Sang hră knŭk kna rông ba hđeh sang hră mnuih djuê ƀiă gưl 2 leh anăn gưl 3 An Lão mâo 2 gưl hriăm hŏng lu jing hđeh sang hră mnuih Bahnar leh anăn H’Rê. Hruê 5/4/2024, Êpul bruă djuê ana čar Bình Định bi mguôp hŏng sang hră anei ba mdah êpul bi mguôp “Phung êdam êra hngah kơ klei bi dôk ung mô̆ mơ̆ng mda leh anăn bi dôk anak amiêt awa” ti sang hră mtam.

Êpul bi mguôp anei jêñ jêñ mkŏ mjing klei hriăm čiăng gang mkhư̆ klei bi dôk ung mô̆ mơ̆ng mda leh anăn bi dôk anak amiêt awa kơ phung hđeh sang hră. Phung hđeh sang hră dưi hmư̆ klei hlăk mblang dŭm klei čuăn ƀuah mkra hŏng klei bi dôk ung mô̆ mơ̆ng mda leh anăn bi dôk anak amiêt awa, klei amâo mâo jăk kyua bi dôk ung mô̆ mơ̆ng mda hŏng klei suaih pral leh anăn klei hdĭp, đru kčĕ mblang klei ƀă k’kiêng anak kơ phung êdam êra.

Đinh Thị Bảo Thi, hđeh sang hră adŭ 9A2, Sang hră knŭk kna rông ba hđeh sang hră mnuih djuê ƀiă gưl 2 leh anăn gưl 3 An Lão ƀuh dŭm mta mơ̆ng êpul bi mguôp ba wĭt jing tŭ dưn leh anăn klă klơ̆ng:

“Phung nai hưn leh kơ hmei klei bi dôk ung mô̆ mơ̆ng mda leh anăn hmei lŏ dơ̆ng hâo hưn kơ phung ƀĭng grăp mkăn kơ klei anăn. Hŏng bruă hâo hưn anei, hmei hrăm mbĭt ngă jăk hĭn, amâo mâo ngă soh”.

Lu să ti kdriêk čư̆ čhiăng An Lão mâo hdră ngă jăk êdi kñăm bi hrŏ leh anăn gang mkhư̆ klei bi dôk ung mô̆ mơ̆ng mda leh anăn bi dôk anak amiêt awa. Ti să An Hưng, grăp alŭ ƀuôn hlăm klei kuôl kă dưi mâo mta phŭn klă klơ̆ng čiăng ƀuah mkra bi kmhal djŏ tuôm hŏng klei bi dôk ung mô̆ mơ̆ng mda leh anăn bi dôk anak amiêt awa. Phung khua mduôn, khua ƀuôn, phung mâo kơhưm mâo bruă klam yuôm bhăn hlăm bruă hâo hưn, mtrŭt mjhar mnuih ƀuôn sang hrăm mbĭt gang mkhư̆ klei bi dôk ung mô̆ mơ̆ng mda. Đinh văn Ranh ti alŭ 4, să An Hưng brei thâo:

“Phung mâo kơhưm hmei nao klă hŏng boh sĭt leh anăn thâo klă grăp gŏ sang čiăng hrăm mbĭt hŏng dhar bruă, êpul êya mơ̆ng alŭ nao hâo hưn. Tơdah hmao ƀuh ti gŏ sang mâo pô čiăng dôk ung mô̆ mơ̆ng mda hmei srăng nao truh kơ sang, amâo mâo brei ngă klei anăn ôh. Dŭm klei bi kƀĭn ƀuôn, bi kƀĭn dŭm êpul dhar bruă, dŭm mmông anăn hmei ăt mâo klei hmâo hưn brei thâo săng klă”.

Êpul khua bruă Đảng kdriêk An Lão gĭt gai bruă Đảng nah gŭ, bruă sang čư êa, bruă mặt trận, êpul êya nao hgŭm hâo hưn, mđĭ klei thâo săng kơ mnuih ƀuôn sang kơ klei bi dôk ung mô̆ leh anăn bă k’kiêng ana leh anăn ñĕ kơ klei bi dôk ung mô̆ mơ̆ng mda leh anăn bi dôk anak amiêt awa. Bruă hâo hưn hŏng dŭm mta bruă klă klơ̆ng, djŏ pô leh anăn hdră hâo hưn srăng mbruă. Phạm Minh Tâm, khua adŭ bruă djuê ana kdriêk An Lão brei thâo:

“Bi hŏng adŭ bruă djuê ana srăng bi mguôp hŏng bruă đoàn kdriêk An Lão, bruă sang čư êa dŭm să, wăl krah, mtrŭt mđĭ bruă hâo hưn hŏng lu hdră êlan. Boh nik ti 3 bĭt sang hră rông ba hđeh sang hră leh anăn 2 sang hră dôk yang hruê mơ̆ng kdriêk. Kñăm kơ bruă hâo hưn kơ phung hđeh sang hră kơ klei bi dôk ung mô̆ mơ̆ng mda. Kyuanăn hlăm thŭn êgao amâo mâo ôh klei bi dôk ung mô̆ mơ̆ng mda.

