Mrâo anei, aduôn Trương Thị Mai, Khua hlăm Phŭn bruă kđi čar, Khua hlăm Êpul bruă Đảng, khua êpul mkŏ mjing gưl dlông leh anăn êpul ngă bruă mâo leh klei nao čuă, mđup brei hnư mnơ̆ng tết kơ phung ngă bruă ti wăl anôk bruă tuh tia phú Hội, kdriêk Đức Trọng, čar Lâm Đồng. Hlăm mmông nao čuă, aduôn Trương Thị Mai, yap yuôm bhăn bruă klam leh anăn klei gĭr găn klei dleh dlan mơ̆ng phung knuiă druh, phung ngă bruă ti wăl anôk bruă tuh tia Phú Hội, hlăm bruă mkra mjing boh mnga bruă lŏ hma. Đru mđĭ hnơ̆ng đĭ kyar bruă lŏ hma hlăm čar, hlăm lăn čar mâo ti hnơ̆ng kdlưn hĭn hlăm 10 thŭn êgao. Djam mtam, êtak êbai, boh kroh mơ̆ng čar Lâm Đồng dưi ba čhĭ truh kơ lu lăn čar dlông rŏng lăn. Mbĭt anăn, aduôn Trương Thị Mai ăt mñă kơ wăl anôk bruă tuh tia, bruă sang čư êa čar Lâm Đồng lŏ dơ̆ng uêñ mĭn, đru kriê dlăng kơ phung mă bruă ti dŭm anôk bruă tuh tia, boh nik jing hmar bi leh sang dôk kơ mnuih mă bruă. Wưng anei, aduôn Trương Thị Mai mđup brei leh hnư mnơ̆ng tết kơ anôk bruă tuh tia Phú Hội, mđup brei giăm 200 hnư mnơ̆ng kơ mnuih mă bruă mơ̆ng anôk bruă tuh tia, grăp hnư mnơ̆ng mâo ênoh 1 klăk 300 êbâo prăk.

Ti ƀuôn prŏng Kon Tum, k’iăng Khua knŭk kna Trần Hồng Hà mbĭt hŏng êpul ngă bruă gưl dlông nao hgŭm hlăm hdră “Tết kkuh kŭm – yang mnga bi kah mbha” mơ̆ng êpul hgŭm mnuih mă bruă leh anăn dhar bruă mặt trận čar Kon Tum mkŏ mjing. Blŭ hrăm hlăm hdră “Tết kkuh kŭm – yang mnga bi kah mbha” kơ phung mă bruă leh anăn dŭm gŏ sang mâo klei hdĭp dleh dlan ti čar Kon Tum, k’iăng Khua knŭk kna Trần Hồng hà mơĭt leh klei êmuh hrăm mơ̆ng Khua gĭt gai Đảng Nguyễn Phú Trọng, phung khua gĭt gai Đảng, knŭk kna truh kơ phung knuă druh, mnuih ƀuôn sang hŏng klei hơêč hmưi jăk siam hĭn. Hơêč hmưi kơ grăp čô, grăp sang mâo sa wưng tết hơuh mđao, sang thŭn mrâo êđăp ênang leh anăn mdrŏng sah. K’iăng Khua knŭk kna bi mni kơ čar Kon Tum kriê dlăng leh kơ phung mă bruă leh anăn gŏ sang mâo klei hdĭp dleh dlan wưng Mơak yan mnga drông tết, mbĭt anăn mñă kơ čar lŏ dơ̆ng uêñ mĭn čiăng kơ phung mâo klei hdĭp dleh dlan gĭr ktưn tlaih mơ̆ng klei ƀun ƀin hŏng klei kjăp:

“Dŭm gưl bruă Đảng, bruă sang čư êa čar Kon Tum lŏ dơ̆ng uêñ mĭn, mâo dŭm hdră êlan đru kơ gŏ sang ƀun, giăm ƀun leh anăn rơ̆ng dưi tlaih ƀun hŏng klei kjăp. Mđĭ hĭn klei thâo, klei mă bruă mkra mjing, mkŏ mjing bruă mă, hdră duh ƀơ̆ng kơ phung ƀun ƀin, giăm ƀun kpưn đĭ hlăm klei hdĭp. Uêñ mĭn kơ anôk rŭ mjing sang dôk yang ƀuôn, mjuăt ktang asei mlei, dŭm hdră đru kơ phung mă bruă ti dŭm anôk bruă tuh tia. Bi kjăp dŭm êpul bruă, mđĭ boh tŭ dưn klei mă bruă mơ̆ng Êpul hgŭm mnuih mă bruă”.

