruă mkŏ mjing knhuah gru phung hriăm gưl prŏng Việt Nam”.

Hŏng akŏ “Hdră êlan mtrŭt mđĭ dŭm mta bruă mkŏ mjing hdră tă, ksul mbŭ knhuah hdĭp kơ phung hriăm gưl prŏng hlăm wưng mrâo”, Vũ Thu Hằng, pô hriăm gưl prŏng 5 jăk ƀuôn prŏng Hà Nội hưn hlăm Klei kƀĭn trông Êpul hgŭm phung hriăm gưl prŏng Việt Nam:

“Hlăm wưng mlih mrô leh anăn mlih tar rŏng lăn msĕ ară anei brei kơ drei lu klei găl đĭ kyar ƀiădah ăt mdưm dŭm klei dleh dlan, klei lông dlăng hlăm bruă bi hriăm bruă kđi čar kơ phung hriăm gưl prŏng…

Kñăm bi mâo ênŭm hnơ̆ng čuăn mơ̆ng bruă cách mạng wưng mrâo, čiăng kơ hdră bruă phung hrăm gưl prŏng leh anăn Êpul phung hriăm gưl prŏng amâo mâo mdei klei gĭr ktưn, mlih mrâo ktang mta phŭn leh anăn hdră ngă bruă, bi lar bruă klam nao êlâo mơ̆ng phung hriăm gưl prŏng. Nguyễn Tuấn Thành, Sang hră gưl prŏng Hà Nội lač, êngao kơ klei hrăm mbĭt mơ̆ng Êpul hgŭm phung hriăm gưl prŏng, čiăng kơ grăp čô hriăm gưl prŏng čŏng pô, gĭr ktưn, mbruă hlăm klei hriăm hră mơar, mjĕ mjuk mkŏ mjing êdei anăp, čiăng kơ Việt Nam jing ala čar mtăp mđơr hŏng dŭm ala čar mdrŏng ktang msĕ si awa Hồ hmăng hmưi:

“Hlăm bruă đoàn, bruă êpul brei kơ kâo klei bi tuôm klă sĭt hŏng dŭm hdră êlan klă klơ̆ng, hŏng dŭm anak mnuih klă sĭt, mđĭ klei thâo mă bruă êpul, brei pô mâo klei mbruă hlăm wăl msĕ sơnăn. Leh anăn kâo pŏk mlar hĭn dŭm klei mjĕ giăm ară anei jing phung mah jiăng truh kơ bruă êpul, jing kâo hriăm hlăm adŭ hriăm mâo êpul bi hriăm mbĭt. Kâo nao hlăm klei bi lông čô̆ kơ bruă pô srăng mâo êpul, anăn jing bruă pŏk mlar klei mă bruă yang ƀuôn đru kơ kâo mkŏ mjing êpul ƀĭng găp leh anăn dưi mâo klei čiăng mbĭt”.

Hmăng hmưi mkŏ mjing Êpul hgŭm phung hriăm gưl prŏng Việt Nam kjăp ktang, đru mkŏ mjing, răng mgang Đảng leh anăn jar bruă kđi čar, hluê ngă hrăm mbĭt dŭm hdră êlan mkŏ mjing Êpul nah gŭ kjăp ktang, bi mguôp hlăm phung hriăm gưl prŏng, hur har nao mkŏ mjing, răng mgang Đảng leh anăn jar bruă kđi čar. Nguyễn Nguyệt Anh, k’iăng khua kiă kriê Êpul hgŭm phung hriăm gưl prŏng Việt Nam čar Nghệ An, khua êpul hgŭm phung hriăm gưl prŏng sang hră gưl prŏng Vinh lač, êngao kơ klei hriăm hră mơar, phung hriăm gưl prŏng čiăng čŏng pô mâo lu klei kčĕ, ksiêm duah klei kreh knhâo, đru mguôp klei thâo mĭn kơ lăn čar, mđĭ hĭn klei thâo kơ pô:

“Bruă klam mơ̆ng phung hriăm gưl prŏng amâodjŏ knŏng hriăm ƀiădah ăt lŏ ksiêm duah klei kreh knhâo, anăn jing klei mdê hĭn hŏng phung hđeh sang hră gưl 3. Hlăm wưng kơ anăp, hmăng hmưi, hŏng klei ksiêm duah klei kreh knhâo srăng mâo dŭm klei bi lông hnơ̆ng tŭ jăk leh anăn mâo klei đru mtô mjuăt mơ̆ng phung nai, phung thơ̆ng kơ bruă kơ klei kreh knhâo”./.