Kdriêk čư̆ čhiăng Vân Canh jing krĭng mâo lu mnuih ƀuôn sang mnuih Bahnar, H’Rê hdĭp mda ăt mâo ênoh klei bi dôk ung mô̆ mơ̆ng mda lu hĭn ti Bình Định. Phŭn agha klei anei kyua phung hđeh ka thâo săng klă kơ klei hriăm êkei mniê, klei ƀă k’kiêng anak, kƀah klei thâo săng kơ hdră bhiăn lăn čar, kƀah bruă đua klam mơ̆ng gŏ sang. Nguyễn Xuân Việt, k’iăng khua bruă sang čư êa kdriêk Vân Canh brei thâo, kdriêk tiŏ nao leh knuă druh adŭ bruă djuê ana leh anăn dŭm să jêñ jêñ ngă bruă hlăm grăp alŭ ƀuôn, mtrŭt mjhar dŭm gŏ sang bi klă amâo mâo brei mâo klei bi dôk ung mô̆ mơ̆ng mda leh anăn bi dôk anak amiêt awa. Klei bi mguôp pla wah sang hră leh anăn gŏ sang mâo klei uêñ mĭn.

“Khădah mâo lu klei hâo hưn, dŭm dhar bruă nao hgŭm ƀiădah klei bi dôk ung mô̆ mơ̆ng mda ăt mâo nanao. Ară anei, klei hâo hưn jing hdră phŭn, klei thâo săng mơ̆ng mnuih ƀuôn sang, boh nik jing phung hđeh mrâo prŏng ka săng klă ôh kơ klei hmăi mơ̆ng klei bi dôk ung mô̆ mơ̆ng mda, hbil truh kơ hmăi hlăm bruă kriê dlăng klei suaih pral anak čô, hmăi kơ klei hdĭp mda gŏ sang leh anăn klei amâo mâo jăk ala ƀuôn. Kdriêk ăt mñă kơ dŭm dhar bruă leh anăn alŭ wăl, sang hră mơar si srăng ngă čiăng mđĭ klei thâo săng kơ mnuih ƀuôn sang, boh nik jing čiăng hâo hưn kơ phung mda asei”.

Čar Bình Định gĭr ktưn, bi hrŏ kah knar 2 – 3% grăp thŭn ênoh hlâo bi dôk ung mô̆ mơ̆ng mda leh anăn amâo brei mâo klei bi dôk anak amiêt awa, mnuih djuê ƀiă mâo hnơ̆ng bi dôk ung mô̆ mơ̆ng mda lu. Đinh Văn Lung, khua êpul bruă djuê ana čar Bình Định brei thâo, anôk bruă mñă kơ dŭm kdriêk bi mguôp hŏng dŭm sang hră ti alŭ wăl čiăng mđĭ bruă hâo hưn, mtô bi hriăm kơ phung hđeh sang hră thâo klă hĭn kơ klei ƀăn k’kiêng anak, thâo săng klă kơ klei bi dôk ung mô̆, mprăp klei thâo hlăm klei hdĭp, dŭm hdră êlan gang mkhư̆ klei bi dôk ung mô̆ mơ̆ng mda kơ phung hđeh:

“Bruă hâo hưn kơ klei bi dôk ung mô̆ mơ̆ng mda leh anăn bi dôk anak amiêt awa ăt dôk hlăm hdră mrô 2 mơ̆ng hdră mrô 9, hdră êlan mrô 1719. Êpul bruă djuê ana čar ăt mkŏ mjing hdră êlan akŏ thŭn leh anăn mkăp brei ngăn prăn kơ dŭm kdriêk čiăng hrăm mbĭt hâo hưn. Êngao kơ hâo hưn, êpul bruă djuê ana čar lŏ mkŏ mjing êpul bi mguôp hngah kơ klei bi dôk ung mô̆ mơ̆ng mda leh anăn bi dôk anak amiêt awa, ngă pano, áp phích hâo hưn ti dŭm alŭ ƀuôn mâo hnơ̆ng klei bi dôk ung mô̆ mơ̆ng mda lu”./.