Hâo hưn kơ boh sĭt bruă duh mkra ala ƀuôn lăn čar, k’iăng Khua knŭk kna Trần Hồng Hà mnă klă, lăn čar găn leh thŭn 2023 bŏ hŏng klei dleh dlan hŏng hnơ̆ng đĭ kyar bruă duh mkra êbeh 5,05%, dôk hlăm êpul đĭ kyar ktang hlăm alŭ wăl leh anăn tar rŏng lăn. Bi lar knhuah gru thâo khăp, thâo pap mơ̆ng djuê ana leh anăn knhuah jăk mơ̆ng klei kiă kriê drei, Đảng leh anăn knŭk kna truăn mĭn nanao kơ klei hdĭp mnuih ƀuôn sang, truh kơ bruă lăm lui klei ư̆ êpa, bi hrŏ ƀun, dlăng anei jing klei čuăn mjêč, jing bruă klam kñăm, hdră êlan đĭ kyar pral, bi kjăp lăn čar. Wưng anei, K’iăng knŭk kna Trần Hồng Hà mbĭt hŏng phung khua gĭt gai čar Kon Tum mđup brei leh hnư mnơ̆ng tết kơ 200 čô mă bruă leh anăn 50 gŏ sang mâo klei hdĭp dleh dlan hŏng grăp hnư mâo ênoh 1 êklăk 300 êbâo prăk.

Êlâo kơnăn, k’iăng Khua lăn čar Võ Thị Ánh Xuân mbĭt hŏng êpul bruă mơ̆ng gưl dlông ăt mâo klei nao čuă, mđup brei hnư mnơ̆ng gŏ sang knŭk kna dlăng ba, phung mă bruă mâo klei hdĭp dleh dlan ti kdriêk Vũ Thư, čar Thái Bình. Nao čuă, mđĭ ai, mđup brei hnư mnơ̆ng kơ mnuih mă bruă mâo klei hdĭp dleh dlan ti knơ̆ng bruă duh mkra mnia mblei Quốc tế Bảo Hưng, k’iăng Khua lăn čar Võ Thị Ánh Xuân brei thâo, thŭn 2023 ti gŭ klei gĭt gai mơ̆ng Đảng, klei gĭr mơ̆ng bruă kđi čar ăt msĕ hŏng klei đru mguôp mơ̆ng dŭm gưl mnuih ƀuôn sang, knơ̆ng bruă, lăn čar dưi mâo dŭm boh tŭ dưn yuôm bhăn hlăm djăp mta bruă.

Mñă klă Đảng, knŭk kna mâo nanao klei uêñ mĭn, kriê dlăng, mđĭ hnơ̆ng klei hdĭp, ai tiê kơ mnuih ƀuôn sang, hlăm anăn mâo mnuih mă bruă. K’iăng Khua lăn čar yap yuôm bhăn čar Thái Bình găn sa thŭn êgao dưi mâo mă lu boh tŭ dưn hlăm klei mđĭ kyar bruă duh mkra – ala ƀuôn, mñă ktang boh tŭ mbĭt anăn mâo klei đru mguôp mơ̆ng êpul phung mă bruă hlăm dŭm knơ̆ng bruă hlăm čar leh anăn mơ̆ng knơ̆ng bruă duh mkra mnia mblei Quốc tế Bảo Hưng. K’iăng Khua lăn čar mñă kơ čar Thái Bình lŏ kñăm kơ bruă kriê dlăng tết kơ mnuih ƀuôn sang, boh nik jing dŭm gŏ sang ƀun ƀin, mnuih mă bruă mâo klei hdĭp dleh dlan čiăng čŏng pô ngă klei đru, amâo mâo lui sa čô kơ tluôn.